ភ្នំពេញ ៖ ការស្វែងរកការគាំទ្រពីប្រទេសកម្ពុជា ចំពោះបេក្ខភាពជាអគ្គលេខាធិការថ្មីនៃក្រុមប្រទេសនិយាយភាសាបារាំងនេះ បានធ្វើឡើងនៅក្នុងជំនួបរវាងលោកជំទាវ ល្វីស មុស៊ីគីវ៉ាបូ (Louise Mushikiwabo) រដ្ឋមន្ត្រីការបរទេស កិច្ចសហប្រតិបតិ្តការ និងសហគមន៍អាហ្វ្រិកបូព៌ា នៃសាធារណរដ្ឋរ៉ូវ៉ាន់ដា (Rwanda) អមដោយលោក ម៉ាម៉ាឌី ទូរ៉េ (Mamadi Touré) រដ្ឋមន្ត្រីការបរទេសនៃសាធារណរដ្ឋហ្គីណេ ជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា កាលពីព្រឹកថ្ងៃទី០៩ ខែសីហា ឆ្នាំ២០១៨។
លោក កេត សោផាន់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា ជំនួសលោក ជុំ សុន្ទរី ដែលត្រូវរាជរដ្ឋាភិបាលតែងតាំងជាឯកអគ្គរាជទូតកម្ពុជាប្រចាំនៅសហរដ្ឋអាមេរិក បានប្រាប់ក្រុមអ្នកសារព័ត៌មានក្រោយពីជំនួបនោះថា នៅក្នុងជំនួបពិភាក្សានេះ លោកស្រី ល្វីស មុស៊ីគីវ៉ាបូ បានស្នើសុំការគាំទ្រពីប្រទេសកម្ពុជា ចំពោះបេក្ខភាពលោកស្រី ជាអគ្គលេខាធិការថ្មីនៃក្រុមប្រទេសនិយាយភាសាបារាំង ហើយលោកស្រីបានជម្រាបជូនលោកទេសរដ្ឋមន្ត្រី ប្រាក់ សុខុន ថា លោកស្រីមកកម្ពុជានេះ មិនត្រឹមតែជាបេក្ខភាព Rwanda ទេ តែជាបេក្ខភាពរបស់សហភាពអាហ្វ្រិកតែម្តង ដោយសារសហភាពអាហ្វ្រិកបានគាំទ្រលោកស្រី ជាបេក្ខភាពតំណែងអគ្គលេខាធិការថ្មីនៃក្រុមប្រទេសនិយាយភាសាបារាំង។
ជាមួយគ្នានោះ លោកជំទាវ Louise Mushikiwabo បានលើកឡើងដែរថា ប្រសិនបើលោកស្រីជាប់ជាអគ្គលេខាធិការថ្មី នៃក្រុមប្រទេសនិយាយភាសាបារាំង គឺនឹងជំរុញកិច្ចសហប្រតិបត្តិការឲ្យបានកាន់តែស៊ីជម្រៅ ជាពិសេសគឺផ្តោតទៅលើយុវជន និងធ្វើឲ្យមានតុល្យភាពរវាងទិដ្ឋភាពនយោបាយ ក៏ដូចជាទិដ្ឋភាពសេដ្ឋកិច្ច ហើយលោកស្រីបានសង្កត់ធ្ងន់ថា បើសិនជាលោកស្រីជាប់ឆ្នោត គឺតួនាទីរបស់អង្គការអន្តរជាតិនេះ ក៏នឹងត្រូវឲ្យមានតុល្យភាពផងដែរ អំពីការអនុវត្តនូវនយោបាយរបស់ប្រទេសជាសមាជិក ដូចជា សិទ្ធិមនុស្ស សេរីភាព ដោយលោកស្រីយល់ថា នេះជាការអនុវត្តដោយអធិបតេយ្យរបស់ប្រទេសនីមួយៗ។
ជាការឆ្លើយតបលោកទេសរដ្ឋមន្ត្រី ប្រាក់ សុខុន បានថ្លែងអំណរគុណចំពោះវត្តមានរបស់លោកជំទាវ Louise Mushikiwabo ដែលអមដោយរដ្ឋមន្ត្រីការបរទេសហ្គីណេ មកកម្ពុជានាពេលនេះ ហើយលោកបានទទួលស្គាល់ពីលក្ខណៈសម្បត្តិរបស់លោកស្រី ដែលទទួលបានការគាំទ្រពីសហភាពអាហ្វ្រិក ក្នុងនាមជាបេក្ខភាពអគ្គលេខាធិការថ្មីនៃក្រុមប្រទេសនិយាយភាសាបារាំង ហើយក្រសួងការបរទេសបានដាក់សំណើសុំការសម្រេចពីថ្នាក់ដឹកនាំរដ្ឋាភិបាល ហើយការសម្រេចគាំទ្ររបស់រាជរដ្ឋាភិបាលកម្ពុជា នឹងដឹងនៅពេលនៃការបោះឆ្នោតនៅក្នុងកិច្ចប្រជុំកំពូលនៅក្នុងខែតុលា ឆ្នាំ២០១៨ នេះ នៅប្រទេសអាម៉េនី។
សូមបញ្ជាក់ថា លោកជំទាវ ល្វីស មុស៊ីគីវ៉ាបូ រដ្ឋមន្ត្រីការបរទេស កិច្ចសហប្រតិបត្តិការ និងសហគមន៍អាហ្វ្រិកបូព៌ា នៃសាធារណរដ្ឋរ៉ូវ៉ាន់ដា និងលោក ម៉ាម៉ាឌី ទូរ៉េ រដ្ឋមន្ត្រីការបរទេសនៃសាធារណរដ្ឋហ្គីណេ បានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា នាថ្ងៃទី០៩ ខែសីហា ឆ្នាំ២០១៨ នេះ ដើម្បីជួបពិភាក្សាការងារជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ហើយពិភាក្សានោះ ផ្តោតលើកិច្ចសហប្រតិបត្តិការក្នុងក្របខ័ណ្ឌអង្គការក្រុមប្រទេសនិយាយភាសាបារាំង និងការស្វែងរកការគាំទ្ររបស់កម្ពុជា ចំពោះបេក្ខភាពលោកជំទាវ ល្វីស មុស៊ីគីវ៉ាបូ ជាអគ្គលេខាធិការអង្គការក្រុមប្រទេសនិយាយភាសាបារាំង ដែលការបោះឆ្នោតនឹងប្រព្រឹត្តទៅនៅថ្ងៃទី១១ ដល់ថ្ងៃទីទី១២ ខែតុលា ឆ្នាំ២០១៨ ខាងមុខនេះ នៅប្រទេសអាម៉េនី។
លោកស្រី ល្វីស មុស៊ីគីវ៉ាបូ និងលោក ម៉ាម៉ាឌី ទូរ៉េ បំពេញទស្សនកិច្ចនៅក្នុងប្រទេសនិយាយភាសាបារាំង នៅឥណ្ឌូចិន ដូចជា កម្ពុជា ឡាវ និងវៀតណាម ដើម្បីស្វែងរកការគាំទ្រសម្រាប់បេក្ខភាពជាអគ្គលេខាធិការនៃក្រុមប្រទេសនិយាយភាសាបារាំង៕
Source: Kampuchea Thmey Daily
0 Comments