ពួកគេបាននិយាយថា នេះគឺជាដំណើរទស្សនកិច្ចសិក្សា ស្វែងយល់ចំណេះដឹងទូទៅ ស្តីពីការរីកចម្រើននៅតាមតំបន់ព្រំដែន ដែលជាពិសេសនោះគឺចង់ឃើញ ចង់ស្គាល់ ប្រាសាទបូរាណខ្មែរនានា ដែលនៅជាប់នឹងព្រំដែនកម្ពុជា-ថៃ និងបានផ្សារភ្ជាប់ផងដែរ សុខទុក្ខកងទ័ពកម្ពុជា ដែលកំពុងឈរជើងបំពេញភារកិច្ចនៅទីនោះ។
គោលដៅនៃដំណើរទស្សនកិច្ចនេះ គឺឆ្ពោះទៅប្រាសាទតាក្របី ប្រាសាទតាមាន់ធំ នៅក្នុងដែនភូមិសាស្ត្ររបស់ខេត្តឧត្តរមានជ័យ និងប្រាសាទបន្ទាយឆ្មា នៅក្នុងខេត្តបន្ទាយមានជ័យ។
តាមការបញ្ជាក់ របស់ លោក មុំ សុធី ប្រធានសមាគម មគ្គទេសក៍ទេសចរណ៍ភាសាជប៉ុន-អង្គរ បានឲ្យដឹងថា គឺពិតជាមានសារៈសំខាន់ខ្លាំងណាស់សម្រាប់ការធ្វើទស្សនកិច្ចនេះ។
សម្រាប់ឆ្នាំ២០១៥នេះ សមាជិក សមាជិកានៃសមាគមន៍មគ្គុទ្ទេសក៍ទេសចរណ៍ភាសាជប៉ុន-អង្គរ បានធ្វើទស្សនកិច្ចសិក្សានៅតាមតំបន់ព្រំដែនបានចំនួន ២លើក ក្នុងន័យដើម្បីពង្រីកវង់ខ្សែទស្សនាចរ តភ្ជាប់ពីតំបន់អង្គរ នៃខេត្តសៀមរាប ឆ្ពោះទៅកាន់តំបន់ព្រំដែននាពេលអនាគត។ លោក បានបន្តថា ចក្ខុវិស័យនៃដំណើរទស្សនកិច្ចនេះគឺមានគោលដៅចូលរួមធ្វើឲ្យជីវភាព រស់នៅរបស់ប្រជាពលរដ្ឋនៅតំបន់ព្រំដែន បានទទួលនូវលំហូរសេដ្ឋកិច្ចគ្រួសារ តាមរយៈនៃវិស័យ ទេសចរណ៍ផងដែរ ហើយសមរភូមិព្រំដែន ពិតត្រូវបានស្ថិតនៅក្នុងសមរភូមិនៃការអភិវឌ្ឍន៍យ៉ាងពេញលេញ ស្របតាមទស្សនវិស័យរបស់រាជរដ្ឋាភិបាលកម្ពុជា ដែលបានចង្អុលទិសដៅថា ប្រែក្លាយតំបន់ព្រំដែន ពីសមរភូមិប្រយុទ្ធដោយអាវុធ ទៅជាសមរភូមិអភិវឌ្ឍន៍សេដ្ឋកិច្ច។
តាមរយៈនៃដំណើរទស្សនកិច្ចនេះ លោក មុំ សុធី បានសំណូមពរផងដែរ ដល់បណ្តាសាកលវិទ្យាល័យនានាទូទាំងប្រទេស គួរតែត្រូវបានផ្តល់ឱកាសឲ្យនិស្សិត បានជ្រើសរើសតំបន់គោលដៅរមណីយដ្ឋានប្រវត្តិសាស្ត្រនានានៅតាមតំបន់ ព្រំដែន ដើម្បីបំពេញទស្សនកិច្ចសិក្សាស្វែងយល់ បណ្ដុះពុទ្ធិកូនខ្មែរ ឲ្យមានចំណេះជ្រៅជ្រះ អំពីសម្បត្តិវប្បធម៌ និងប្រវត្តិសាស្ត្រជាតិរបស់ខ្លួន។
លោកបានបញ្ជាក់បន្ថែមថា សម្រាប់បច្ចុប្បន្ននៅចំពោះមុខ តាមបណ្តាខ្សែបន្ទាត់ព្រំដែន កងកម្លាំងនគរបាល និង កងទ័ព កំពុងបន្តបំពេញភារកិច្ចដ៏ឧត្តុង្គឧត្តម ការពារបូរណភាពដែនដីនៃមាតុភូមិ វត្តមានរបស់ពួកយើងនៅព្រំដែន តាមរយៈនៃដំណើរទស្សនកិច្ចនេះ គឺជាការលើកទឹកដ៏សំខាន់ជូនដល់វីរកងទ័ព និងកងនគរបាលការពារព្រំដែន ដើម្បីអធិបតេយ្យភាពជាតិ និងសេចក្តីសុខក្សេមក្សាន្តរបស់ប្រជាជនកម្ពុជាយើង៕
http://kampucheathmey.com/kpt/?p=27678
0 Comments