ភ្នំពេញ ៖ កាលថ្ងៃទី១៨ ខែសីហាឆ្នាំ២០១៨កន្លងមកនេះ ក្រុមហ៊ុន Hyundai បានរៀបចំកម្មវិធី Hyundai Test Drive ប្រចាំខែរបស់ខ្លួនដើម្បីផ្តល់ឱកាសឲ្យអតិថិជនបើកបរសាកល្បងនូវរថយន្តម៉ូឌែលចុងក្រោយដូចជា ៖ Santa Fe 2018 Tucson 2019 និង H-1 2019។ ពិធីនេះបានធ្វើឡើងនាមជ្ឈមណ្ឌលកម្សាន្តកោះពេជ្រ។
លោក ប្រាយ អ៊ែនខូ អគ្គនាយកគ្រប់គ្រងក្រុមហ៊ុន ហ៊ីយ៉ាន់ដាយបានថ្លែងឲ្យដឹងថា ចំពោះពេលបច្ចុប្បន្ននេះ ទីផ្សារអ្នកគាំទ្ររថយន្ត Hyundaiនៅប្រទេសកម្ពុជាគឺមានចំនួនច្រើន ខណៈទីផ្សារជុំវិញពិភពលោកក៏មានការពេញនិយមនិងផ្តល់ជំនឿចិត្តលើការប្រើប្រាស់រថយន្តប្រភេទ Hyundai ផងនោះ។ លោកលើកឡើងថា សម្រាប់ការរៀបចំពិធីបើកបរសាកល្បងនេះធ្វើឡើងគឺដើម្បីផ្តល់ជូនអតិថិជនក្នុងការបើកបររថយន្តស៊េរីទំនើបដោយផ្ទាល់ជាមួយនឹងការបង្ហាញពីអ្នកជំនាញឬលក្ខណៈពិសេសនានា។
លោក ប្រាយ អ៊ែនខូ បានបញ្ជាក់ទៀតថា ជាការកត់សម្គាល់កំណើននៃការលក់រថយន្តសម្រាប់ប្រទេសកម្ពុជាគឺមានការកើនឡើងជាបន្តបន្ទាប់តួយ៉ាងដូចជានៅអំឡុងឆ្នាំ២០១៨នេះ លទ្ធផលបានមកពីការលក់រថយន្តHyundaiគឺមានការកើនឡើងរហូតដល់ទៅ៣០ភាគរយឯណោះ ដែលបានមកពីការលក់រថយន្តSUV។ ម្យ៉ាងទៀតចំពោះការរៀបចំពិធីបើកបរសាកល្បងនេះឡើងគឺក្នុងគោលបំណងសំខាន់ផ្តល់ជូនចំពោះអតិថិជនគាំទ្រនូវទំនុកចិត្តក៏ដូចជាការបង្ហាញជូននូវលក្ខណៈពិសេសនៃបច្ចេកវិជ្ជាថ្មីទំនើប។
អគ្គនាយកគ្រប់គ្រងក្រុមហ៊ុន ហ៊ីយ៉ាន់ដាយលោក ប្រាយ អ៊ែនខូ បានលើកឡើងទៀតថា វត្តមានរបស់រថយន្តហ៊ីយ៉ាន់ដាយរយៈពេលប្រមាណ៩ឆ្នាំកន្លងមកនេះ បានធ្វើឲ្យម៉ាកសញ្ញានៃរថយន្តមួយនេះ ជាប់នៅក្នុងដំណាត់ថ្នាក់លេខ៣ក្នុងចំណោមរថយន្តដែលកំពុងមានវត្តមាន និងចរាចរនៅលើទីផ្សារនៃប្រទេសកម្ពុជា។ មិនតែប៉ុណ្ណោះចំពោះការនិយមប្រើប្រាស់រថយន្តហ៊ីយ៉ាន់ដាយក្នុងប្រទេសកម្ពុជាភាគច្រើនគឺមានតម្រូវការច្រើនទៅលើរថយន្តប្រភេទខ្នាតធំៗ ដែលមានក្នុងទីផ្សារកម្ពុជាប្រមាណជា៨០ភាគរយនិងជាប្រភេទរថយន្តដឹកអ្នកដំណើរ និងរថយន្តដឹកទំនិញខ្នាតតូច ខ្នាតធំ ជាដើម៕
Source: Kampuchea Thmey Daily
0 Comments