ភ្នំពេញ ៖ របាំងថ្មពុះចែកទ្រូងផ្លូវចំនួន៧កង់បានទទួលរងការខូចខាតដោយបាក់រាយប៉ាយពេញផ្លូវ ក្រោយពេលដែលមានរថយន្តមិនស្គាល់ម៉ាកមួយគ្រឿងបើកមកបុកយ៉ាងពេញទំហឹង និងបានបើកគេចខ្លួនបាត់ស្រមោលនោះ ហើយខណៈពេលដែលរបាំងដែលទទួលរងការខូចខាតរាយប៉ាយនៅលើថ្នល់ម៉ូតូ អ្នកដំណើរមកដល់ក៏កិនពីលើទើបបង្កឲ្យមានគ្រោះថ្នាក់តែម្តង។
ហេតុការណ៍គ្រោះថ្នាក់ខាងលើនេះបានកើតមានឡើងកាលពីវេលាម៉ោង២និង៣០នាទី ឈានចូលថ្ងៃទី០៩ ខែកុម្ភៈ ឆ្នាំ២០១៥ នៅចំណុចមុខផ្សារហេងលី សង្កាត់ទឹកល្អក់ទី៣ ខណ្ឌទួលគោក។ សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តមិនស្គាល់ម៉ាកមួយគ្រឿង បានបើកបរយ៉ាងលឿនតាមបណ្តោយផ្លូវលេខ២៧១ ក្នុងទិសដៅ ពីជើងទៅត្បូង លុះមកដល់ចំណុចកើតហេតុក៏បានរ៉េចង្កូតពេញផ្លូវ និងបានធ្វើឲ្យជ្រុលបុករបាំងថ្មពុះចែកទ្រូងផ្លូវបណ្ដាលឲ្យបាក់អស់ចំនួន៧កង់រាយប៉ាយពេញផ្លូវ និងបានបើកគេចខ្លួនបាត់ស្រមោលតែម្តង។ បន្ទាប់ពីកើតហេតុបានឲ្យប្រហែលជា១០នាទី ក៏ស្រាប់តែមានបុរសម្នាក់ជិះម៉ូតូមួយគ្រឿងម៉ាកSL ពណ៌ទឹកប្រាក់ គ្មានស្លាកលេខ ធ្វើដំណើរតាមបណ្តោយផ្លូវលេខ២៧១ ក្នុងទិសដៅពីត្បូងទៅជើងក្នុងល្បឿនលឿនដោយមិនបានមើលក៏ជ្រុលបុករបាំងថ្មនោះ បណ្ដាលឲ្យផ្លោងចម្ងាយ២០ម៉ែត្រ របួសធ្ងន់តែម្តង ហើយក្រោយពេលកើតហេតុជនរងគ្រោះត្រូវបានមិត្តភ័ក្ដិដឹកតាមម៉ូតូទៅសង្គ្រោះភ្លាមៗដែរ។ ដោយឡែក ម៉ូតូរបស់ជនរងគ្រោះត្រូវបានសមត្ថកិច្ចប៉ូលិសបញ្ជូនមករក្សាទុកនៅប៉ុស្តិ៍នគរបាលរដ្ឋបាលទឹកល្អក់ទី៣ទុកជាបណ្ដោះអាសន្ន៕
ស្រីរ័ត្ន
0 Comments