ភ្នំពេញ ៖ អ្នកនាំពាក្យក្រសួងអប់រំ យុវជន និងកីឡាបានឲ្យដឹងថា ក្រសួងបានកំណត់ពេលមួយសប្តាហ៍ ដើម្បីឱ្យគណៈកម្មការកោសល្យវិច័យធ្វើការពិនិត្យដោះស្រាយពាក្យបណ្តឹងតវ៉ារបស់សិស្សដែលមិនពេញចិត្តទៅ នឹងលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប)ឆ្នាំ២០១៨។
ការទុកពេលរយៈពេលមួយសប្តាហ៍នេះ បានធ្វើឡើងនៅក្នុងកិច្ចប្រជុំគណៈកម្មការកោសល្យវិច័យកាលពីថ្ងៃទី១២ខែកញ្ញាកន្លងទៅក្រោមអធិបតីភាពលោកបណ្ឌិតសភាចារ្យហង់ជួនណារ៉ុនរដ្ឋមន្ត្រីក្រសួងអប់រំយុវជន និងកីឡា និងជាប្រធានគណៈកម្មការនេះដើម្បីពិនិត្យដោះស្រាយបណ្តឹងតវ៉ារបស់សិស្សដែលមិនពេញចិត្តទៅនឹងលទ្ធផលប្រឡងបាក់ឌុប ឆ្នាំ២០១៨ សម័យប្រឡង៖ ២០ សីហា ២០១៨។
ការបង្កើតគណៈកម្មការកោសល្យវិច័យនេះគឺដើម្បីធ្វើយ៉ាងណាឲ្យបេក្ខជន មាតាបិតា អាណាព្យាបាល ឬអ្នកពាក់ព័ន្ធ ប្រកបដោយវិជ្ជាជីវៈមានជំនឿជឿជាក់ថា ការប្រឡងដំណើរការ ទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបាន។
លោក ឌីខាំ បូលី អ្នកនាំពាក្យក្រសួងអប់រំយុវជន និងកីឡាបានមានប្រសាសន៍កាលពីរសៀលថ្ងៃទី១៣ខែកញ្ញាឆ្នាំ២០១៨ឲ្យដឹងថា ក្រសួងបានទុករយៈពេលមួយសប្តាហ៍គឺចាប់ពីថ្ងៃទី១២ដល់ថ្ងៃទី១៩ខែកញ្ញាឆ្នាំ២ ០១៨ដើម្បីដោះស្រាយពាក្យបណ្តឹងតវ៉ារបស់សិស្សប្រឡងបាក់ឌុបឆ្នាំ២០១៨ឲ្យបានរួចរាល់។
លោកបានបន្តទៀតថា ក្នុងករណីមិនអាចដោះស្រាយបានទាន់ពេលតាមការកំណត់ទេនោះគណៈកម្មការនឹងសម្រេចនៅពេលក្រោយទៀត តែយ៉ាងណាក៏ដោយគណៈកម្មការនឹងខិតខំធ្វើការងារទាំងយប់ទាំងថ្ងៃដោ យមិនមានថ្ងៃឈប់សម្រាកឡើយដើម្បីសម្រេចឲ្យបានទាន់ពេលកំណត់។
លោក ឌីខាំ បូលីបានមានប្រសាសន៍បន្ថែមថា ចាប់តាំងពីថ្ងៃទី១០រហូតមកដល់ម៉ោង១១និង៣០នាទីព្រឹកថ្ងៃទី១២ ខែកញ្ញា ឆ្នាំ២០១៨ ក្រសួងបានទទួលពាក្យបណ្តឹងតវ៉ាពីសិស្សនៅទូទាំងប្រទេសចំនួន៥០០បណ្តឹងក្នុងនោះបណ្តឹងទាក់ទងនឹងមុខវិជ្ជាគណិតវិទ្យាមានច្រើនជាងគេបន្ទាប់មកមានបណ្តឹងមុខវិជ្ជាគីមីវិទ្យា អក្សរសាស្ត្រខ្មែរនិងមុខវិជ្ជាជីវវិទ្យា។
លោកបានបញ្ជាក់ថា ការប្តឹងតវ៉ារបស់សិស្សចំពោះលទ្ធផលប្រឡងនេះមិនមែនជាលើ កទី១នោះទេគឺមានយូរហើយគ្រាន់តែនៅឆ្នាំនេះមានកាបណ្តឹងតវ៉ាច្រើនជាងឆ្នាំមុនៗប៉ុណ្ណោះ។
យុវសិស្ស ឆាយ លីអាន បេក្ខជនមកពីខេត្តកំពតធ្លាប់ទទួលបានមេដាយមាស ទូទាំងប្រទេសឆ្នាំ២០១៨និងទទួលបាននិទ្ទេស Dលើពិន្ទុរួម និទ្ទេស A បីមុខវិជ្ជានិង B បីមុខវិជ្ជាបានអះអាងថាខ្លួនជាសិស្សពូកែធ្លាប់ជាប់ជ័យលាភីមេដាយមាស ប្រាក់ និងសំរិទ្ធិលើវិញ្ញាសារគណិតវិទ្យាទាំងក្នុងនិងក្រៅប្រទេសប៉ុន្តែបែរជាធ្លាក់គណិតវិទ្យាទៅវិញ។
យុវសិស្ស ឆាយ លីអាន បានសំណូមពរឲ្យក្រសួងអប់រំយុវជននិងកីឡាជួយដោះស្រាយបញ្ហានេះឲ្យបានឆាប់ដើម្បីបានដាក់ពាក្យសិក្សាបន្តនៅតាមមហាវិទ្យាល័យនានា។
គួរបញ្ជាក់ថាតាមលទ្ធផលប្រឡងបាក់ឌុបនៅឆ្នាំនេះមានបេក្ខជនប្រឡងជាប់ សរុបចំនួន៧៥ ០៥៩ នាក់ ស្មើនឹង ៦៦. ២១ភាគរយ ក្នុងចំណោមបេក្ខជនចូលរួមប្រឡងសរុបជាង១១ម៉ឺនក្នុងនោះមានបេក្ខជនជាប់និទ្ទេសAចំនួន២៩០នាក់៕
Source: Kampuchea Thmey Daily
0 Comments