ភ្នំពេញ ៖ នៅទីស្ដីការ ក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាសេវាទីប្រឹក្សា នៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ រវាងក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេស Dohwa Engineering Co., Ltd ។
ពិធីនេះប្រព្រឹត្តឡើង កាលពីថ្ងៃពុធ ៤រោច ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ខែធ្នូ ឆ្នាំ២០១៨ ដោយមានការចូលរួមពីថ្នាក់ដឹកនាំក្រសួងសាធារណការ និងដឹកជញ្ជូន និងតំណាង Dohwa Engineering Co., Ltd ជាច្រើនរូបផងដែរ។
សូមជម្រាបជូនថា រាជរដ្ឋាភិបាលកម្ពុជាបានទទួលឥណទានពីធនាគារ នីហរ័ណ អាហរ័ណ កូរ៉េ សម្រាប់ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ដែលមានចំនួនទឹកប្រាក់ប្រមាណជាង ៦៣ លានដុល្លារសហរដ្ឋអាមេរិក ដើម្បីសាងសង់ស្ថានីយប្រព្រឹត្តកម្មទឹកកខ្វក់ ដែលមានសមត្ថភាពចម្រោះទឹក បាន ៧៦០០ម៉ែត្រគីបក្នុងមួយថ្ងៃ និងសាងសង់ស្ថានីយបូមទឹកចំនួន ១០ទីតាំង ដែលមានសមត្ថភាពអាចបូមបាន ២៩៩៥២ម៉ែត្រគីប ក្នុងមួយថ្ងៃ សាងសង់បណ្តាញលូ ស្តារស្ទឹងប្រវែង ១៦,៣គីឡូម៉ែត្រ និងស្តារ ស្ថានីយបូមទឹកដែលមានស្រាប់ផងដែរ។
នាឱកាសនោះ លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ការចុះអនុស្សរណៈ នៃការយោគយល់នេះធ្វើឡើងក្នុងគោលបំណងធ្វើឲ្យប្រសើរឡើងនូវស្ថានភាពសុខុមាលភាព និងអនាម័យប្រជាពលរដ្ឋ តាមរយៈការសាងសង់ ស្ថានីយប្រព្រឹត្តកម្មដែលមានសមត្ថភាពគ្រប់គ្រាន់ក្នុងការច្រោះទឹកកខ្វក់ពីតាមផ្ទះប្រជាពលរដ្ឋ លើកកម្ពស់បរិស្ថានដោយការបង្កើតប្រព័ន្ធបណ្តាញលូ និងការតភ្ជាប់បណ្តាញលូពីផ្ទះប្រជាពលរដ្ឋមកកាន់ ស្ថានីយប្រព្រឹត្តកម្ម ព្រមទាំងអាចការពារទឹកជំនន់ផងដែរ៕
Source: Kampuchea Thmey Daily
0 Comments