កណ្ដាល ៖ ល្បែងស៊ីសងកំពុងរីកដុះដាលដូចផ្សិតនៅក្នុងទឹកដីខេត្តកណ្តាល ប្រជាពលរដ្ឋស្នើសុំអាជ្ញាធរឲ្យបិទ។ តាមសេចក្ដីរាយការណ៍ពីប្រជាពលរដ្ឋបានឲ្យដឹងថា ល្បែងស៊ីសងដែលពេញនិយមជាងគេ គឺល្បែងកន្ទុយលេខ ល្បែងភ្នាល់បាល់ទាត់ និងល្បែងបៀរអាប៉ោងតែម្តង នៅក្នុងទឹកដីខេត្តកណ្តាល បើកលេងស្ទើរតែគ្រប់ស្រុក ពិសេសនៅក្រុងតាខ្មៅ ស្រុកស្អាង និង ស្រុកកោះធំ ឃើញថាមានបនល្បែងរាប់រយកន្លែងបើកជាជំហានដោយមិនកោតក្រែងសមត្ថកិច្ចឡើយ។
ប្រជាពលរដ្ឋបន្តថា ក្រុមអ្នកបើកល្បែងជាច្រើននាក់គឺសុទ្ធតែដើរអះអាងអួតថា អាជ្ញាធរពាក់ព័ន្ធតាំងពីថ្នាក់ក្រោមរហូតដល់ថ្នាក់ខេត្តសុទ្ធតែបង់លុយប្រចាំខែជូនគ្រប់ៗកន្លែងអស់ហើយ ហើយម្យ៉ាងទៀតសមត្ថកិច្ចអាជ្ញាធរធំៗជាខ្សែបណ្ដាញរបស់គេ ទើបហ៊ានបើកមកទល់សព្វថ្ងៃនេះ ។ ប្រជាពលរដ្ឋរស់នៅខេត្តកណ្តាលក៏បាននាំគ្នាសម្ដែងនូវការព្រួយបារម្ភភ័យខ្លាចលើបញ្ហាល្បែងស៊ីសងខាងលើ វាអាចកើតមាននូវបទល្មើសចោរលួច ប្លន់ ប្រដាប់អាវុធផ្សេងៗជាក់ជាមិនខាន។ ដូច្នេះ ដើម្បីរក្សាទុកគោលនយោបាយភូមិ/ឃុំមានសុវត្ថិភាព ពួកគាត់សុំឲ្យអាជ្ញាធរថ្នាក់លើ ពិសេសលោកអភិបាលខេត្ត ដែលទើបឡើងកាន់តំណែងថ្មី មេត្តាដាក់វិធានការលុបបំបាត់នូវល្បែងស៊ីសងក្នុងអាណាចក្រទឹកដីរបស់ខ្លួនផង។
ទន្ទឹមនោះដែរ អ្នកយកព័ត៌មានយើងមិនអាចសុំការបំភ្លឺអំពីលោក ម៉ៅ ភិរុន អភិបាលខេត្តកណ្ដាលបានឡើយ ដោយទូរស័ព្ទរបស់លោកឆ្លើយជាប់រវល់រហូត៕
ភាវុន
0 Comments