ភ្នំពេញ ៖ សេចក្តីប្រកាសព័ត៌មានរបស់អគ្គិសនីកម្ពុជា ចាប់ពីថ្ងៃទី២៩ ខែមករា មកដល់ថ្ងៃទី៨ ខែកុម្ភៈ អគ្គិសនីកម្ពុជាបានចុះយុទ្ធនាការតភ្ជាប់ចរន្តអគ្គិសនីតំលៃ៦១០រៀល ដែលជាអត្រាថ្លៃអនុគ្រោះជូនដល់អ្នកប្រើប្រាស់ក្រោម៥០គីឡូវ៉ាត់ម៉ោងក្នុងមួយខែនៅខណ្ឌចំនួន៣បាន៨,១៤៨បន្ទប់។
កាលពីថ្ងៃទី៩ ខែកុម្ភៈ អគ្គិសនីកម្ពុជាបានសេចក្តីប្រកាសព័ត៌មានមួយបានឲ្យដឹងថា អគ្គិសនីកម្ពុជាបានតភ្ជាប់ចរន្តអគ្គិសនី៦១០រៀល ដែលជាអត្រាថ្លៃអនុគ្រោះជូនដល់អ្នកប្រើប្រាស់ក្រោម ៥០គីឡូវ៉ាត់ម៉ោងក្នុងមួយខែ ចាប់ពីថ្ងៃទី២៩ ខែមករា មកដល់ថ្ងៃទី៨ ខែកុម្ភៈ ឆ្នាំ២០១៥នេះ បានចំនួន៨,១៤៨បន្ទប់។
អគ្គិសនីកម្ពុជាកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះម្ចាស់ផ្ទះជួល បន្ទប់ជួល ដែលបានផ្តល់សហការយ៉ាងល្អ អាជ្ញាធរមូលដ្ឋាន និងកងកម្លាំងប្រដាប់អាវុធគ្រប់ជាន់ថ្នាក់ ដែលបានផ្តល់ការគាំទ្រ និងសហការពេញលេញបងប្អូនប្រជាពលរដ្ឋ ដែលជួលផ្ទះ បន្ទប់ជួល ហើយនិយោជិតអគ្គិសនីកម្ពុជាដែលបានខិតខំមិនខ្លាចនឿយហត់។
លោក កែវ រតនៈ ប្រតិភូទទួលបន្ទុកអគ្គនាយកអគ្គិសនីកម្ពុជាបានប្រាប់អ្នកកាសែតកាលពីថ្ងៃទី៨ ខែកុម្ភៈថា អគ្គិសនីកម្ពុជាបានតភ្ជាប់បណ្ដាញអគ្គិសនីដែលមានតម្លៃអនុគ្រោះ៦១០រៀល ក្នុង១គីឡូវ៉ាត់ម៉ោង ក្នុងខណ្ឌទាំង៣ «ឫស្សីកែវ ដង្កោ និងមានជ័យ» បានចំនួន៨.១៤៨បន្ទាប់។ អគ្គិសនីកម្ពុជានឹងបន្តការងារនេះយ៉ាងសស្រាក់សស្រាំ រហូតដល់យុទ្ធនាការត្រូវបានបញ្ចប់ទាំងស្រុង។ សូមរឭកថា កាលពីពេលថ្មីៗ អាជ្ញាធររាជធានីភ្នំពេញ និងអគ្គិសនីកម្ពុជាបានធ្វើកិច្ចប្រជុំបន្តពិនិត្យការងារតបណ្ដាញភ្លើងអគ្គិសនីចូលផ្ទះ និងបន្ទប់ជួលរបស់កម្មករនៅរាជធានីភ្នំពេញ។ តាមតួលេខបន្ទប់ជួលកម្មករនៅរាជធានីត្រូវគេនិយាយថា មានចំនួនរហូតដល់៨ម៉ឺន២ពាន់៤៧៥បន្ទប់ ដោយមិនទាន់រាប់បញ្ជូនស្ថិតិនៅខណ្ឌព្រែកព្នៅ ដែលមិនទាន់មានរបាយការណ៍នៅឡើយនោះទេ។ អភិបាលរាជធានីភ្នំពេញ លោក ប៉ា សុជាតិវង្ស បានថ្លែងថា អាជ្ញាធរខណ្ឌត្រូវចាត់វិធានការធ្វើយ៉ាងណាឲ្យប្រជាពលរដ្ឋក្រីក្រនៅតាមជាយក្រុងបានប្រើប្រាស់ភ្លើងក្នុងតម្លៃថោកសមរម្យដើម្បីមិនឲ្យមានគម្លាតឆ្ងាយ រវាងពីអ្នកមាន និងអ្នកក្រនោះឡើយ៕
លី សុវណ្ណឌួង
0 Comments