រដ្ឋមន្ត្រីក្រសួងយុត្តិធម៌បាននិយាយកាលពីថ្ងៃសៅរ៍ថាប្រទេសរ្វ៉ាន់ដាបានសម្រេចចិត្តដោះលែងមេដឹកនាំគណបក្សប្រឆាំងលោកស្រី Victoire Ingabire ដែលជាប់ពន្ធនាគាររយៈពេល១៥ឆ្នាំបន្ទាប់ពីលោកប្រធានាធិបតី Paul Kagame ប្រើអំណាចរបស់គាត់ដើម្បីផ្តល់ការត្រាប្រណី។
ក្រសួងមហាផ្ទៃបាននិយាយនៅក្នុងសេចក្តីថ្លែងការណ៍មួយថា លោកស្រី Ingabire ដែលដឹកនាំគណបក្សប្រឆាំង FDU-Inkingi ដែលមិនបានចុះបញ្ជីគឺនឹងត្រូវបានដោះលែងរួមជាមួយអ្នកទោសដទៃទៀតរួមទាំងតារាចម្រៀង Kizito Mihigo ផងដែរដែលជាប់ពន្ធនាគារក្នុងឆ្នាំ២០១៥សម្រាប់ការប៉ុនប៉ងសម្លាប់លោកប្រធានាធិបតី Paul Kagame ។
រដ្ឋមន្ត្រីក្រសួងយុត្តិធម៌ Johnston Businge បានប្រាប់រ៉យទ័រតាមទូរសព្ទថា “មិនមានអ្វីទាក់ទងនឹងនយោបាយទេអំពីការដោះលែងរបស់លោកស្រីហើយក៏មិនមានអ្វីពាក់ព័ន្ធនឹងនយោបាយដែរអំពីការជាប់ឃុំរបស់នាង”។
នៅពេលត្រូវបានស្នើសុំឲ្យធ្វើអត្ថាធិប្បាយ លោកបាននិយាយថា “លោកប្រធានាធិបតីបានផ្តល់សេចក្ដីមេត្ដាករុណាហើយនៅក្រោមរដ្ឋធម្មនុញ្ញ គាត់ត្រូវបានអនុញ្ញាតឲ្យធ្វើដូច្នេះ”។ លោកបន្ថែមថា លោកស្រីបានស្នើសុំការមេត្តាចំនួនពីរលើករួចមកហើយកាលពីអតីតកាលរួមទាំងលើកចុងក្រោយនៅក្នុងខែមិថុនាផងដែរ។
ពេលវេលានៃការដោះលែងលោកស្រី Ingabire មិនទាន់ច្បាស់លាស់ភ្លាមៗនោះទេប៉ុន្តែមន្ត្រីនិងមេធាវីបាននិយាយថា វានឹងកើតឡើងនៅថ្ងៃសៅរ៍។
លោក Kagame ត្រូវបានគេសរសើរចំពោះការងើបឡើងវិញនៃសេដ្ឋកិច្ចរបស់ប្រទេសរ្វ៉ាន់ដាបន្ទាប់ពីរបបប្រល័យពូជសាសន៍ឆ្នាំ១៩៩៤ប៉ុន្តែអ្នករិះគន់និយាយថា គាត់បានបំបិទសិទ្ធិសេរីភាពប្រព័ន្ធផ្សព្វផ្សាយនិងអ្នកប្រឆាំង។
ទោះបីជាយ៉ាងណាក៏ដោយ ការិយាល័យរបស់គាត់មិនអាចទាក់ទងបានភ្លាមៗទេ។
លោកស្រី Ingabire ត្រូវបានកាត់ទោសឲ្យជាប់ពន្ធនាគាររយៈពេល១៥ឆ្នាំនៅក្នុងឆ្នាំ២០១២ពីបទរួមគំនិតបង្កើតក្រុមប្រដាប់អាវុធមួយដើម្បីធ្វើឲ្យប៉ះពាល់ដល់រដ្ឋាភិបាលនិងព្យាយាមសម្រាលសភាពការណ៍នៃអំពើប្រល័យពូជសាសន៍ឆ្នាំ១៩៩៤។
លោកស្រីបានវិលត្រឡប់មកពីការនិរទេសខ្លួននៅឯប្រទេសហូឡង់ដើម្បីចូលរួមប្រកួតប្រជែងការបោះឆ្នោតប្រធានាធិបតីកាលពីខែមករាឆ្នាំ២០១០ប៉ុន្តែត្រូវបានហាមឃាត់ពីការឈរឈ្មោះបន្ទាប់ពីត្រូវបានចោទប្រកាន់ពីបទបដិសេធ អំពើប្រល័យពូជសាសន៍៕ REUTERS
Source: Kampuchea Thmey Daily
0 Comments