ក្រុមចោរប្លន់ប្រដាប់អាវុធជិត១០នាក់ប្រដាប់ដោយកាំភ្លើង៣ដើមតាមធ្វើសកម្មភាពប្លន់យកម៉ូតូមួយគ្រឿងបានសម្រេច
ភ្នំពេញ ៖ ពួកចោរប្លន់ប្រដាប់អាវុធមួយក្រុមមានគ្នាជាងជិតនាក់មានកាំភ្លើងខ្លីស៊េរីទំនើប៣ដើមនិងជិះម៉ូតូ៣ទៅ៤គ្រឿងបានតាមធ្វើសកម្មភាពភ្ជង់គំរាមប្លន់ម៉ូតូស្កូពីមួយគ្រឿងពីយុវជនម្នាក់ជិះម៉ូតូឌុបមិត្តដើរលេងនៅពេលយប់បានសម្រេចរួចជិះគេចខ្លួនបាត់ដោយសុវត្ថិភាព កាលពីវេលាម៉ោង២និង៤៥នាទីរំលងអធ្រាត្រឈានចូលថ្ងៃទី១៣ ខែមករា ឆ្នាំ២០១៥នៅចំណុចមុខក្រុមហ៊ុនសាំស៊ុងតាមបណ្តោយផ្លូវព្រះមុនីវង្សស្ថិតក្នុងសង្កាត់ចតុមុខ ខណ្ឌដូនពេញ។
សមត្ថកិច្ចមូលដ្ឋានបានឲ្យដឹងថា ជនរងគ្រោះដែលរងនូវអំពើប្លន់ប្រដាប់អាវុធនេះឈ្មោះ ជា សុផានិត ភេទប្រុស អាយុ៣២ឆ្នាំមុខរបរចុងភៅស្នាក់នៅភូមិតាង៉ូវ សង្កាត់និរោធន៍ ខណ្ឌច្បារអំពៅបាត់បង់ម៉ូតូម៉ាកស្កូពីពណ៌ទឹកប្រាក់ពាក់ស្លាកលេខភ្នំពេញ 1CE-5945។
ជនរងគ្រោះបានបំភ្លឺប្រាប់សមត្ថកិច្ចមូលដ្ឋានឲ្យដឹងថា នៅមុនពេលកើតហេតុរូបគេបានជិះម៉ូតូឌុបមិត្តស្រីម្នាក់ចេញពីធ្វើការនៅមជ្ឈមណ្ឌលរ៉ុកក្នុងបំណងមកហូបបាយនៅម្តុំផ្សារសូរិយាពេលធ្វើដំណើរមកដល់ចំណុចកើតហេតុស្រាប់តែលេចមុខជនសង្ស័យមានគ្នា៧ទៅ៨នាក់ជិះម៉ូតូ៣ទៅ៤គ្រឿងប្រដាប់ដោយកាំភ្លើងខ្លី៣ដើម បានជិះមកកៀរឲ្យឈប់រួចដកកាំភ្លើងពីចង្កេះធ្វើសកម្មភាពភ្ជង់គំរាមប្លន់យកម៉ូតូរបស់ខ្លួនបានសម្រេចហើយជិះគេចខ្លួនបាត់ស្រមោលដោយសុវត្ថិភាពតែម្តង។
សមត្ថកិច្ចបញ្ជាក់ថា ពាក់ព័ន្ធនិងអំពើប្លន់ប្រដាប់អាវុធនេះដែរកម្លាំងជំនាញខណ្ឌដូនពេញកំពុងតែបើកការស្រាវជ្រាវដើម្បីឈានដល់ការចាប់ខ្លួនក្រុមជនសង្ស័យទាំងនោះយកមកផ្តន្ទាទោសតាមផ្លូវច្បាប់៕
រស្មី
0 Comments