ក្រុមហ៊ុនភេសជ្ជៈយក្ស Coca-Cola កំណត់ថា នឹងកាត់បន្ថយការងាររហូតដល់១,៨០០កន្លែងនៅទូទាំងពិភពលោក នៅពេលដែលខ្លួនបន្ដការខិតខំកាត់បន្ថយការខាតបង់។
Coca-Cola បានរាយការណ៍ថា មានការធ្លាក់ចុះ១៤ភាគរយនៅក្នុងប្រាក់ដែលរកបានសម្រាប់ត្រីមាសខែកក្កដាដល់ខែកញ្ញា កាលពីឆ្នាំទៅ និងការរីកចម្រើននូវប្រាក់ចំណូលមានភាពស្ពឹកស្រពន់។
ការកាត់បន្ថយការងារនេះនឹងប៉ះពាល់ដល់ទីបញ្ជាការដ្ឋាន Atlanta របស់ក្រុមហ៊ុន ក៏ដូចជាប្រតិបត្ដិការអន្ដរជាតិរបស់ខ្លួនផងដែរ។ ក្រុមហ៊ុនបាននិយាយថា ខ្លួនបានចាប់ផ្ដើមជូនដំណឹងទៅដល់កម្មករដែលត្រូវប៉ះពាល់ដោយការកាត់នេះរួចហើយ។
អ្នកនាំពាក្យរបស់ Coca-Cola បាននិយាយនៅក្នុងសេចក្ដីថ្លែងការណ៍ផ្ញើតាមអ៊ីមែលមកឲ្យ BBC ថា យើងបានចាប់ផ្ដើមដំណើរការជូនដំណឹងដល់សហការីនៅអាមេរិក និងនៅទីតាំងអន្ដរជាតិមួយចំនួនស្ដីអំពីការប៉ះពាល់ចំពោះផ្នែកទាំងឡាយរបស់ពួកគេហើយ។
ក្រុមហ៊ុនបាននិយាយបន្ដថា ការកាត់បន្ថយថែមទៀតនឹងត្រូវបានធ្វើឡើងដោយផ្នែកផ្សេងៗទៀតនៅក្នុងពេលផ្សេងគ្នា។ អ្នកនាំពាក្យរូបនេះបានបន្ថែមថា យើងបានរកឃើញអត្ដសញ្ញាណមុខតំណែងពី១,៦០០ទៅ១,៨០០នៅក្នុងសាជីវកម្មនៅ Coca-Cola អាមេរិកខាងជើង និង Coca-Cola អន្ដរជាតិ ដែលនឹងត្រូវបានលុបចោលនៅក្នុងបណ្ដាខែខាងមុខនេះ។
Coca-Cola មានកម្លាំងពលកម្មនៅលើពិភព លោកប្រហែល១៣០,០០០នាក់។ នៅក្នុងខែតុលា ឆ្នាំទៅ ប្រធានប្រតិបត្ដិរបស់ Coca-Cola លោក Muhtar Kent បាននិយាយថា ក្រុមហ៊ុន មានបំណងដើម្បីសន្សំសំចៃ៣ពាន់លានដុល្លារ(១.៩៨ពាន់លានផោន) នៅក្នុងការខាតបង់ប្រចាំឆ្នាំនៅឆ្នាំ២០១៩ ដែលនឹងរួមបញ្ចូលការកាត់បន្ថយការងារនោះផង។
នៅក្នុងពេលនេះលោក Kent បាននិយាយថា លោកទទួលស្គាល់សេចក្ដីត្រូវការរបស់ក្រុមហ៊ុនដើម្បីបង្កើនទំហំ និងជំហាននៃការផ្លាស់ប្ដូរនៅពេលដែលខ្លួនប្រឈមនឹងការប្រកួតប្រជែងបរិស្ថាននៃសេដ្ឋកិច្ចនោះ។ លោក Kent បានបញ្ជាក់ថា ក្រុមហ៊ុនបានផ្ដោតការយកចិត្ដទុកដាក់អំពីការធ្វើឲ្យបានល្អប្រសើរ និងធ្វើឲ្យងាយស្រួលដល់ប្រតិបត្ដិការរបស់ខ្លួន និងថា ខ្លួនកំពុងតែដំណើរការជាមួយផែនការផ្ដល់សិទ្ធិលក់ដូរឡើងវិញភាគច្រើននៃក្រុមហ៊ុននៅអាមេរិកខាងជើងនៅដំណាច់ឆ្នាំ២០១៧៕
ថាលីយ៉ាន
0 Comments