ព្រះសីហនុ ៖ ព្រឹកថ្ងៃទី០៩ ខែកុម្ភៈ ឆ្នាំ២០១៥ ក្រសួងឧស្សាហកម្ម និងសិប្បកម្ម សហការជាមួយ មន្ទីរឧស្សាហកម្ម និងសិប្បកម្មខេត្តព្រះសីហនុចុះសិក្ខាស្រាវជ្រាវជាមួយម្ចាស់ហាង និងបុគ្គលិកនៅក្នុងភោជនីយដ្ឋានហ្វាយមែនហ្វ្រេសបៀរ ដែលមានទីតាំងភូមិ១ សង្កាត់លេខ៣ ក្រុងព្រះសីហនុ ដើម្បីរៀបចំផែនការក្នុងការបញ្ជ្រាបយេនឌរ័ ដឹកនាំដោយលោកជំទាវ ឃុន វ៉ារី អនុរដ្ឋលេខាធិការក្រសួងឧស្សាហកម្ម និងសិប្បកម្ម។
លោកទំទាវ ឃុន វ៉ារី បានមានប្រសាសន៍ថា ការចុះមកសិក្សាស្រាវជ្រាវព័ត៌មានជាក់លាក់នាពេលនេះ ក្នុងគោលបំណងប្រមូលយកព័ត៌មានពីម្ចាស់គ្រប់គ្រងជាស្ត្រី និងបុគ្គលិកក្នុងការបញ្ជ្រាបយេនឌរ័តាមរោងចក្រ សហគ្រាស សិប្បកម្ម អាជីវកម្មនៅតាមខេត្ត/ក្រុងដើម្បីកំណត់ផែនការច្បាស់លាស់ពាក់ព័ន្ធក្នុងបញ្ហាជំរុញសមភាព សមធម៌យេនឌរ័ ដោយយកសិប្បកម្មណាដែលមានស្ត្រីបម្រើការងារច្រើន ដើម្បីរៀបចំធ្វើផែនការទៅតាមគោលនយោបាយយុទ្ធសាស្ត្ររបស់ប្រមុខរាជរដ្ឋាភិបាលកម្ពុជា។ ស្ត្រីជាឆ្អឹងខ្នងនៃសេដ្ឋកិច្ចជាតិ និងការរៀបចំធ្វើផែនការយុទ្ធសាស្ត្រឲ្យចំទិសដៅក្នុងការអនុវត្តក្នុងក្រសួង ហើយផលប្រយោជន៍បានដល់ស្ត្រីជាម្ចាស់គ្រប់គ្រងកាន់តែច្រើនឡើង កាលណាយើងជួយកូនស្រីគាត់បានម្នាក់ ក៏ដូចយើងជួយស្ត្រីផងដែរ ហើយគម្រោងនេះមានអង្គការ JICA ជាអ្នកចូលរួមជួយឧបត្ថម្ភ តាមរយៈក្រសួងកិច្ចការនារី។ នៅពេលដែលក្រសួងឧស្សាហកម្មបែកជាពីរ និងដោយមានការសហការជាមួយក្រសួងកិច្ចការនារីដើម្បីជួយជំរុញស្ត្រីជាំអ្នកដឹកនាំក្នុងសហគ្រិនឲ្យមានការងារធ្វើសមរម្យនៅក្នុងរោងចក្រសហគ្រាស។ ពាក្យថា (យេនឌ័រ) មិនសំដៅទៅលើស្ត្រីសុទ្ធនោះទេ គឺជាសមភាព សមធម៌ រវាងបុរស និងស្ត្រីប្រៀបដូចដៃស្តាំ និងដៃឆ្វេងគឺដៃទាំងពីរនេះមិនអាចខ្វះដៃខាងណាមួយបានទេ គឺជួយគ្នាទៅវិញទៅមក។
