​ក្រុមបាល់ទាត់​ជម្រើសជាតិ​កម្ពុជា បាន​បន្ត​បរាជ័យ​ក្នុង​វគ្គ​ជម្រុះ​ពូ​ល A នៃ​ពានរង្វាន់ AFF Suzuki Cup 2018 ក្រោយ​ចាញ់​ក្រុម​ម្ចាស់ផ្ទះ​មី​យ៉ាន់​ម៉ា ដោយ​លទ្ធផល​៣​ទល់​១ នៅ​ល្ងាច​ថ្ងៃ​ច័ន្ទ ទី​១២ ខែវិច្ឆិកា ឆ្នាំ​២០១៨ ថ្មីៗ​នេះ​លើ​ទីលាន​កីឡដ្ឋាន​Mandalarthiri Stadium ក្នុង​ទីក្រុង​Mandalay ប្រទេស​មី​យ៉ាន់​ម៉ា​។



លោក​Félix Agustín González Dalmás ដែលជា​គ្រូបង្វឹក​ក្រុម​ជម្រើសជាតិ​កម្ពុជា បានបង្ហាញ​ទស្សនៈ​របស់​ខ្លួន​ក្រោយ​ចប់​ការប្រកួត​ថា «​នៅ​វគ្គ​ទី​១​យើង​លេង​បានល្អ រហូត​នាំមុខ​មួយ​គ្រាប់​មុន​ប៉ុន្តែ​ចូល​វគ្គ​ទី​២​យើង​ក៏​នៅតែ​លេង​បាន​ល្អ​ដែរ​។ ​យើង​របូត​គ្រាប់​បាល់​ដោយសារ​ក្រុម​គូប្រជែង​ចាប់​ឱកាស​បាន​ពេល​យើង​កំពុង​ធ្លាក់ចុះ​កម្លាំង​។ យើង​មាន​ហេតុផល​សម្រាប់​ការប្រកួត ពេល​យើង​ចាញ់​តែ​វា​គឺជា​ឱកាស សម្រាប់​អ្នកលេង​ម្នាក់ ដែល​គ្មាន​គ្រូ គ្មាន​ជំនាញ តែ​មាន​ការប្រឹងប្រែង​យ៉ាងពិត​ប្រាកដ​…​។ យើង​នៅតែ​សង្ឃឹមថា ប្រកួត​ក្រោយៗ យើង​នឹង​ទទួល​បាន​ជ័យជម្នះ​»​។



ពានរង្វាន់ AFF Suzuki Cup 2018 ឆ្នាំនេះ​ពូ​ល A មាន​វៀតណាម ម៉ាឡេស៊ី មី​យ៉ាន់​ម៉ា កម្ពុជា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​បឋម​គឺ​ទី​ម័​រ​ខាងកើត​។ តាម​គម្រោងការ​វគ្គ​ជម្រុះ​តាម​ពូ​ល​នេះ​នឹងធ្វើ​ឡើង​ចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨​។ ព្រឹត្តិការណ៍​ទាំងមូល​នេះ​នៅ​កម្ពុជា គឺ​ទទួល​សិទ្ធិ​ផ្សាយ​ផ្ទាល់​ដោយ​ប៉ុស្តិ៍ BTV News ផងដែរ​។



​សម្រាប់​កម្មវិធី​ប្រកួត​ជម្រុះ​ពូ​ល A របស់​ក្រុម​កម្ពុជា ប្រកួត​បើកឆាក​ចាញ់​ក្រុម​ម៉ាឡេស៊ី ១​ទល់​០ នៅ​ថ្ងៃទី​៨ ខែវិច្ឆិកា មុន​បន្ត​ចាញ់​ក្រុម​ប៉ះ​ម្ចាស់ផ្ទះ​មី​យ៉ាន់​ម៉ា ៤​ទល់​១ នៅ​ថ្ងៃទី​១២ ខែវិច្ឆិកា នេះ​។ សម្រាប់​ប្រកួត​បន្ទាប់​គឺ​ត្រូវ​ធ្វើ​ឡើង​នៅ​ថ្ងៃទី​២០ ខែវិច្ឆិកា ដោយ​ក្រុម​កម្ពុជា ត្រូវ​ប៉ះ​ឡាវ នៅ​រាជធានី​ភ្នំពេញ និង​នៅ​ថ្ងៃទី​២៤ ខែវិច្ឆិកា ត្រូវធ្វើ​ដំណើរ​ទៅ​ប៉ះ​ម្ចាស់ផ្ទះ​វៀតណាម នៅ​ទីក្រុង​ហាណូយ ដែល​ជា​ប្រកួត​ចុងក្រោយ​ប្រចាំ​វគ្គ​ជម្រុះ​តាម​ពូ​ល​នេះ​៕



Source: Kampuchea Thmey Daily