អ្នកប្រដាល់ Guillermo Rigondeaux បានងើបពីការដួលនៅលើសង្វៀននៃទីក្រុងអូសាកា ប្រទេសជប៉ុន រួចការពារបានសម្រេចខ្សែក្រវាត់ទម្ងន់ស្រាលពិភពលោករបស់គាត់ ខណៈដែលកីឡាករម្ចាស់ផ្ទះ Hisashi Amagasaបានបោះបង់ចោលការប្រកួតនៅចុងទឹកទី១១។
អ្នកប្រយុទ្ធមកពីប្រទេសគុយបាម្នាក់នេះ និងជាម្ចាស់ខ្សែក្រវាត់ទម្ងន់ស្រាល WBOនិង WBA Super-Bantamweighបានដួល២លើកនៅក្នុងទឹកទី៧ ប៉ុន្តែគាត់អាចទ្រាំទ្ររួចរហូតដល់ចប់ទឹក មុនពេលគ្រប់ដណ្តប់ការប្រកួតទាំងស្រុងសម្រាប់ទឹកដែលនៅសេសសល់។
ដោយឡែក កីឡាករ Amagasaវិញ ក៏បានដួលផងដែរ នៅក្នុងទឹកទី៩ ហើយមុខរបស់គាត់ឡើងប៉ោង និងមានស្នាមជាំស្ទើរសព្វសាច់ នៅពេលដែលគាត់មិនអាចបន្តការប្រកួតទៀតបាន។
សូមបញ្ជាក់ថា កីឡាករ Rigondeauxដែលទើបតែឡើងប្រកួតប្រដាល់អាជីពបានត្រឹមតែ១៥លើកនោះ គឺស្ថិតនៅក្នុងចំណោមកំពូលអ្នកប្រយុទ្ធមិនចេះរាថយល្អបំផុតនៅលើពិភពលោក ដូចនឹងកីឡាករ Floyd Mayweather និងកីឡាករ Manny Paquiaoដែរ ប៉ុន្តែគួរឲ្យស្តាយមិនមានអ្នកគាំទ្រលោក ជាហេតុញ៉ាំងឲ្យការប្រកួតរបស់លោកមិនអាចចាក់ផ្សាយនៅអឺរ៉ុប និងសហរដ្ឋអាមេរិកបាននោះឡើយ។
ម្ចាស់មេដាយអូឡាំពិក២សម័យកាលម្នាក់នេះ បានឡើងសង្វៀនតែ២លើកប៉ុណ្ណោះក្នុងឆ្នាំ២០១៤ ហើយត្រូវបានស្ថានីយទូរទស្សន៍ HBOផ្តាច់ទំនាក់ទំនងការងារជាមួយគាត់ បន្ទាប់ពីបានយកឈ្នះកីឡាករ Nonito Donaireកាលពីឆ្នាំ២០១៣៕
0 Comments