សៀមរាប ៖ គណៈកម្មាធិការជាតិអូឡាំពិកកម្ពុជានិងសហភាពសហព័ន្ធយុវជនកម្ពុជានឹងរៀបចំការប្រកួតអុក(ចត្រង្គ) ដើម្បីដណ្ដើមពានរង្វាន់សម្ដេចអគ្គមហាសេនាបតីតេជោហ៊ុន សែន លើកទី២ ឆ្នាំ២០១៥ នៅខេត្តសៀមរាប។
ការរៀបចំប្រកួតអុកនេះ គឺដើម្បីអបអរអង្គរសង្ក្រាន្ត ឆ្នាំ២០១៥ ដែលផ្ដួចផ្ដើមដោយលោកហ៊ុន ម៉ានី ប្រធានសហភាពសហព័ន្ធយុវជនកម្ពុជាដែលនឹងធ្វើនៅអំឡុងខែមេសាមុនបុណ្យចូលឆ្នាំថ្មីប្រពៃណីខ្មែរនោះ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា ឆ្នាំនេះការរៀបចំខុសពីឆ្នាំមុន ដោយមិនកំណត់ចំនួនអ្នកចូលរួមត្រឹម៦៤នាក់ដូចមុននោះទេ គឺបើកទូលាយទាំងប្រុស ទាំងស្រី ចាប់ពីអាយុ៨ឆ្នាំឡើងទៅ ប៉ុន្តែនៅក្នុងការប្រកួតជម្រុះដែលធ្វើនៅភ្នំពេញនេះ គឺជ្រើសរើសយកអ្នកខ្លាំងតែចំនួន៨នាក់ប៉ុណ្ណោះ ដើម្បីទៅប្រកួតវគ្គ៨នាក់ចុងក្រោយ វគ្គពាក់កណ្ដាលផ្ដាច់ព្រ័ត្រនិងវគ្គផ្ដាច់ព្រ័ត្រនៅមុនប្រាសាទអង្គរវត្ត ខេត្តសៀមរាបនោះ។
តាមគណៈកម្មាធិការរៀបចំបានឲ្យដឹងថា ការប្រកួតនេះចែកចេញជា២ដំណាក់កាល គឺដំណាក់កាលទី១-ការប្រកួតចាប់ផ្ដើមពីខែមិនាទៅនោះគឺជាដំណាក់កាលប្រកួតជម្រុះ ដែលការប្រកួតនេះធ្វើនៅពហុកីឡដ្ឋានជាតិ ដែលការប្រកួតនេះធ្វើតាមរូបមន្តជម្រុះ។
ការដាក់ពាក្យចូលរួមប្រកួតនឹងចាប់ផ្ដើមពីខែកុម្ភៈតទៅចំពោះរង្វាន់ដែលរៀបចំដោយគណៈកម្មាធិការជាតិអូឡាំពិកនោះ សម្រាប់លេខ១បាន៣.០០០ដុល្លារ លេខ២បាន២.០០០ដុល្លារ លេខ ៣បាន១.០០០ដុល្លារ និងលេខ៤បានរង្វាន់លួងចិត្ត៥០០ដុល្លារ។ អុកមានប្រភពដើមពីប្រទេសឥណ្ឌាដែលបង្ហាញតាមរយៈរឿងមហាភារតៈ ដែលរឿងនេះមានតាំងពី៤.០០០ឆ្នាំមុនគ្រិស្ដសករាជម្ល៉េះ។ អុកបានចូលមកប្រទេសកម្ពុជាតាមរយៈពាណិជ្ជករឥណ្ឌានាសតវត្សទី១។ នៅប្រាសាទសំបូរព្រៃគុហ៍ នាខេត្តកំពង់ធំមានប្រសាទមួយឈ្មោះថាប្រាសាទអុក ដែលនេះជាភស្តុតាងបន្ថែមលើភស្តុតាងដែលមាននៅអង្គរវត្ត និងប្រាសាទដទៃទៀត។
ល្បែងអុកឬចត្រង្គ គឺជាល្បែងល្បងប្រាជ្ញាមួយប្រភេទ ដែលបង្ហាញពីយុទ្ធវិធីក្នុងការរៀបចំក្បួន បញ្ជា ទប់ទល់ វាយប្រហារជាមួយសត្រូវ ពិសេសចេះពីរបៀបគ្រប់គ្រងដឹកនាំវាយលុក ឬដកថយតាមក្បួនយុទ្ធសាស្ត្រ។ ល្បែងអុកឬចត្រង្គនេះ គឺវាជាព្រលឹងអត្តសញ្ញាណជាតិ និងជាព្រលឹងវប្បធម៌មួយយ៉ាងពេញនិយមតាំងពីសម័យអង្គរ។
តាមលោក ឯម ហៀង ដែលជាគណៈកម្មាធិការរៀបចំការប្រកួតធ្លាប់បានអះអាងឲ្យដឹងថា តាមបទបញ្ជាប្រកួតការប្រកួតធ្វើឡើងតាមរូបមន្តជម្រុះ ហើយនៅពេលប្រកួតកីឡាករគ្រប់ៗរូប ឲ្យតែកាន់គ្រាប់អុកណាហើយ ត្រូវតែដើរគ្រាប់អុកនោះ បើមិនព្រមត្រូវកំណត់ឲ្យចាញ់ដោយស្វ័យប្រវត្តិ។ នៅពេលប្រកួតនេះដែរ បើកីឡាករ-កីឡាការិនីរូបណាចង់ប្ដូរទីតាំងគ្រាប់អុកខុសបទបញ្ជានិងក្បួនច្បាប់នៃល្បែងអុកខ្មែរ(ដើរច្រឡំក្រឡា)នោះ អាជ្ញាកណ្ដាលអនុញ្ញាតឲ្យយកគ្រាប់អុកនោះមកដាក់ចំក្រឡាវិញ តែត្រូវទទួលការព្រមានលើកទី១។ តែបើមានកំហុសលើកទី២នឹងត្រូវកំណត់ឲ្យចាញ់ដោយស្វ័យប្រវត្តិ។ ពេលប្រកួតនេះដែរ បើកីឡាករ-កីឡាការិនីរូបណាបានប្ដូរទីតាំងគ្រាប់អុកដាក់ចំក្រឡាត្រឹមត្រូវតាមបទបញ្ជានៃល្បែងអុកខ្មែរហើយ បានលាម្រាមដៃចេញពីគ្រាប់អុកនោះ គឺត្រូវចាត់ទុកថាបានការ តែមិនអនុញ្ញាតឲ្យប្ដូរទីតាំងគ្រាប់អុកនោះម្ដងទៀតទេ។ គ្រាប់អុកដែលមានឈ្មោះថា នាង និង ខុន ចាប់ចេញដំណើរប្ដូរទីតាំងលើកដំបូងដើរបាន២ក្រឡា។ ការប្រកួតមានរយៈពេល៦០នាទី។ គួរបញ្ជាក់ថា ការប្រកួតអុកអង្គរសង្ក្រាន្តឆ្នាំ២០១៤កន្លងមក ជើងឯកគឺបានទៅកីឡាករ ឈៀវ បូរ៉ា លេខ២ កីឡា គ្រួច ចន្ថារិទ្ធលេខ៣ កីឡាករសូ សុភី និងលេខ ៤ កីឡាករកែវ វឌ្ឍនា៕
វិសិទ្ធ
0 Comments