ប្រទេសចិននិងអែលសាល់វ៉ាឌ័របានបង្កើតទំនាក់ទំនងការទូតជាមួយគ្នានៅថ្ងៃអង្គារស្របពេលដែលប្រជាជាតិអាមេរិកកណ្តាលមួយនេះបានបោះបង់ចោលកោះតៃវ៉ាន់។ នេះជាជ័យជំនះមួយទៀតរបស់រដ្ឋាភិបាលក្រុងប៉េកាំងក្នុងយុទ្ធនាការរបស់ខ្លួនដើម្បីធ្វើឲ្យកោះមួយនេះឯកោ។
ទីក្រុងប៉េកាំងបានប្រើប្រាស់អំណាចសេដ្ឋកិច្ចរបស់ខ្លួនសម្រាប់ការគាំទ្រជាអន្តរជាតិដើម្បីដាក់សម្ពាធលើកោះដែលគ្រប់គ្រងដោយលទ្ធិប្រជាធិបតេយ្យមួយនេះដែលជាហេតុធ្វើឲ្យវានៅសល់សម្ព័ន្ធមិត្តការទូតត្រឹមតែ១៧ប៉ុណ្ណោះនៅជុំវិញពិភពលោក។
ថ្លែងក្នុងទីក្រុងប៉េកាំងនៅឯសណ្ឋាគារ Diaoyutai Guest House, រដ្ឋមន្ត្រីការបរទេសចិនលោក Wang Yi បានសរសើរការសម្រេចចិត្តរបស់ប្រទេសអែលសាល់វ៉ាឌ័រក្នុងការទទួលស្គាល់ថា មានប្រទេសចិនតែមួយគត់នៅក្នុងពិភពលោក។
បន្ទាប់ពីបានចុះហត្ថលេខាលើឯកសារមួយជាមួយលោក Wang ស្តីពីការបង្កើតទំនាក់ទំនង, រដ្ឋមន្ត្រីការបរទេសអែលសាល់វ៉ាឌ័រលោក Carlos Castaneda បាននិយាយថា ប្រទេសរបស់លោកបានធ្វើការសម្រេចចិត្តជាយុទ្ធសាស្ត្រនិងបានជ្រើសរើសយកផ្លូវត្រឹមត្រូវនិងមានប្រយោជន៍សម្រាប់ប្រជាជននៃប្រទេសទាំងពីរ។
ប្រធានាធិបតីអែលសាល់វ៉ាឌ័រលោក Salvador Sanchez Ceren បានថ្លែងនៅក្នុងសុន្ទរកថាទៅកាន់ជនរួមជាតិកាលពីរាត្រីថ្ងៃចន្ទថា “ខ្ញុំសូមប្រកាសថា រដ្ឋាភិបាលរបស់ខ្ញុំបានសម្រេចចិត្តបំបែកទំនាក់ទំនងការទូតរហូតមកដល់សព្វថ្ងៃរវាងសាធារណរដ្ឋអែលសាល់វ៉ាឌ័រនិងកោះតៃវ៉ាន់ហើយបង្កើតទំនាក់ទំនងការទូតជាមួយសាធារណរដ្ឋប្រជាមានិតចិន”។
សេចក្តីប្រកាសនៅក្នុងទីក្រុងប៉េកាំងបានធ្វើឡើងក្រោយការសម្រេចចិត្តរបស់តៃវ៉ាន់ក្នុងការកាត់ផ្តាច់ទំនាក់ទំនងជាមួយអែលសាល់វ៉ាឌ័របន្ទាប់ពីខ្លួនបានដឹងថា ប្រទេសនេះកំពុងរៀបចំផែនការដើម្បីទទួលស្គាល់រដ្ឋាភិបាលក្រុងប៉េកាំង។
ទំនាក់ទំនងរវាងក្រុងតៃប៉ិនិងក្រុងប៉េកាំងកាន់តែអាក្រក់ឡើងចាប់តាំងពីលោកស្រីប្រធានាធិបតី Tsai Ing-wen បានឡើងកាន់អំណាចស្របពេលរដ្ឋាភិបាលរបស់លោកស្រីបដិសេធទទួលស្គាល់ថាកោះតៃវ៉ាន់គឺជាផ្នែកមួយនៃគោលការណ៍ “ចិនតែមួយ”។
ប្រទេសចិនបានបង្កើនការទាក់ទាញសម្ព័ន្ធមិត្តរបស់តៃវ៉ាន់ចាប់តាំងពីលោកស្រី Tsai ក្លាយជាមេដឹកនាំនៅក្នុងឆ្នាំ២០១៦។
ប្រទេសអែលសាល់វ៉ាឌ័រគឺជាការបាត់បង់ផ្នែកការទូតទី៥ក្រោមការកាន់តំណែងរបស់លោកស្រីនិងជាប្រទេសទីបីនៅឆ្នាំនេះបន្ទាប់ពីប្រទេសប៊ឺគីណាហ្វាសូនិងសាធារណរដ្ឋដូមីនិក៕ AFP
Source: Kampuchea Thmey Daily
0 Comments