កំពង់ធំ ៖ សាលាស្រុកស្ទោងបានរៀបចំសិក្ខាសាលាសមាហរណកម្មផែនការថ្នាក់ស្រុកក្រោមអធិបតេយ្យភាព លោក គង់ វិមាន អភិបាលរងខេត្តកំពង់ធំ លោក ព្រឹម រដ្ឋា អភិបាលស្រុកស្ទោង ដោយមានការចូលរួមពីមន្ត្រីនៃមន្ទីរផែនការខេត្ត លោកមេភូមិ មេឃុំ ព្រមទាំងមន្ត្រីនានាជុំវិញស្រុកស្ទោង ប្រមាណជាង១០០នាក់ កាលពីព្រឹកថ្ងៃទី៨ ខែមករា ឆ្នាំ២០១៥។
លោក ព្រឹម រដ្ឋា អភិបាលស្រុកស្ទោង បានអានសុន្ទរកថា និងរបាយការណ៍សង្ខេបស្ដីពីផែនការថ្នាក់ស្រុក ក៏ដូចជារដ្ឋបាលថ្នាក់ក្រោមជាតិត្រូវអនុវត្តន៍ក្នុងគោលដៅអភិវឌ្ឍន៍សេដ្ឋកិច្ច រចនាសម្ព័ន្ធ សេវាសាធារណៈ ក្នុងភូមិ ឃុំ ស្រុក ខេត្ត ក្រុង ក្នុងគោលដៅបំបាត់ភាពក្រីក្រនៅកម្ពុជាក្រោមការយកចិត្តទុកដាក់របស់រាជរដ្ឋាភិបាល ក្នុងនោះមានដូចជា ធនធានធម្មជាតិ និង បរិស្ថាន ផ្នែកសេវាកម្ម រដ្ឋបាល និងសន្តិសុខ, ផ្នែកយេនឌ័រ ,ផ្នែកសេដ្ឋកិច្ច ផ្នែកសង្គមកិច្ច។
លោក គង់ វិមាន អភិបាលរងខេត្តកំពង់ធំបានមានប្រសាសន៍ស្ដីពីការអភិវឌ្ឍន៍ ហត្ថារចនាសម្ព័ន្ធនានាក្នុងស្រុកស្ទោង ដោយមានជារួម គឺការជួសជុលប្រព័ន្ធប្រឡាយទឹក ស្តាប្រឡាយទឹក ការបង្កើតប្រព័ន្ធប្រឡាយថ្មី ការបង្កើតធារាសាស្ត្រ ទំនប់ទឹកដែលអូសចេញពីទំនប់មេ៣០កញ្ញា សម្រាប់ធ្វើស្រែប្រាំង គម្រោងនៃការនាំអង្ករចេញរបស់រាជរដ្ឋាភិបាល ការជួសជុលស្ពានចាស់ និងសាងសង់ស្ពានថ្មី ផ្លូវជាតិ ផ្លូវបេតុង ផ្លូវគ្រួសក្រហមទៅតាមភូមិ ឃុំ ស្រុក និងទីជនបទ ព្រមទាំង ការបញ្ចុះតំលៃភ្លើងអគ្គិសនីឲ្យនៅក្នុងតំលៃសមរម្យដែលប្រជាពលរដ្ឋអាចទទួលយកបាន។ ជាចុងក្រោយលោកបានក៏បានកោតសរសើរដល់ថ្នាក់ដឹកនាំស្រុក និងមន្ត្រីរាជការជុំវិញស្រុកដែលបានសហការគ្នាអនុវត្តន៍ការងារកន្លងមកទទួលបានលទ្ធផលល្អ ព្រមទាំងផ្ដាំផ្ញើឲ្យមានការសម្របសម្រួលចាប់ពីថ្នាក់ភូមិ ឃុំ ស្រុក ខេត្ត ក្នុងការអនុវត្តន៍ការងារក្នុងកម្មវិធីវិនិយោគនេះឲ្យបានទទួលជោគជ័យ៕
ដោយ ប៊ុន រដ្ឋា
0 Comments