ភ្នំពេញ ៖ តាមប្រភពពីប្អូនប្រុស អ៊ុន ណារ៉ាន់ ដែលជាកសិករដាំបន្លែក្នុងភូមិស្វាយតាអុក សង្កាត់វាលស្បូវ ខណ្ឌច្បារអំពៅ បានឲ្យដឹងនៅព្រឹកថ្ងៃទី១៦ ខែសីហាថា ក្នុងឆ្នាំ២០១៨នេះបន្លែសណ្តែកកួរកំពុងមានតម្លៃខ្ពស់ ដែលឈ្មួញឲ្យតម្លៃរហូតដល់ទៅ៥០០០រៀល ក្នុងមួយគីឡូក្រាម។
កសិកររូបនេះ បានឲ្យដឹងទៀតថា សព្វថ្ងៃនេះគ្រួសាររបស់ប្អូនបានដាំបន្លែក្នុងដីចំការផ្ទាល់ខ្លួនដែលក្នុងនោះ មានបន្លែ រនោង ត្រសក់និងសណ្តែកកួរ។ ប៉ុន្តែក្នុងបន្លែដែលប្អូនដាំគឺមានតែសណ្ដែកកួរប៉ុណ្ណោះ ដែលឈ្មួញឲ្យតម្លៃខ្ពស់រហូតដល់៥០០០រៀលក្នុងមួយគីឡូក្រាមខុសប្លែកពីឆ្នាំទៅគឺឈ្មួញចុះមកទិញដល់ចំការត្រឹមតែ៣០០០រៀលក្នុងមួយគីឡូក្រាម។ ចំពោះបន្លែរនោងនិងត្រសក់វិញ គឺធ្លាក់ចុះដែលក្នុងមួយគីឡូក្រាមឈ្មួញឲ្យតែ១៩០០រៀលទៅ២០០០រៀលប៉ុណ្ណោះ។
ប្អូនណារ៉ាន់បានបញ្ជាក់ថា ក្នុងចំការរបស់ប្អូនដែលមានដីទំហំប្រមាណជាងកន្លះហិកតា តែគ្រួសាររបស់ប្អូនអាចទទួលបានជិត១០០០ដុល្លារក្នុងរយៈពេលមួយសប្តាហ៍។
កសិករខាងលើបានសំដែងនូវក្តីរីករាយ ពេលទទួលបានថវិកាដ៏ច្រើនមិនធ្លាប់មានក្នុងគ្រួសារកសិករ ហើយអាចរកប្រាក់បានងាយស្រួលជាងអ្នកបម្រើការងារជាមន្ត្រីរាជការទៅទៀតហើយមិនលំបាករកការងារក្រៅស្រុកទៀតផង៕
Source: Kampuchea Thmey Daily
0 Comments