គណបក្សរាជានិយមចាប់ដៃគ្នាថានឹងស្តារប្រិយភាពគណបក្សរាជានិយមហ៊្វុនស៊ិនប៉ិចឡើងវិញ
ភ្នំពេញ ៖ សម្តេចក្រុមព្រះនរោត្តម រណឫទ្ធិ លោក ញឹក ប៊ុនឆៃ លោក កែវ ពុទ្ធរស្មី និងថ្នាក់ដឹកនាំគណបក្សរាជានិយមជាច្រើននាក់ទៀត បានចាប់ដៃប្រកៀកស្មាគ្នា ចំពោះមុខសមាជិកបក្សមូលដ្ឋានដែលមកពី ២៥ខេត្ត-ក្រុង ថានឹងស្តារគណបក្សរាជានិយមឲ្យមានការរីកចម្រើនឡើងវិញ ស្របតាមបន្ទូលរបស់អតីតព្រះមហាក្សត្រ សម្តេចតា សម្តេចតាទូត។
ចាប់ដៃគ្នាជាថ្មីឡើងវិញនេះ បានធ្វើឡើងនៅក្នុងពិធីសំណេះសំណាលសមាជិកបក្សមូលដ្ឋានមកពី ២៥ខេត្ត-ក្រុង នៃគណបក្សរាជានិយមហ៊្វុនស៊ិនប៉ិចជាលើកដំបូង នៅក្លឹបកីឡាប៊ីឡាញអារីណា សង្កាត់ជ្រោយចង្វា រាជធានីភ្នំពេញព្រឹកថ្ងៃទី១០ ខែមករា ឆ្នាំ២០១៥។
សម្តេចក្រុមព្រះ បានមានព្រះបន្ទូលអរគុណលោក ញ៉ឹក ប៊ុនឆៃ និងសម្តេចអារុណរស្មីប្រធាននៃគណបក្ស ដែលបានផ្តល់ជំនឿទុកចិត្តលើព្រះអង្គ ហើយបានរៀបចំកម្មវិធីសំណេះសំណាលនេះឡើង ក្នុងបំណងឲ្យមានការជួបជុំគ្នាឡើងវិញ បន្ទាប់ពីបានបែកបាក់គ្នាអស់រយៈពេលជាង៨-៩ឆ្នាំមកហើយនោះ មុននឹងបើកសមាជជាផ្លូវការរបស់បក្សនៅថ្ងៃទី១៩ ខែមករា ខាងមុខ ដើម្បីប្រគល់តួនាទីប្រធានបក្សហ៊្វុនស៊ីនប៉ិចដល់ព្រះអង្គដឹកនាំ។
សម្តេចក្រុមព្រះ ព្រះអង្គបានសន្យាថា នឹងដង្ហែតាមជានិច្ចនូវការផ្តាំផ្ញើរបស់ព្រះបរមរតនកោដ្ឋ ព្រះមហាវរក្សត្រ ព្រះបាទនរោត្តមសីហនុ ព្រះបិតាជាតិខ្មែរ ក្នុងការបង្រួបបង្រួមជាតិ ការពារបូរណភាពទឹកដីខ្មែរ និងលើកស្ទួយជីវភាពរបស់ប្រជាពលរដ្ឋខ្មែរ។
ក្នុងនាមជាព្រះប្រធានគណបក្សរាជានិយមហ៊្វុនស៊ិនប៉ិច ព្រះអង្គមានបន្ទូលថា នឹងខិតខំធ្វើយ៉ាងណាដើម្បីស្តារកិត្តិយសគណបក្សរាជានិយមហ៊្វុនស៊ីនប៉ិច ដែលស្ទើរតែបាត់ឈ្មោះទៅហើយនោះឡើងវិញ ប៉ុន្តែដើម្បីភាពរឹងមាំរបស់គណបក្សរាជានិយមហ៊្វុនស៊ីនប៉ិចឡើងវិញ ក៏អាស្រ័យលើរចនាសម្ព័ន្ធរបស់អ្នករាជានិយម នៅមូលដ្ឋាន ដែលមានស្រាប់ចាប់ដៃគ្នា រៀបចំនូវរចនាសម្ព័ន្ធឲ្យមាំទាំឡើងវិញផងដែរ ក្នុងគោលដៅតែមួយបំរើប្រយោជន៍ជាតិ និងប្រជាពលរដ្ឋ ដែលលោកជាម្ចាស់ទឹកម្ចាស់ដីមានការរីកចម្រើនរុងរឿង ដូចសម័យសង្គមរាស្ត្រនិយម។ សម្តេចក្រុមព្រះ ក៏បានជំរុញឲ្យថ្នាក់ដឹកនាំមូលដ្ឋានរបស់ព្រះអង្គបន្តធ្វើសកម្មភាពដូចជាភ្លៀងរលឹម ដើម្បីចុះសួរសុខទុក្ខដល់ប្រជាពលរដ្ឋ និងយកចិត្តទុកដាក់ជានិច្ច ចំពោះការដោះស្រាយបញ្ហាជូនប្រជាពលរដ្ឋ។
ក្នុងកម្មវិធីនោះដែរ លោក ញឹក ប៊ុនឆៃ អគ្គលេខាធិការនៃគណបក្សហ៊្វុនស៊ិនប៉ិចថ្លែងថា លោកលះបង់អ្វីគ្រប់យ៉ាង ដើម្បីការពាររាជានិយម និងប្តូរផ្តាច់ជានិច្ចក្នុងការដង្ហែ តាមសម្តេចក្រុមព្រះនរោត្តម រណឫទ្ធិ ជាព្រះប្រធានដឹកនាំដើម្បីការពាររបបរាជានិយម៕
សុងយោ
0 Comments