ប្រដាល់ ៖ អ៊ូច ធារិទ្ធ អ្នកប្រដាល់ជើងខ្លាំងស្រករក្រោយ បានចំណាយពេលមិនដល់មួយទឹកទេ ផ្ដួលអ្នកប្រដាល់ថៃ បូវី ព្រហ្មថានចៃ (Bovi Phrumthanchai ) ឲ្យបោះបង់ចោលការប្រកួតក្នុងទឹកទី១នៅក្នុងការជួបប្រកួតគ្នាក្នុងកម្មវិធីប្រដាល់គូបូតា ជាលក្ខណៈមិត្តភាពអន្តរជាតិ លើសង្វៀនបាយ័នស្ទឹងមានជ័យ កាលពីយប់ថ្ងៃទី១៩ ខែមេសា ឆ្នាំ២០១៩។
ស្ថានភាពប្រកួតពេលនោះ បូវី ព្រហ្មថានចៃ ត្រូវម៉ឺន មេឃា ទាត់ឲ្យដួលលើរេញដល់ទៅ៣លើក និងត្រូវអាជ្ញាកណ្ដាលរាប់៨២លើក ហើយដួលលើកទី៣ អាជ្ញាកណ្ដាលក៏សម្រេចបញ្ឈប់លែងឲ្យប្រកួតតែម្តង។ នេះជាលើកទី២ហើយ ដែល អ៊ូច ធារិទ្ធ ផ្ដួលថៃឲ្យបោះបង់ចោលការប្រកួតក្នុងទឹកទី១នោះ។
កាលពីជួបប្រកួតជាមួយថៃលើកចុងក្រោយមុនថ្ងៃចូលឆ្នាំនោះ (១៣មេសា២០១៩) អ៊ូច ធារិទ្ធ គេបានផ្តួលយកឈ្នះអ្នកប្រដាល់ថៃ ផេតវីមុត (Petchvimutti) ក្នុងទឹកទី១ដែរ។
ចំពោះ លី រិទ្ធី អ្នកប្រដាល់ជើងថ្មី មកពីក្លិបមីស្ទ័រលីគុនខ្មែរខេត្តសៀមរាប ត្រូវអ្នកប្រដាល់ថៃ តាគួនសិង្ហា ថ.ចតុថេន ( Takunsingha Thor.Jatutan) ផ្តួលឲ្យបោះបង់ចោលការប្រកួតក្នុងទឹកទី៣។ ពីរនាក់នេះ ប្រកួតគ្នាក្នុងទម្ងន់៧១គីឡូក្រាម។
តាគួនសិង្ហា ជាអ្នកប្រដាល់ជើងខ្លាំងជើងចាស់ ដែលមានបទពិសោធន៍លើរេញច្រើន និងធ្លាប់វាយឈ្នះចាញ់ជាមួយជើងខ្លាំងៗរបស់កម្ពុជាច្រើននាក់មកហើយ។ ដូច្នេះ រឿងអីដែលលី រិទ្ធី អ្នកប្រដាល់ជើងថ្មីរបស់កម្ពុជាយើង ទប់ទល់ជាមួយបាននោះ។
តែយ៉ាងណាលី រិទ្ធីនេះ គេឡើងប្រកួតជំនួសវង្ស ណយ ដែលគេផ្គូអោយជួបតាគួនសិង្ហានេះ ប៉ុន្តែដោយសារវង្ស ណយ គេមានសុខភាពមិនល្អ ឈឺក្រពះ មិនអាចឡើងប្រកួតបាននោះ ក៏សាកឲ្យលី រិទ្ធី ឡើងប្រកួតជំនួសទៅ។
ដោយឡែក សម្រាប់ការប្រកួតរវាងអ្នកប្រដាល់រួមជាតិវិញ ជន សាវុធ អ្នកប្រដាល់ក្លិបកងពលដឹកជញ្ជូនលេខ៩០ ដែលឡើងប្រកួតសងសឹកម៉ន វ៉ាន្នី ក្លិបការិយាល័យទី៥ កងទ័ពជើងគោក នោះ គឺសងសឹកមិនបានសម្រេចនោះឡើយ ដោយវាយចាញ់ពិន្ទុម៉ន វ៉ាន្នី ទៀត។
ចំណែក មិត្ត ស៊ីណាត អ្នកប្រដាល់ក្លិបអាវុធហត្ថស្រុករុក្ខគិរី ដែលមកពីខេត្តបាត់ដំបងនោះ បានវាយឈ្នះឌីន ថៃណា អ្នកប្រដាល់ក្លិបយុវវាលស្បូវខណ្ឌច្បារអំពៅ ដោយពិន្ទុ ហើយជុំ មានអ្នកប្រដាល់ក្លិបអាណាចក្រគុនខ្មែរ បានវាយឈ្នះ សំណាង សុខនឿន អ្នកប្រដាល់ក្លិបកងចក្ររាជសីហ៍មានរិទ្ធ ដោយពិន្ទុដែរ បន្ទាប់ពីប្រកួតគ្នា៥ទឹកពេញនោះ៕
Source: Kampuchea Thmey Daily
0 Comments