សៀមរាប ៖ ស្ត្រីម្នាក់ត្រូវជនសង្ស័យស្ទាក់ប្លន់ ដោយប្រើកាំបិតប័ងតោ ខណៈកំពុងរត់ហាត់ប្រាណ នៅលើភ្នំក្រោមតែមិនបានសម្រេចនោះ ក៏មកប្តឹងសមត្ថកិច្ចតាមឃាត់ខ្លួនបានភ្លាមៗផងដែរ។
ហេតុការណ៍នោះ បានកើតឡើងកាលពីព្រឹកថ្ងៃទី១៦ ខែតុលា នៅចំណុច សាលាឆកទានថ្ម ពាក់កណ្តាលភ្នំ តាមផ្លូវឡើងលើខ្នងភ្នំក្រោម ស្ថិតក្នុងភូមិភ្នំក្រោម សង្កាត់សៀមរាប ក្រុងសៀមរាប។
លោក វរសេនីយ៍ឯក សេង វាសនា ប្រធានការិយាល័យនគរបាលការពារបេតិកភណ្ឌ បានឲ្យដឹងថា ជនរងគ្រោះមានឈ្មោះ សុខ ខៀន ភេទស្រី អាយុ៤៨ឆ្នាំ រស់នៅ ភូមិពោធិ៍ក្រោម សង្កាត់សៀមរាប ក្រុងសៀមរាប។ ស្ត្រីរងគ្រោះតែងបានរត់ហាត់ប្រាណជាប្រចាំនៅលើខ្នងភ្នំក្រោម។ រីឯជនសង្ស័យមានឈ្មោះ នុត សំ ហៅ ឃ្លោក អាយុ១៥ឆ្នាំ ទីលំនៅបច្ចុប្បន្ន ភូមិទី៣ សង្កាត់ ចុងឃ្នៀស ក្រុងសៀមរាប។ មានម្ដាយឈ្មោះ ឡម លៀង និងឪពុក ឈ្មោះ នុត សុំ ទីលំនៅបច្ចុប្បន្ន ភូមិទី៣ សង្កាត់ ចុងឃ្នៀស ក្រុងសៀមរាប ខេត្តសៀមរាប។
លោកបន្តថា នៅពេលជនរងគ្រោះរត់ហាត់ប្រានមកដល់ចំនុចខាងលើ ជនសង្ស័យបានធ្វើសកម្មភាពយកកាំបិតប៉ាងតោ មកគំរាម សំឡុតយកប្រាក់ និងខ្សែដៃ ហើយមានការប្រតាយប្រតប់គ្នា បណ្តាលឲ្យជនរងគ្រោះរបួសដៃទាំងពីរ (ស្រាល)។ ជនរងគ្រោះបានរត់ចុះមកក្រោមដើម្បី ប្តឹងសមត្តិកិច្ចដែលនៅប្រចាំការនៅគោលដៅនោះ។
ក្រោយពីទទួលបានពាក្យបណ្តឹងពីជនរងគ្រោះ កំលាំងនគរបាលការពារបេតិកភណ្ឌដែលប្រចាំការនៅតំបន់នោះ បានសហការជាមួយ ប្រជាការពារ និងប៉ុស្តិ៍នគរបាលរដ្ឋបាល ក៏បានឡើងល្បាតតាម ទៅលើភ្នំ តែមិនឃើញ។ប៉ុន្តែដោយជនរងគ្រោះ ធ្លាប់អោយប្រាក់ និងបានស្គាល់ជនសង្ស័យច្បាស់ ទើបសមត្ថកិច្ចតាមចាប់ជនសង្ស័យបាននៅផ្ទះរបស់ខ្លួន ។ ក្នុងគ្រានោះជនសង្ស័យបានយកកាំបិតទៅលាក់ទុកនៅ ចំណុចខាងលិចជ្រុងខាងជើងខឿនប្រាសាទ លើខ្នងភ្នំក្រោម ។ បន្ទាប់ពី កំលាំងជំនាញបានចុះទៅដល់កន្លែងកើតហេតុ ក៏បានបញ្ជូនជនសង្ស័យ និងវត្ថុតាងពាក់ព័ន្ធទៅប៉ុស្តិ៍នគរបាលរដ្ឋបាលសង្កាត់សៀមរាប យកទៅសាកសួរ និងកសាងសំណុំរឿងតាមនីតិវិធី៕
Source: Kampuchea Thmey Daily
0 Comments