សៀមរាប ៖ នៅរសៀលថ្ងៃទី១៧ ខែមករា ឆ្នាំ២០១៥កន្លងមក មានការប្រកួតកីឡាបាល់បោះ ក្រោមអធិបតីភាពរបស់លោក ឃឹម ប៊ុនសុង អភិបាលខេត្តសៀមរាប បានដណ្ដើមពានរង្វាន់សៀមរាបផ្ទះខ្ញុំលើកទី១-រដូវកាលឆ្នាំ២០១៤-២០១៥ ត្រូវបានបើកឲ្យដំណើរការជាផ្លូវការនៅវិទ្យាល័យ ១០មករា១៩៧៩។ ការរៀបចំបើកការប្រកួតនេះ គឺស្ថិតក្រោមកិច្ចសហការរវាងសហភាពសហព័ន្ធយុវជនកម្ពុជា(ខេត្តសៀមរាប) ជាមួយសមាគមកីឡាបាល់បោះខេត្តសៀមរាប ដោយមានការគាំទ្រផងដែរពីសំណាក់មន្ទីរអប់រំយុវជននិងកីឡា។
លោក ទៀ ទីហា ប្រធានសហភាពសហព័ន្ធយុវជនកម្ពុជា(ខេត្តសៀមរាប) បានគូសបញ្ជាក់ថា ការប្រកួតកីឡាបាល់បោះដណ្ដើមពានរង្វាន់សៀមរាបផ្ទះខ្ញុំ គឺត្រូវបានស្ថិតក្រោមប្រធានបទ កីឡាដើម្បីសុខភាព។ លោកក៏បានបង្ហាញឲ្យដឹងបន្ថែមទៀតថា នេះគឺជាប្រធានបទថ្មីនៅក្នុងយុទ្ធនាការសៀមរាបផ្ទះខ្ញុំ ដែលបានបង្កើតឡើងដោយសហភាពសហព័ន្ធយុវជនកម្ពុជា(ខេត្តសៀមរាប) ដែលក្នុងនោះរួមមាន ប្រធានបទទី១-គឺសំអាតក្រុងសៀមរាបដើម្បីសោភ័ណភាព បរិស្ថាន និងអនាម័យ។ ប្រធានបទទី២-ដាំកូនឈើដើម្បីរួមចំណែកជំរុញចលនាទេសចរណ៍បៃតង កសាងភាពបន្សាំទៅនឹងការប្រែប្រួលអាកាសធាតុ។ ប្រធានបទទី៣-ចូលរួមសកម្មភាពបំផុសចលនាការពារសុវត្ថិភាពចរាចរណ៍ និងប្រធានបទថ្មីទី៤នេះកីឡាដើម្បីសុខភាព។
លោកអភិបាលខេត្តសៀមរាប ( ឃឹម ប៊ុនសុង )បានថ្លែងនូវការកោតសរសើរចំពោះសហភាពសហព័ន្ធយុវជនកម្ពុជា(ខេត្តសៀមរាប) ដែលមានស្មារតីទទួលខុសត្រូវខ្ពស់ក្នុងការរិះរក កសាងចលនាសកម្មភាពដើម្បីផលប្រយោជន៍សង្គមជាតិដែលជាពិសេសនោះ បានធ្វើឲ្យយុវជន យុវនារីកម្ពុជាបានយល់កាន់ច្បាស់អំពីតម្លៃរបស់ខ្លួន ក្នុងនាមជាធនធានមនុស្សដែលមិនអាចខ្វះបាននៅក្នុងចលនាអភិវឌ្ឍន៍ប្រទេស។
លោកបានសង្កត់ធ្ងន់ថា ប្រធានបទទាំង៤ខាងលើនេះគឺសុទ្ធតែមានសារសំខាន់ ដែលមិនត្រឹមតែបានផ្តល់នូវការចែករំលែកពុទ្ធិសម្រាប់យុវវ័យឲ្យស័ក្តិសមជាអនាគតទំពាំងស្នងឫស្សីប៉ុណ្ណោះទេ។ តែប្រធានបទទាំងនេះ ត្រូវបានបង្កឱកាសឲ្យយុវជន យុវនារី បាននឹងកំពុងធ្វើសកម្មភាពជាក់ស្តែង ចម្រាញ់យកបានជាបទពិសោធន៍ល្អៗ ដើម្បីគុណភាពនៃបន្តវេនរបស់យុវជនជំនាន់ក្រោយៗទៀតផងដែរ។ លោកបានសម្ដែងនូវការគាំទ្រយ៉ាងពេញទំហឹងចំពោះប្រធានបទទាំង៤ខាងលើ និងបានបង្ហាញនូវក្តីសង្ឃឹមផងដែរថា តទៅខាងមុខទៀតសហភាពសហព័ន្ធយុវជនកម្ពុជា(ខេត្តសៀមរាប) នឹងបានបង្កើតឡើងនូវប្រធានបទថ្មីៗបន្តទៀតដើម្បីរួមចំណែកជាមួយរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រីក្នុងដំណើរឆ្ពោះទៅវឌ្ឍនភាពនៃសង្គមជាតិ។
ជាមួយនឹងការបើកដំណើរការជាផ្លូវការ ការប្រកួតកីឡាបាល់បោះដណ្ដើមពានរង្វាន់ សៀមរាបផ្ទះខ្ញុំលើកទី១-សម្រាប់រដូវកាលឆ្នាំ២០១៤-២០១៥នេះ គណៈកម្មាធិការរៀបចំការប្រកួតបានឲ្យដឹងថា ការប្រកួតនេះត្រូវបានធ្វើឡើងក្នុង១សប្ដាហ៍ម្តងជារៀងរាល់ថ្ងៃសៅរ៍។ មកដល់ថ្ងៃសៅរ៍ ទី១៧ ខែមករា ឆ្នាំ២០១៥ ដែលជាថ្ងៃបើកដំណើរការជាផ្លូវការនេះ ការប្រកួតបានឈានមកដល់សប្ដាហ៍ទី៤ហើយរបស់ក្រុមកីឡាករបាល់បោះទាំង៦ក្រុមដែលបានចូលរួមប្រកួត។ របាយការណ៍ប្រកួតបានឲ្យដឹងថា ក្នុងរយៈពេល៣សប្ដាហ៍នៃការប្រកួតកន្លងមក ក្នុងក្រុមនិមួយៗ បានឆ្លងកាត់ចំនួន៣ប្រកួតរួចមកហើយ។ ជាលទ្ធផលក្រុម SR Reapers ដណ្ដើមបានពិន្ទុខ្ពស់ជាងគេគឺមាន៦ពិន្ទុនៅក្នុងដៃសម្រាប់ឆ្ពោះទៅការប្រកួតសន្សំពិន្ទុបន្តទៀត។ ក្រុមAngkoriansទទួលបានពិន្ទុ៥។ ក្រុមAngkor Youth ដណ្ដើមបាន៥ពិន្ទុ ស្មើនឹងក្រុម Angkorians ចំណែកឯក្រុមSiemreap Titans ទទួលបាន ៤ពិន្ទុ ហើយក្រុម Dooxy SR ជាក្រុមបាតតារាងទទួលបាន៣ពិន្ទុ៕
គឿន វេត
0 Comments