ភ្នំពេញ ៖ ទោះបីតារាចម្រៀងករុណាពេជ្រ មានបទចម្រៀងចេញលក់នៅលើទីផ្សារក៏ដោយ ប៉ុន្តែបទចម្រៀងថ្មីៗទាំងនោះក៏ពុំទាន់ល្បីល្បាញដែរ។
ជុំវិញរឿងនេះ មិត្តភក្តិរួមផលិតកម្មបានឲ្យដឹងថា ករុណាពេជ្រ ត្រូវបានផលិតកម្មថោនផ្អឹបមួយរយៈព្រោះផលិតកម្មត្រូវលើកស្ទួយអ្នកផ្សេងដើម្បីកុំឲ្យច្រណែនគ្នា។ ពាក់ព័ន្ធរឿងនេះករុណាពេជ្រ និយាយថា មួយរយៈនេះលោកពិតជាមិនសូវមានបទចម្រៀងត្រូវទស្សនិកជនគាំទ្រនោះទេ ហើយរឿងនេះមិនមែនផលិតកម្មថោនមិនមានបទចម្រៀងនោះដែរ ពីព្រោះការដែលផលិតមានបទចម្រៀងថ្មីៗ នៅតែជំរុញឲ្យលោក និងតារាផ្សេងទៀតឲ្យខំរិះរកវិធីសាស្ត្រតែងនិពន្ធចម្រៀងថ្មីៗដើម្បីទាញយកការគាំទ្រ។
ដោយឡែកពេលនេះលោកមិនសូវមានពេលទំនេរដើម្បីផលិតបទចម្រៀងឲ្យល្អឡើយ ពី ព្រោះលោករវល់នឹងការចេញច្រៀងប្រគំតន្ត្រី ពិសេសរវល់ខ្លាំងនឹងការងារដេគ័រដូចជាកម្មវិធី មង្គលការ ជប់លៀង និងកម្មវិធីជាច្រើនទៀត មានទាំងការតុបតែងផ្កា ឆាក ក្រុមមន្ត្រី ក្រុមកំប្លែងជាដើម។ លោកបានឲ្យដឹងទៀតថា មុខជំនួញថ្មីរបស់លោកថ្វីត្បិតទើបតែបង្កើតបានរយៈពេលប្រាំខែគ្មានក្រុមហ៊ុនក៏ដោយ ប៉ុន្តែបើគិតពីជោគជ័យវិញគឺបានដំណើរការ៨០ភាគរយហើយ រដូវនេះបានទទួលមិនក្រោម៥កម្មវិធីនោះទេ ហើយកម្មវិធីដែលលោកទទួលយកភាគច្រើនគឺរៀបចំឲ្យអ្នកជំនួញ និងមន្ត្រីរាជការដែលជាម្ចាស់កម្មវិធី ត្រូវចំណាយទឹកប្រាក់ពីមួយម៉ឺនទៅបីម៉ឺនដុល្លារផងដែរ។
បន្ថែមចុងក្រោយករុណា ពេជ្រ បានបញ្ជាក់ទៀតថា ហេតុផលដែលលោកសុខចិត្តជម្រុះ ចោលការងារសិល្បៈងាកមកពង្រីកការងាររកស៊ីវិញនេះមកពីលោកយល់ថា អាជីពសិល្បៈមិនអាចស្ថិតស្ថេរបានយូរនោះទេ ហើយទាន់មានឱកាសទើបលោកចាប់ផ្តើមរៀបចំជំនួញក្រៅពីសិល្បៈ ឯការងារដេគ័រនេះបើសិនទទួលអតិថិជនច្រើនគឺប្រភពចំណូលបានច្រើនជាងការងារសិល្បៈដែរ៕
ករុណាពេជ្រ សង្វាតមុខជំនួញជាងសិល្បៈ
0 Comments