កាលពីថ្ងៃព្រហស្បតិ៍ លោកស្រី អ៊ួងសាន ស៊ូជី របស់ប្រទេសមីយ៉ាន់ម៉ា បាននិយាយការពារការជាប់ពន្ធនាគាររបស់អ្នកសារព័ត៌មានរ៉យទ័រពីររូបដែលបានរាយការណ៍អំពីវិបត្តិរ៉ូហ៊ីងយ៉ានៅពេលដែលលោកស្រីបានវាយបកទៅលើការរិះគន់ជាសកលអំពីការកាត់ទោសមួយដែលត្រូវបានគេមើលឃើញជាទូទៅថាជាការប៉ុនប៉ងបំបាត់សេរីភាពសារព័ត៌មាន។
មេដឹកនាំរបស់ប្រទេសនេះបានទទួលស្គាល់ថា ការបង្ក្រាបដ៏ឃោរឃៅទៅលើជនជាតិភាគតិចមូស្លីមអាចត្រូវបានដោះស្រាយបានល្អប្រសើរប៉ុន្តែទទូចថា អ្នកយកព័ត៌មានពីរនាក់នេះត្រូវបានគេប្រព្រឹត្តដាក់យ៉ាងសមរម្យបំផុត។
លោកស្រីបាននិយាយថា “ពួកគេមិនបានជាប់គុកដោយសារពួកគេជាអ្នកសារព័ត៌មានទេប៉ុន្តែដោយសារតែតុលាការបានសម្រេចថា ពួកគេបានរំលោភច្បាប់សម្ងាត់ផ្លូវការ”។
លោក Wa Lone អាយុ៣២ឆ្នាំនិងលោក Kyaw Soe Oo អាយុ២៨ឆ្នាំត្រូវបានដាក់គុកម្នាក់ៗ៧ឆ្នាំកាលពីសប្ដាហ៍មុនពីបទរំលោភលើច្បាប់សម្ងាត់របស់ប្រទេសខណៈពេលដែលបានរាយការណ៍អំពីអំពើឃោរឃៅដែលបានប្រព្រឹត្តក្នុងអំឡុងការបង្ក្រាបរបស់យោធានៅរដ្ឋ រ៉ាក់ឃីន ។
លោកស្រី ស៊ូជី ដែលធ្លាប់ជាជើងឯកការពារសិទ្ធិមនុស្សសកលលោកបានស្ថិតក្រោមសម្ពាធយ៉ាងខ្លាំងដើម្បីឲ្យប្រើកម្លាំងសីលធម៌របស់ខ្លួនក្នុងប្រទេសមីយ៉ាន់ម៉ាដើម្បីការពារអ្នកទាំងពីរ។
លោកស្រីបានថ្លែងក្នុងអំឡុងកិច្ចពិភាក្សាមួយនៅវេទិកាសេដ្ឋកិច្ចពិភពលោកថា “សំណុំរឿងនេះត្រូវបានធ្វើឡើងដោយបើកចំហនៅតុលាការ។ ខ្ញុំគិតថា មិនមាននរណាម្នាក់ត្រូវបានរំខានក្នុងការអានសេចក្ដីសង្ខេបរបស់ចៅក្រមទេ”។
គួរបញ្ជាក់ជាថ្មីថា ប្រតិបត្ដិការបោសសម្អាតដែលដឹកនាំដោយកងទ័ពបានចាប់ផ្តើមកាលពីខែសីហាឆ្នាំ២០១២ហើយបានជំរុញជនភៀសខ្លួនរ៉ូហ៊ីងយ៉ាចំនួន៧០០,០០០នាក់ឲ្យចូលទៅក្នុងប្រទេសបង់ក្លាដែសហើយពួកគេបានរៀបរាប់ព័ត៌មានជាច្រើនអំពីអំពើឃោរឃៅ ការរំលោភ ការសម្លាប់និងការដុតបំផ្លាញដោយប៉ូលិសនិងទាហានមីយ៉ាន់ម៉ា។
ការបង្ក្រាបនោះបានរុញច្រានប្រទេសមីយ៉ាន់ម៉ាឲ្យធ្លាក់ចូលទៅក្នុងការរិះគន់ដ៏ក្ដៅគគុក។
គណៈកម្មាធិការស្វែងរកការពិតរបស់អង្គការសហប្រជាជាតិបានអំពាវនាវឲ្យអគ្គមេបញ្ជាការមីយ៉ាន់ម៉ាលោក Min Aung Hlaing និងឧត្ដមសេនីយ៍ឯកជាច្រើនទៀតត្រូវកាត់ទោសពីបទប្រល័យពូជសាសន៍៕ AFP
Source: Kampuchea Thmey Daily
0 Comments