ភ្នំពេញ ៖ បក្ខពួកក្រុមចោរប្លន់ប្រដាប់អាវុធដ៏សកម្មម្នាក់ ត្រូវបានសមត្ថកិច្ចនគរបាល ក្រសួងមហាផ្ទៃ សហការជាមួយនគរបាលខណ្ឌសែនសុខ ស្រាវជ្រាវតាមចាប់ខ្លួន និងបានបញ្ជូនទៅពន្ធនាគារព្រៃសតាមដីកាបង្គាប់របស់តុលាការនៅថ្ងៃទី១៣ ខែកញ្ញា ឆ្នាំ២០១៨នេះ បន្ទាប់ពីគេបានធ្វើសកម្មភាពប្លន់ចុងក្រោយនៅសង្កាត់ផ្សារដេប៉ូ ខណ្ឌទួលគោក។
ប៉ូលិសបានអោយដឹងថា ៖ ជនសង្ស័យជាចោរប្លន់ដែលបានចាប់ខ្លួនខាងលើមានឈ្មោះ កែវ សារិន ភេទប្រុស អាយុ២៨ឆ្នាំ គ្មានមុខរបរច្បាស់លាស់ មានទីលំនៅម្តុំសង្កាត់បឹងកក់២ ខណ្ឌទួលគោក រាជធានីភ្នំពេញ តែបានមកជួលបន្ទប់ស្នាក់នៅផ្លូវលេខ២០០៤ សង្កាត់កាកាប ខណ្ឌពោធិ៍សែនជ័យ ដែលជាកន្លែងចាប់ខ្លួនគាត់ចុងក្រោយ។
ប៉ូលិសបានបញ្ជាក់ថា ៖ តាមការផ្ទៀងផ្ទាត់ភិនភាគជនសង្ស័យដោយទិន្នន័យរបស់ប្រព័ន្ធកាមេរ៉ាសុវត្ថិភាពនៅកន្លែងកើតហេតុចុងក្រោយ និងនៅកន្លែងកើតហេតុផ្សេងៗទៀត រួមទាំងការឆ្លើយសារភាពរបស់ជនសង្ស័យបានអោយដឹងថា ជនសង្ស័យរូបនេះរួមទាំងបក្ខពួកបានធ្វើសកម្មភាពប្លន់យកម៉ូតូរបស់គេបានសម្រេចចំនួន៣ដងឯណោះ។
តាមចម្លើយសារភាពរបស់គេដែលបានប្លន់ទាំង៣ដងនោះគឺលើទី១ នៅថ្ងៃទី២៦ ខែមិថុនា ឆ្នាំ២០១៨ នៅក្នុងស្ថានីយប្រេងឥន្ធនៈតេលានៅជាប់ផ្លូវលេខ២០១១ភូមិគោកឃ្លាង ខណ្ឌសែនសុខ។ លើកទី២ នៅថ្ងៃទី០១ ខែសីហា ឆ្នាំ២០១៨ នៅក្រោមស្ពានអាកាសមិត្តភាពកម្ពុជា ចិន (សង្កាត់អូរបែកក្អមខណ្ឌសែនសុខ)។ លើកទី៣ នៅថ្ងៃទី ៣០ ខែសីហា ឆ្នាំ២០១៨ នៅផ្លូវព្រះសីហនុ សង្កាត់ផ្សារដេប៉ូ ខណ្ឌទួលគោក។
លោក ថាន់ ឡេង ចៅក្រមស៊ើបសួរ សាលាដំបូង បានចេញដីកាបង្គាប់អោយឃុំខ្លួនជនសង្ស័យឈ្មោះ កែវ សារិន នេះចោទពីបទកំហែងយក មានស្ថានទម្ងន់ទោស តាមដីកាលេខ ៤៩២០ ចុះថ្ងៃទី០៥ ខែកញ្ញា ឆ្នាំ២០១៨ យោងតាមបទល្មើសដែលមានបញ្ញត្តិអោយផ្តន្ទាទោស តាមមាត្រ៣៦៣ និងមាត្រា៣៦៦ នៃក្រមព្រហ្មទណ្ឌ។
ប៉ូលិសមិនបានបញ្ជាក់ថា ម៉ូតូដែលជនសង្ស័យប្លន់បានយកទៅលក់នៅឯណាទេ ហើយក៏មិនបានប្រាប់ពីភិនភាគម៉ូតូ និងអាវុធដែលជនសង្ស័យប្រើប្រាស់នៅក្នុងអំពើប្លន់នោះដែរ៕
Source: Kampuchea Thmey Daily
0 Comments