ភ្នំពេញ ៖ លោកសាស្ត្រាចារ្យ ប្រ៊ុយណូ ស្ពៀររ៉េ(Bruno SPIRE) អ្នកសម្របសម្រួលបារាំង សម្រាប់គម្រោងភ្នាក់ងារសិក្សាស្រាវជ្រាវផ្នែកជំងឺអេដស៍ និងជំងឺរលាកថ្លើម ហៅកាត់( ANRS)បានឲ្យដឹងថាបារាំង នឹងបង្កើនកិច្ចសហប្រតិបតិ្តការជាមួយកម្ពុជាជាបន្តទៀតទៅលើការប្រយុទ្ធប្រឆាំងនឹងជំងឺអេដស៍ និងការសិក្សាស្រាវជ្រាវករ ណី ជំងឺថ្លើមប្រភេទបេនិងសេព្រោះជំងឺថ្លើមប្រភេទបេងាយអាចឆ្លងពីម្តាយទៅកូនបានយ៉ាងឆាប់រហ័ស។
លោកសាស្ត្រាចារ្យប្រ៊ុយណូ ស្ពៀររ៉េបានលើកឡើងបែបនេះ កាលពីថ្ងៃទី១២ ខែកញ្ញា ឆ្នាំ២០១៨នៅក្នុងជំនួបពិភាក្សាការងារជាមួយលោកសាស្ត្រាចារ្យម៉មប៊ុនហេង រដ្ឋមន្ត្រីក្រសួងសុខាភិបាលនៅទីស្ដីការក្រសួង។
លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានបញ្ជាក់ថា ទន្ទឹមនឹងនេះកម្ពុជា-បារាំង បានប្ដេជ្ញារួមគ្នា ក្នុងការសហការស្រាវជ្រាវ លើគម្រោងចំនួន៦បន្ថែមទៀត លើគម្រោងកន្លងមកក្នុងនោះរួមមាន ១៖ យុទ្ធសាស្ត្រការធ្វើតេស្ដដោយការព្យាបាល ការធ្វើតេស្តឆាប់រហ័ស និងផ្តល់ការព្យាបាលឱសថឈ្មោះ តេណូហ្វូនៀល ដើម្បីការពារការចម្លងជំងឺរលាកថ្លើមប្រភេទបេ ពីស្រី្តមានផ្ទៃពោះចម្លងទៅទារក។២៖ MIRNA ជាការប៉ាន់ប្រមាណ និងគម្រោងការសិក្សាស្រាវជ្រាវចម្លងរោគ ដែលមានអ្នកផ្ទុកមេរោគរបេង និងជំងឺអេដស៍ ៣៖ សិក្សាលម្អិត អំពីអត្រាប្រេវ៉ាឡង់ និងរកនូវពូជនៃមេរោគ ដែលធ្វើឲ្យរលាកថ្លើម និងការអនុវត្តន៍ ក្នុងការចាក់ថ្នាំ មិនមានសុវត្ថិភាព សម្រាប់អ្នក ដែលមានជំងឺអេដស៍ និងអ្នកជំងឺរលាកថ្លើម នៅក្នុងខេត្តបាត់ដំបង។ ៤៖ ការសិក្សាអំពីវដ្ដនៃការប្រើប្រាស់ឱសថ ព្យាបាលដោយឱសថពន្យារអាយុជីវិត សម្រាប់ជំងឺអេដស៍ ដើម្បីស្វែងរកការរៀបចំនូវរបបកញ្ចប់ នៃការព្យាបាល ដែលហៅថា ឱសថក្នុងជួរទី៣។៥៖ ការវាយតម្លៃទៅលើជំងឺរលាកថ្លើម ដោយផ្អែកទៅលើការឆែកសុខភាពអ្នកជំងឺ សម្រាប់ការពារនូវជំងឺមហារីកមាត់ស្បូន ក្នុងចំណោមស្រី្ត ដែលមានវីរុសអេដស៍នៅក្នុងប្រទេស ដែលមានប្រាក់ចំណូលទាបនិង៦៖ សិក្សាអំពីសហគមន៍ ជាមួយនឹងហេដ្ឋារចនាសម្ព័ន្ធ ដែលមានសេវាកំពុងផ្តល់ក្នុងសហគមន៍ និងសេវាដែលកំពុងធ្វើនៅក្នុងមូលដ្ឋានសេវាសុខាភិបាលសាធារណៈ ដើម្បីធ្វើឲ្យប្រសើរឡើងនៃករណី ដែលមានជំងឺរលាកថ្លើមប្រភេទសេ នៅកម្ពុជា។
លោកសាស្ដ្រាចារ្យ បានបន្ដទៀតថា គម្រោងនេះទៀតសោត បានអនុវត្តន៍សម្រេច ៣៨គម្រោងរួចមកហើយ គិតចាប់តាំងពីឆ្នាំ២០០១ រហូតមកដល់សព្វថ្ងៃនេះ ដោយបារាំង បានជួយគាំទ្រទៅដល់ការងារបណ្តុះបណ្តាលធនធានមនុស្ស នៅក្នុងសាកលវិទ្យាល័យវិទ្យាសាស្ត្រសុខាភិបាល ពិសេសសម្រាប់ភ្នាក់ងារជាតិលើជំងឺអេដស៍ និងជំងឺថ្លើមប្រភេទបេ ដែលតំណាងដោយលោកសាស្ត្រាចារ្យ ម៉ម ប៊ុនហេង ដែលបានរៀបចំជាគម្រោង ក្នុងរយៈពេលកន្លងមកនេះ ដើម្បីធ្វើការសិក្សាស្រាវជ្រាវ ទៅលើករណីជំងឺអេដស៍នៅកម្ពុជា។
គួរបញ្ជាក់ថា ក្រោមកិច្ចសហការជាមួយបារាំងកន្លងមកនេះ ក្រសួងសុខាភិបាល ទទួលបាននូវអត្ថប្រយោជន៍ជាច្រើន ក្នុងការប្រើប្រាស់លទ្ធផល ក្នុងការអភិវឌ្ឍនូវគោលនយោបាយ ក៏ដូចជាយុទ្ធសាស្ត្រ និងអន្តរាគមន៍ផ្សេងៗក្នុងការប្រយុទ្ធប្រឆាំងនឹងជំងឺអេដស៍ ពិសេសមជ្ឈមណ្ឌលជាតិអេដស៍ សើរស្បែក និងកាមរោគនៅកម្ពុជា៕
Source: Kampuchea Thmey Daily
0 Comments