កំពង់ឆ្នាំង ៖ លោកអធិការនិងលោកអធិការងតាមស្រុក បានលើកឡើងថា ដើម្បីកាត់បន្ថយគ្រោះថ្នាក់ចរាចរណ៍ ត្រូវបង្កើនការផ្សព្វផ្សាយច្បាប់ដល់ប្រជាពលរដ្ឋ អនុវត្តការរឹតបន្តឹងច្បាប់ចរាចរណ៍ ដោយធ្វើការផាកពិន័យឲ្យបានម៉ឺងម៉ាត់ និងលុបបំបាត់ឲ្យបានវប្បធម៌អន្តនាគម។ការលើកឡើងបែបនេះ ធ្វើឡើងនៅក្នុងកិច្ចប្រជុំបូកសរុបការងារនគរបាលចរាចរណ៍ឆ្នាំ២០១៤ និងដៅការងារចរាចរណ៍ឆ្នាំ២០១៥ នៅក្នុងស្នងការដ្ឋាននគរបាលខេត្តកំពង់ឆ្នាំង នៅព្រឹកថ្ងៃទី០៨ខែមករា ឆ្នាំ២០១៥ ដែលមានការចូលរួមពីលោកអធិការ អធិការរង និងមន្ត្រីនគរបាលចរាចរណ៍មកពីស្រុកទាំង៨ក្នុងខេត្តកំពង់ឆ្នាំង។
លោក អៀ ប៊ុនធឿន នាយការិយាល័យនគរបាលចរាចណ៍ផ្លូវគោកខេត្ត បានរាយការណ៍អំពីសភាពការណ៍គ្រោះថ្នាក់ចរាចរណ៍នៅក្នុងឆ្នាំ២០១៥ឲ្យដឹងថា នៅក្នុងឆ្នាំ២០១៤គិតពីថ្ងៃទី១១ ខែវិច្ឆិកា ឆ្នាំ២០១៣ដល់ថ្ងៃទី១៦ ខែវិច្ឆិកា ឆ្នាំ២០១៤ ក្នុងខេត្តកំពង់ឆ្នាំងគ្រោះថ្នាក់ចរាចរណ៍កើតឡើង២៣០លើក កើនលើសឆ្នាំ២០១៣ចំនួន៥២លើក បង្កអោយមនុស្សស្លាប់១០៣នាក់លើសឆ្នាំមុន២១នាក់ របួសសរុប៤៥៦នាក់លើសឆ្នាំមុន១០៩នាក់ របួសធ្ងន់២១៧នាក់លើសឆ្នាំមុន៤៥នាក់របួសស្រាល២៣៩នាក់លើសឆ្នាំមុន៦៥នាក់។ខូចខាតរថយន្ត១០១គ្រឿង ខូចម៉ូតូ២៤៧គ្រឿង ខូចយានយន្តកែច្នៃ១០គ្រឿង ខូចកង់៦គ្រឿង បាក់ស្លាកគណៈបក្ស១ផ្លាក បាក់របងស៊ីម៉ង់ និងក្លោងទ្វារ៣០ម៉ែត្រ បាកស្ពានថ្ម៥មគុណ២,៣៥ម និងខូចបង្គោលភ្លើង១ដើម។ នៅក្នុងគ្រោះថ្នាក់នេះរកឃើញអ្នកបើកម៉ូតូមិនពាក់មួកសុវត្តិភាព២២៤នាក់ អ្នកបើកម៉ូតូពាក់មួកសុវត្តិភាព តែ៣៤នាក់ ដែលអាចវាយតម្លៃបានថា អ្នកបើកបរម៉ូតូភាគច្រោះនមិនគោរពច្បាប់ឬមិនយល់ច្បាប់ចរាចរណ៍។
លោក អៀ ប៊ុនធឿន បានលើកឡើងថា មូលហេតុនៃគ្រោះថ្នាក់ចរាចរណ៍គឺមកពីកត្តាមនុស្សមាន២០៧លើក កត្តាយានយន្ត១២លើក និងកក្តាផ្លូវតែ៣លើកប៉ុណ្ណោះ។