លោកជំទាវបានបន្តថា ក្រសួងមានគម្រោងចុះសិក្សាស្រាវជ្រាវ៣ខេត្ត និងរាជធានី ទី១-ខេត្តព្រះសីហនុ សៀមរាប បាត់ដំបង និងរាជធានីភ្នំពេញដើម្បីប្រមូលព័ត៌មានជាក់លាក់ចំនួនកម្មករជាស្ត្រី និងបុរសផ្នែកបច្ចេកទេស ដើម្បីជួយជំរុញឲ្យស្ត្រីជាម្ចាស់ដឹកនាំសហគ្រិន មានការអភិវឌ្ឍទៅមុខបន្ថែមទៀត ទាំងផលិតភាព អនាម័យ និងការគ្រប់គ្រងកាន់តែធានានូវការលើកកម្ពស់ស្ត្រី ដើម្បីបញ្ចូលទៅក្នុងផែនការរបស់ក្រសួងក្នុងការកែច្នៃផលិតផល ហើយការចូលរួមរបស់ស្ត្រីក្នុងសហគ្រាស ដើម្បីឲ្យស្ត្រីជាអ្នកគ្រប់គ្រងសហគ្រិនកាន់តែច្រើនឡើងក្នុងការគ្រប់គ្រង ចាត់ចែងការងារដែលជាផលប្រយោជន៍រួមរបស់ស្ត្រី យ៉ាងហោចណាស់ស្ត្រីជាគំរូមួយល្អសម្រាប់ស្ត្រីផ្សេងទៀតក្នុងការចូលរួមក្នុងកសិដ្ឋានដាំដំណាំឲ្យទទួលបានទិន្នផលច្រើន បង្កើនជីវភាពគ្រួសារនិងធ្វើឱ្យសង្គមរីកចម្រើន ឈានឱ្យទាន់ប្រទេសនានានៅក្នុងសកលលោក ដែលមានស្ត្រីៗជាអ្នកគ្រប់គ្រងក្នុងឧស្សាហកម្ម សិប្បកម្ម កសិកម្ម។
លោកស្រី កេត រំដួល ម្ចាស់ភោជនីយដ្ឋាន ហ្វាយមែន ហ្វ្រេសបៀរ បានមានប្រសាសន៍ថា ភោជនីយដ្ឋាននេះចាប់បើកកាលពីថ្ងៃទី១៩ ខែមេសា ឆ្នាំ២០១៤ ដែលមានពីរផ្នែក ទី១-គឺសិប្បកម្មផលិតទឹកសុទ្ធ ដែលមានបុគ្គលិក១០នាក់ ប្រុស៥នាក់ និងស្រី៥នាក់ ស្រីជាអ្នកលាងដប និងវេចខ្ចប់នៅក្នុងម្លប់ ចំណែកប្រុសៗជាអ្នកលក់តាមទីផ្សារ ក្នុងមួយថ្ងៃយើងផលិតទឹកសុទ្ធបានពី១២០ទៅ២០០យួរ។ ដោយឡែកក្នុងភោជនីយដ្ឋានហ្វាយមែនហ្វ្រេសបៀរមានបុគ្គលិក២៥នាក់ ស្រី១៥នាក់ ហើយបុរស៥នាក់ ជាអ្នកផលិតស្រាបៀរក្នុងភោជនីយដ្ឋាន ក្នុងមួយថ្ងៃយើងអាចផលិតបានស្រាបៀ១.០០០លីត្រ ក៏ប៉ុន្តែតម្រូវការក្នុងហាងរបស់យើងគឺប្រើអស់តែ៣០០លីត្រក្នុងមួយថ្ងៃ។ លោកស្រីបានឲ្យដឹងបន្តថា នៅថ្ងៃខាងមុខមានបំណងពង្រីកមុខរបរនេះឲ្យបានធំបន្ថែមទៀត ក៏ប៉ុន្តែវាអាស្រ័យទៅតាមថវិកាតែប៉ុណ្ណោះ៕ ស៊ុយ ចាន់ធា
0 Comments