ព្រះសីហនុ ៖ ដោយមានការចង្អុលបង្ហាញ និងបទបញ្ជាពីលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុក្នុងការទប់ស្កាត់បង្ក្រាបបទល្មើសគ្រប់ប្រភេទ ជាពិសេសបញ្ហាគ្រឿងញៀន ដើម្បីរក្សាសន្តិសុខ សណ្ដាប់ធ្នាប់សាធារណៈជូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិមកលេងកំសាន្តនៅខេត្តព្រះសីហនុ។
នៅព្រឹកថ្ងៃទី១០ ខែមករា ឆ្នាំ២០១៥ វេលាម៉ោង៩ និង២០នាទី កម្លាំងរាជអាវុធហត្ថខេត្តព្រះសីហនុ ដឹកនាំដោយលោក កែវ សុផល ប្រធានមន្ទីរស្រាវជ្រាវ និងយុត្តិធម៌នៃកងរាជអាវុធហត្ថខេត្តព្រះសីហនុបានដឹកនាំកម្លាំងជំនាញចុះឆែកឆេរផ្ទះជួលមួយកន្លែងដែលមានឈ្មោះ (ដឺផាវើហាវ The power house Guest House) ដែលមានទីតាំងនៅក្រុមទី០៨ ភូមិ៣ សង្កាត់លេខ៤ ក្រុង/ខេត្តព្រះសីហនុ ដោយមានការចូលរួមពីលោក ហួត វិចិត្រ ព្រះរាជអាជ្ញារងអមសាលាដំបូងខេត្តព្រះសីហនុផងដែរ ។
លោក កែវ សុផល បាននិយាយឲ្យដឹងថា ក្នុងករណីបង្ក្រាបការជួញដូរគ្រឿងញៀនកម្លាំងសមត្ថកិច្ចកងរាជអាវុធហត្ថខេត្តបានធ្វើការស្រាវជ្រាវ និងបានដាក់កម្លាំងបង្កប់រហូតកំណត់មុខសញ្ញាឈានទៅដល់ការឆែកឆេរ និងឃាត់ខ្លួនជនសង្ស័យប្រុសស្រីចំនួន០២នាក់ ទី១-ឈ្មោះ REDER DAVID ភេទប្រុស អាយុ៧០ឆ្នាំ ជនជាតិអង់គ្លេស ទី២-ឈ្មោះ លឹម សារ៉ន ភេទស្រី អាយុ៣៤ឆ្នាំ ជនជាតិខ្មែរ។
ក្នុងករណីបង្ក្រាបការជួញដូរគ្រឿងញៀន សមត្ថកិច្ចធ្វើការដកហូតបានវត្ថុតាងមួយចំនួនមានដូចជា ម្សៅសថ្លា០៤កញ្ចប់ធំ ដបជក់ថ្នាំ០១ ដែកកេះ០៧ ថង់សម្រាប់វិចខ្ចប់០១ដុំ ទូរស័ព្ទដៃ០១គ្រឿង ម៉ូតូម៉ាក YAMAHA MIO ពណ៌ខ្មៅ០១គ្រឿង ពាក់ស្លាកលេខកណ្ដាល 1M ២៤៧៤ កង់០១ និងប៉ាសស្ព័រ០១។ បច្ចុប្បន្នជនសង្ស័យ និងវត្ថុតាង ត្រូវបានបញ្ជូនទៅកាន់កងរាជអាវុធហត្ថខេត្តព្រះសីហនុ ដើម្បីធ្វើការសាកសួរ និងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់វិធានការទៅតាមផ្លូវច្បាប់៕ ស៊ុយ ចាន់ធា
0 Comments