នៅក្នុងពិធីប្រជុំបូកសរុបការងារចរាចរណ៍នេះ លោកអធិការ លោកអធិការនគរបាលទទួលកិច្ចការងារចរាចរណ៍តាមស្រុក បានលើកឡើងអំពីវិធានការណ៍ទប់ស្កាត់ និងកាត់បន្ថយគ្រោះថ្នាក់ចារចរណ៍នៅក្នុងឆ្នាំ២០១៥ថា ត្រូវបង្កើនឲ្យបានខ្លាំងក្លាការផ្សព្វផ្សាយច្បាប់ចរាចរណ៍នៅគ្រប់មូលដ្ឋានភូមិឃុំ សាលារៀន និងតាមរោងចក្រ។ ត្រូវបង្កើនការរឹតបន្តឹងច្បាប់ចរាចរណ៍ដោយអនុវត្តការផាកពិន័យតាមកំណត់ច្បាប់ឲ្យបានម៉ឺងម៉ាត់ ដូចជាត្រូវកសាងសំណុំរឿងបញ្ជូនទៅតុលាការចំពោះបទល្មើសចរាចរណ៍ធំៗដែលបង្កអោយមនុស្សស្លាប់។ ត្រូវតែលប់បំបាត់វប្បធម៌អន្តរាគមឲ្យបានជាដាច់ខាត ដោយមិនត្រូវចាត់ទុកថាច្បាប់សំរាប់តែអ្នកតូច និងប្រជាពលរដ្ឋគោរពនោះឡើយ ដែលកន្លងមកប្រជាពលរដ្ឋស្រួលផាកពិន័យ និងអប់រំទេ តែកូនអ្នកធំ មន្ត្រីរាជការ និងអ្នកមានសក្ត័ធំៗ តែម្តងដែលពិបាក និងយកច្បាប់មកជាន់ឈ្លីមិនខ្ចីគោរព។
សំណូមពរ បច្ចុប្បន្នមន្ត្រីនគរបាលចរាចរណ៍នៅតាមក្រុង និងស្រុកមានមានកម្លាំងតិចពី៤នាក់ទៅ៧នាក់តែប៉ុណ្ណោះ មិនអាចរាប់រងការងារបានគ្រប់ជ្រុងជ្រោយតាមផែនការថ្នាក់លើឡើយ។លោកអធិការគ្រប់ស្រុកស្នើសុំថ្នាក់លើជួយបំពេញបន្ថែមទៅតាមក្របខណ្ឌ សំណូមពរបំពាក់ឧបករណ៍ចាប់ល្បឿននៅតាមស្រុក និងសំណូមពរមន្ត្រីនគរបាលទាំងអស់ត្រូវធ្វើជាគំរូឈានមុខគេក្នុងការគោរពច្បាប់ចរាចរណ៍។
លោក ឡុច វណ្ណារា ស្នងការរងនគរបាលខេត្ត និងជាប្រធានការិយាល័យកណ្តាលសណ្តាប់ធ្នាប់នៃស្នងការដ្ឋានបគរបាលខេត្ត ដែលបានចូលរួមដឹកនាំកិច្ចប្រជុំបូកសរុបនេះ បានថ្លែងថា លោកនិងធ្វើការបូកសរុបលទ្ធផលនៃការប្រជុំនេះ និងសំណូមពររបស់លោកអធិការគ្រប់ស្រុកជូនលោកស្នងការនិងថ្នាក់លើ ដើម្បីសំដៅបង្កើនកិច្ចប្រតិបត្តិការកាត់បន្ថយគ្រោះថ្នាក់ចរាចរណ៍ក្នុងឆ្នាំ២០១៥នៅក្នុងខេត្តកំពង់ឆ្នាំងអោយថយចុះ និងរឹតបន្តឹងការអនុវត្តច្បាប់ចរាចរណ៍មានប្រសិទ្ធភាពខ្ពស់៕
0 Comments