ភ្នំពេញ ៖ នាងកែវ ស្រីនាង ខុសពីតារាដទៃបានកៀរគរប្រាក់ទិញផ្ទះតូចធំនៅរាជធានីភ្នំពេញ តារាសម្តែងរូបនេះបានដាក់វិនិយោគរាប់សិបម៉ឺនដុល្លារ ដើម្បីសាងសង់ទ្រនំស្កឹមស្កៃនៅកែប ដែលជាកន្លែងទេសចរណ៍។
នៅលើជម្រាលមានភ្នំខៀវស្រងាត់វីឡាដែលត្រូវសាងសង់មានបែបផែនជាទីសម្រាកកាយស្រូបយកខ្យល់ដ៏បរិសុទ្ធ។ ដោយឡែកក្រៅពី វីឡាដែលមានបន្ទប់ស្នាក់អាស្រ័យគេឃើញមានអគារមួយមានរាងដូចផ្លែប៉ោមព័ទ្ធជុំវិញដោយកញ្ចក់ដែលអាចមើលពីខាងក្រៅ។
គួររំលឹកថា តារាកុនស្រស់ស្អាតរូបនេះ មិនដឹងថា សម្ងំសង់វីឡាពីពេលណាមកទេ តែគេឃើញនាងនាំមិត្តភក្តិទៅលេងកាលពីខែឧសភា ឆ្នាំ២០១៥។ ពេលនោះអ្នកដែលបានឃើញលាន់មាត់សរសើរគ្រប់ៗគ្នា។
តាមប្រភពមិត្តភក្តិនាងបានឲ្យដឹងថា ស្វាមីកែវស្រីនាង បានចំណាយពេលជាង៣ឆ្នាំសម្រាប់ការរៀបចំគេហដ្ឋាននេះ ទម្រាំបានសង់គេហដ្ឋាននេះឡើង វាមានការលំបាកដោយសារតំបន់នោះ ជាតំបន់ភ្នំដែលទាមទារឲ្យមានការគូសវាសប្លង់ឲ្យត្រឹមត្រូវ។ ប្រភពនោះបាននិយាយទៀតថា ដោយរាប់បញ្ចូលទាំងថ្លៃដីផង ទ្រនំលំហែកាយនេះមានតម្លៃជាងកន្លះលានដុល្លារអាមេរិកព្រោះផ្ទះនេះជាផ្ទះក្នុងក្តីស្រមៃរបស់នាងនិងស្វាមី។
គួររំលឹកថា ការស្រមៃនេះមិនបានបញ្ចប់តែត្រឹមនេះទេ ព្រោះនាងនៅមានបំណងពង្រីកទីលំហែនេះ ទៅជាកន្លែងទទួលភ្ញៀវទេសចរ ទៀតផង ពិសេសភ្ញៀវបរទេសនិយមចូលចិត្តស្ងប់ស្ងាត់និងមានលក្ខណៈធម្មជាតិ។
កែវ សី្រនាងជាកូនទី៤ក្នុងនោះមាន៣នាក់បានប្រឡូកសិល្បៈ ស្រីនាងមានវត្តមានលើឆាកសិល្បៈតាមរយៈបងស្រីនាងឈ្មោះកែវ ពិសី នាងបានល្បីឈ្មោះក្នុងឆ្នាំ២០០៣ក្នុងរឿង“ទណ្ឌកម្មស្នេហា“ក្នុងគ្រួសារមានជីវភាពខ្សត់ខ្សោយបូកផ្សំដោយឱកាសអំណោយផលបានជំរុញឲ្យនាងដកខ្លួនពីសិល្បៈទៅរៀបការជាមួយអ្នកជំនួញជនជាតិអង់គ្លេសឈ្មោះ Bri Yan នៅចុងឆ្នាំ២០០៣។ នៅឆ្នាំ២០០៧បានវិលចូលឆាកសិល្បៈវិញតែមិនជាប់លាប់ទេ នាងក៏លេចធ្លោក្នុងរឿងមួយទៀតគឺរឿងខ្ញុំជានរណា កាលពីឆ្នាំ២០១១។
គួររំលឹកឡើងវិញថា ក្នុងចំណោមបងប្អូនស្រីទាំងបីរបស់នាងជាអ្នកសិល្បៈស្រីនាងមានសំណាងជាងគេ មិនត្រឹមតែរឿងទ្រព្យសម្បត្តិទេ ដែលនាងមានចំណងគ្រួសារមួយដ៏រឹងមាំខុសពីបងស្រី២នាក់ទៀតគឺកែវ ពិសីនិងកែវ វលក្ខណ៍ ដែលបានបែកបាក់ស្នេហ៍កណ្តាលទី បងស្រីនាងគឺកែវ ពិសី ក៏ជានារីមានទ្រព្យ ស្តុកស្តម្ភដែរ ប៉ុន្តែអ្វីដែលខុសគ្នានោះគឺពិសីមិនទាន់
រៀបការឲ្យគេឃើញជាក់ស្តែងនៅឡើយ។
ដោយឡែកស្នេហារបស់កែវ ពិសី មិនទាមទារអ្នកទី៣ក៏ដោយតែពិសីហាក់ដូចជានៅមានអាថ៌កំបាំងខុសពីស្រីនាងដែលបានរៀបការថែមទាំងបានប្រារព្ធខួបអាពាហ៍ពិពាហ៍១០ឆ្នាំទៀតផងកាលពីឆ្នាំ២០១៤ ហើយអ្នកសិល្បៈជាច្រើនសុទ្ធតែលួចសរសើរសំណាងរបស់កែវ ស្រីនាងគ្រប់ៗគ្នា៕
0 Comments