ប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយកាលពីថ្ងៃចន្ទថា លោកទំនងជានឹងជួបជាមួយមេដឹកនាំកូរ៉េខាងជើងលោក គីម ជុងអ៊ុន ជាថ្មីម្តងទៀត ខណៈលោកកំពុងការពារកិច្ចខិតខំប្រឹងប្រែងរបស់លោកក្នុងការបញ្ចុះបញ្ចូលឲ្យក្រុងព្យុងយ៉ាងបោះបង់ចោលអាវុធនុយក្លេអ៊ែររបស់ខ្លួន។
នៅក្នុងបទសម្ភាសន៍មួយជាមួយរ៉យទ័រ លោក ត្រាំ បាននិយាយថា លោកជឿជាក់ថា ប្រទេសកូរ៉េខាងជើងបានចាត់វិធានការជាក់លាក់ចំពោះការរំសាយអាវុធនុយក្លេអ៊ែរថ្វីបើមានការសង្ស័យជាទូទៅអំពីឆន្ទៈរបស់លោកគីមក្នុងការបោះបង់ចោលឃ្លាំងអាវុធរបស់លោកក៏ដោយ។
ស្របពេលដែលលើកឡើងថា “រឿងល្អៗជាច្រើនកំពុងកើតឡើង” ជាមួយកូរ៉េខាងជើងនោះ, លោក ត្រាំ បានត្អូញត្អែរថា ប្រទេសចិនមិនបានជួយអ្វីដូចដែលខ្លួនធ្លាប់បានធ្វើពីមុនមកទេដោយសារតែជម្លោះពាណិជ្ជកម្មរបស់ខ្លួនជាមួយសហរដ្ឋអាមេរិក។
លោក ត្រាំ បានថ្លែងថា លោកបានធ្វើការលើបញ្ហាកូរ៉េខាងជើងអស់រយៈពេលត្រឹមតែ៣ខែប៉ុណ្ណោះចំណែកឯអ្នកកាន់តំណែងមុនរបស់លោកវិញបានធ្វើការនេះអស់រយៈពេល៣០ឆ្នាំ។
លោកបាននិយាយថា “ខ្ញុំបានបញ្ឈប់ការសាកល្បងនុយក្លេអ៊ែររបស់កូរ៉េខាងជើង។ ខ្ញុំបានបញ្ឈប់ការសាកល្បងមីស៊ីលរបស់កូរ៉េខាងជើង។ ប្រទេសជប៉ុនមានក្តីរំភើប។ តើនឹងមានអ្វីកើតឡើង? តើនរណាដឹង? យើងនឹងរង់ចាំមើល”។
នៅឯកិច្ចប្រជុំកំពូលរបស់មេដឹកនាំទាំងពីរក្នុងប្រទេសសិង្ហបុរី លោកគីមបានឯកភាពយ៉ាងទូលំទូលាយដើម្បីធ្វើការឆ្ពោះទៅរកការរំសាយអាវុធនុយក្លេអ៊ែរនៅឧបទ្វីបកូរ៉េប៉ុន្តែកូរ៉េខាងជើងមិនបានបញ្ជាក់ថា ខ្លួនមានឆន្ទៈបោះបង់ចោលអាវុធរបស់ខ្លួនជាឯកតោភាគីដូចដែលរដ្ឋបាលរបស់លោក ត្រាំ បានទាមទារនោះទេ។
នៅពេលសួរថាតើកិច្ចប្រជុំមួយទៀតជាមួយលោកគីមអាចនឹងកើតឡើងដែរឬទេនោះ? លោក ត្រាំ បាននិយាយថា “វាទំនងជានឹងកើតឡើងប៉ុន្តែខ្ញុំមិនចង់ធ្វើអត្ថាធិប្បាយទេ”។
ក្រុមអ្នករិះគន់បាននិយាយថា លោក ត្រាំ បានធ្វើសម្បទានច្រើនពេកដល់លោកគីមដោយបានយល់ព្រមរៀបចំកិច្ចប្រជុំកំពូលនេះហើយបន្ទាប់មកផ្អាកសមយុទ្ធយោធារួម អាមេរិក - កូរ៉េខាងត្បូងប៉ុន្តែទទួលបានការតបតមកវិញតិចតួចបំផុត៕ REUTERS
Source: Kampuchea Thmey Daily
0 Comments