*វ៉ន វីវ៉ា ចាញ់ស៊ុយអែតទឹក១
ប្រដាល់ ៖ ឡុង សុភី អ្នកប្រដាល់ក្លិបសាលវ័ន្តកីឡា បានក្លាយជាជើងឯកម្ចាស់ខ្សែក្រវាត់ខារ៉ាបាវទម្ងន់៦៩គីឡូក្រាម ក្រោយពីរូបគេបានផ្ដួលអ្នកប្រដាល់ជើងខ្លាំង កែវ រំចង់ ក្លិបកងពលតូចអន្តរាគមន៍លេខ៨ភ្នំទ្រព្យ មិនឲ្យឡាំប៉ាបានដូចមុនៗ ក្នុងការប្រកួតផ្ដាច់ព្រ័ត្រ កាលពីយប់ថ្ងៃអាទិត្យទី២១ ខែមិថុនា ឆ្នាំ២០១៥នេះ នៅលើសង្វៀនបាយ័នស្ទឹងមានជ័យ។
កែវ រំចង់ វាយចាញ់ សុភី ដាច់តែម្ដង ក្នុងការប្រកួតផ្ដាច់ព្រ័ត្រ ដណ្ដើមខ្សែក្រវាត់ខារ៉ាបាវដែលមានប្រាក់រង្វាន់រហូតដល់៥,០០០ដុល្លារអាម៉េរិកនេះ។
រំចង់ ចាញ់ កណ្ដាប់ដៃរបស់រំចង់លែងមានប្រសិទ្ធភាពទៀតហើយ ពោលគឺពុំអាចធ្វើអ្វី សុភីបានឡើយ ផ្ទុយទៅវិញត្រូវកណ្ដាប់ដៃ កែង និងជង្គង់របស់ ឡុង សុភី វាយចូលពេញៗ ចាប់តាំងពីការប្រកួតក្នុងទឹកទី១ ដល់ទឹកទី៤នេះ។
រំចង់ បានបោះបង់ចោលការប្រកួតក្នុងទឹកទី៤ បន្ទាប់ពីត្រូវមួយកែងឆ្វេងរបស់ សុភី ចំប្រជុំចិញ្ចើមហូរឈាមខ្លាំង ដែលមិនអាចបន្តការប្រកួតទៀតបាននោះ។ ជ័យជំនះនេះបានធ្វើឲ្យ ឡុង សុភី ក្លាយជាជើងឯកម្ចាស់ខ្សែក្រវាត់ខារ៉ាបាវ ទម្ងន់៦៩គីឡូក្រាម និងជាម្ចាស់ប្រាក់រង្វាន់៥,០០០ដុល្លារអាម៉េរិក។ ឯ កែវ រំចង់ ចាញ់ក៏អស់ចិត្តដែរ ដោយបានចំណាត់ថ្នាក់លេខ២ បានទទួលប្រាក់រង្វាន់ចំនួន៣,០០០ដុល្លារអាម៉េរិក។
ចំពោះអ្នកប្រដាល់ថៃ Rareung Luk.Champacha គេបានទទួលចំណាត់ថ្នាក់លេខ៣ ក្រោយពីផ្ដួលយកឈ្នះមិត្តរួមជាតិរបស់គេ គឺ Tilek Pithakmeunkan ក្នុងទឹកទី៣នោះ។
Rareung Luk.Champacha ទទួលបានប្រាក់រង្វាន់១,២០០ដុល្លារ ហើយ Tilek Pithakmeunkanបាន៨០០ដុល្លារ។
វ៉ន វីវ៉ា អ្នកប្រដាល់ជើងខ្លាំងក្លិបព្រះខ័នរាជ ត្រូវអ្នកប្រដាល់Carl Petchsaman ជនជាតិស៊ុយអែត ហ្វឹកហាត់នៅក្នុងក្លិបGYMប្រទេសថៃ ទាត់ឲ្យខូចដៃឆ្វេងមិនអាចបន្តការប្រកួតទៀតបានក្នុងទឹកទី១។
Carl Petchsaman អ្នកប្រដាល់ជនជាតិស៊ុយអែតនេះ គេទាត់សងមួយជើងស្តាំទៅលើ វ៉ន វីវ៉ា ហើយ វីវ៉ា បានយកដៃរងទម្ងន់ជើងដ៏ខ្លាំងរបស់អ្នកប្រដាល់ស៊ុយអែតនេះ បណ្ដាលឲ្យប៉ោងកំភួនដៃ ធ្វើឲ្យប្រកួតលែងកើត។
ជាលើកទី១ហើយ ដែលគេឃើញ វ៉ន វីវ៉ា ចាញ់គូប្រកួត ដោយប្រកួតមិនទាន់ក្ដៅសាច់ផងនោះ៕
0 Comments