ភ្នំពេញ ៖ អគារស្នាក់ការថ្មីគណបក្សប្រជាជនកម្ពុជាឃុំពពេលនេះ ត្រូវបានផ្ដួចផ្ដើមកសាងដោយឯកឧត្តម កែវ ពិសិដ្ឋ នាយកខុទ្ទកាល័យសម្ដេចប្រធានរដ្ឋសភា និងជាប្រធានក្រុមការងារគណបក្សថ្នាក់កណ្ដាលចុះជួយឃុំពពេល ស្រុកពញាក្រែក ខេត្តត្បូងឃ្មុំ អស់ទឹកប្រាក់ប្រមាណ៥ម៉ឺនដុល្លារអាមេរិក។ ស្នាក់ការគណបក្សថ្មីនេះមានអគារការិយាល័យទំហំ៩ម៉ែត្រគុណនិង១២ម៉ែត្រ និងមានសាលប្រជុំទំហំ១២ម៉ែត្រគុណនិង១៦ម៉ែត្រ។
ក្នុងឱកាសចុះត្រួតពិនិត្យសំណង់អគារគណបក្សទើបកសាងថ្មីនេះ ឯកឧត្តម កែវ ពិសិដ្ឋបានមានប្រសាសន៍ថា កន្លងមកគណបក្សមូលដ្ឋានឃុំពពេលនេះពុំមានកន្លែងធ្វើការត្រឹមត្រូវនោះទេ គឺចល័តធ្វើការក្រោមផ្ទះប្រជាជនដែលជាសមាជិកបក្សពីកន្លែងមួយទៅកន្លែងមួយ។ ដើម្បីពង្រឹងប្រសិទ្ធភាពដឹកនាំបក្សមូលដ្ឋានឃុំឲ្យរឹងមាំ និងពង្រីកសមាជិកបក្សឆ្នើមដើម្បីធានាយកប្រៀបសម្រាប់ការបោះឆ្នោតក្រុមប្រឹក្សាឃុំ/សង្កាត់ឆ្នាំ២០១៧ និងបោះឆ្នោតសកលឆ្នាំ២០១៨ និងការបោះឆ្នោតអាណត្តិក្រោយៗទៀត យើងត្រូវមានមូលដ្ឋានបង្អែករឹងមាំក្នុងការកសាងកម្លាំងបក្ស។
ឆ្លៀតឱកាសនោះដែរ ឯកឧត្តមក៏បានអញ្ជើញទៅសួរសុខទុក្ខ និងចូលរួមបុណ្យខួប៧ថ្ងៃ សពភរិយាលោក តាំង ណាន សមាជិកក្រុមប្រឹក្សាឃុំពពេលនៅគេហដ្ឋានផ្ទាល់ផងដែរ៕
0 Comments