ភ្នំពេញ ៖ គង់ ច័ន្ទស្រីមុំ ឆ្នាំនេះយីអ៊ុនឡើងខ្ពស់ ដោយសារថតឈុតឃោសនាឲ្យផលិតផលនានាបានច្រើនគួរសម។ ជាក់ស្តែងនៅពាក់កណ្តាលឆ្នាំនេះនាងទទួលស្ពតដែលទទួលតម្លៃខ្ពស់ទៀតផង។
គួររំលឹកឡើងវិញថា ក្នុងការថតស្ពតនីមួយៗគង់ ច័ន្ទស្រីមុំស៊ីថ្លៃជាង៧ពាន់ដុល្លារទៅ១ម៉ឺនដុល្លារ។ មានការឆ្ងល់ថា នៅក្នុងចំណោមតារាមួយចំនួន ជាពិសេសតារាថ្មីៗសុទ្ធសឹងតែមានរូបសម្រស់និងមានតម្លៃខ្លួនក៏មិនច្រើនដែរ ហេតុអីក៏បណ្តាក្រុមហ៊ុនទាំងនោះមើលរំលង ឬមួយក៏គង់ ច័ន្ទស្រីមុំ មានអ្វីពិសេសនៅពីក្រោយខ្នង។ ទាក់ទិនរឿងនេះគង់ ច័ន្ទស្រីមុំ បានឲ្យដឹងថា នាងក៏មិនដឹងដែរ តែក៏មានម្ចាស់ក្រុមហ៊ុនខ្លះនិយាយថា នាងមានសម្រស់ស្អាតស៊ីកាមេរ៉ាស័ក្តិសមជាមួយផលិតផលគ្រឿងសម្អាង។
គង់ ច័ន្ទស្រីមុំបានលើកឡើងថា សម្រាប់ស្ពតចុះកិច្ចសន្យាវិញសម្រាប់ពេល១ឆ្នាំគឺគេតម្រូវ ឲ្យនាងថតបីទៅបួនដង។ នាងបន្តថា បើសិនតម្រូវឲ្យនាងថតលើសពីនេះគឺនាងត្រូវគិតតម្លៃបន្ថែមទៀត។ ដោយឡែកការថតផ្សាយពាណិជ្ជកម្មបានទទួលតម្លៃខ្ពស់មានរយៈពេលខ្លីក៏ពិត មែន តែយ៉ាងណានាងមិនភ្លេចថតវីដេអូភាគនៅតាមទូរទស្សន៍ដែរ ព្រោះនាងមានគម្រោងថតរឿងភាគនៅទូរទស្សន៍ CTV ក្នុងតំណែងជាតួឯក។ មុននោះគង់ ច័ន្ទស្រីមុំ ធ្លាប់និយាយថា ផលិតផលនៅក្រៅប្រទេសជាច្រើនបានទាក់ទងនាងដែរ តែគង់ ច័ន្ទស្រីមុំបែរជានិយាយថានាងបានច្រានចោលដោយសារពេលវេលាមិនអំណោយផលពាក់ព័ន្ធនឹងការថតចម្រៀងខារ៉ាអូខេវិញ គង់ ច័ន្ទស្រីមុំ មិនស្ទុះស្ទាដូចមុនទេ។
គួររំលឹកថា មួយរយៈនេះគង់ ច័ន្ទស្រីមុំ បានចំណាយពេលទៅលើមុខជំនួញច្រើនជាងសិល្បៈ។ ក្រោយពីបិទហាងលក់សំលៀកបំពាក់ Kakaii និងហាងសាឡនមក តែពេលនេះនាងក៏ទៅបើកហាងលក់សំលៀកបំពាក់និងគ្រឿងសម្អាងដែលមានទីតាំងនៅផ្លូវត្រសក់ផ្អែមមានស្លាកយីហោ SNM ដោយចំណាយដើមទុនអស់ប្រមាណជិត៣ម៉ឺនដុល្លារ ហើយហាងនេះ បានទទួលការគាំទ្រពីអតិថិជនជួនកាលនាងបើកលក់រហូតដល់ម៉ោង៩យប់ទៀតផង។
បើនិយាយពីការទំនាក់ទំនងរវាងលោកស៊ឹម សីហា និងនាងវិញគឺស្រឡាញ់គ្នា រយៈពេល១០ឆ្នាំមកហើយ ស្របពេលជាមួយគ្នានេះក៏មានលេចឮដែរថា មានតាៗនិងចាស់ស្ទាវជាច្រើនមកលែបខាយចង់បាននាង តែក៏មានប្រភពខ្លះបង្ហើបថា ពេលខ្លះលោកស៊ឹម សីហា ខឹងក្រេវក្រោធដែរ ប្រចណ្ឌគង់ ច័ន្ទស្រីមុំ តែដោយសារគង់ ច័ន្ទស្រីមុំ យល់ពីចំណងស្នេហ៍ដែលពុំឲ្យអ្នកណាបំបែកបានទេ ឯគូស្នេហ៍នាងវិញ ក៏មិនប្រចណ្ឌផ្តេសផ្តាសដែរ។
គង់ ច័ន្ទស្រីមុំ ជាតារាស្រីម្នាក់ដែលគេរាប់ បញ្ចូលចំណាត់ថ្នាក់តារាមានសម្រស់ស្រស់ស្អាត សាច់សខ្ចីនិយមការតុបតែងខ្លួនបែបសិចស៊ី បញ្ចេញដើមទ្រូងទ្រលុកទ្រលន់ ដែលចូលចិត្តបង្អួតភ្នែកមហាជននិងបុរសៗជាច្រើនដោយមិនចេះលាក់លៀម៕
http://kampucheathmey.com/kpt/?p=26500
0 Comments