ភ្នំពេញ ៖ តារាសម្ដែងស្រីធ្លាប់គ្រងតំណែងធ្វើជាតួឯកស្រីក្នុងខ្សែ“រឿង ជីវិតនាងរក្សា“ នាង ទេព សម្ផស្ស ស្របពេលដែលកេរ្តិ៍ឈ្មោះ និងប្រជាប្រិយភាព ហាក់កំពុងមានស្ទុះហក់ឡើងក្នុងអាជីពសម្ដែងសិល្បៈថ្មីៗនេះ ស្រាប់តែធ្លាយដំណឹងដ៏គួរឲ្យភ្ញាក់ផ្អើលមកថា បច្ចុប្បន្ននាងកំពុងលួចលាក់មានទំនាក់ទំនងស្នេហាក្រៅឆាកជាមួយបុរសជនជាតិហ្វីលីពីន ដែលរស់នៅក្នុងស្រុកខ្មែរម្នាក់។
តារាសម្ដែងនិយមការស្លៀកពាក់បែបសិចស៊ី នាង ទេព សម្ផស្ស ត្រូវបានគេកត់សម្គាល់ឃើ ញថា ចាប់តាំងពីនាងចូលប្រឡូកនឹងអាជីពជាតារាសម្ដែងមក គេកម្របានឃើញតារារូបនេះបណ្ដើរបុរសប្លែកមុខណាម្នាក់ជាសាធារណៈ ឬចូលរួមក្នុងកម្មវិធីណាមួយនោះឡើយ។ ប៉ុន្តែផ្ទុយទៅវិញពេលនេះស្រាប់តែបែកធ្លាយរឿងតារារូបនេះលួចភ្ជាប់ចំណងស្នេហាជាមួយបុរសជនជាតិហ្វីលីពីនស្របពេលដំណើរគ្នានឹងការលេចឭព័ត៌មានថានាងក៏កំពុងមានកូនមួយ ជាចំណងដៃផងដែរ។
ប្រភពពីរង្វង់អ្នកសិល្បៈជិតដិតតារាស្រីរូបនេះបានបង្ហើបប្រាប់ថា តារាសម្ដែង នាង ទេព សម្ផស្ស បន្ទាប់ពីបានល្បីឈ្មោះតាមរយៈការគ្រងតំណែងជាតួឯកក្នុង“រឿង ជីវិត នាងរក្សា” មកនោះ ពេលនោះ នាងហាក់មានយីអ៊ុនខ្ពស់ផងដែរ ក្នុងរឿងជីវិតស្នេហាឯកជនផ្ទាល់ខ្លួនខាងក្រៅខណៈពេលបច្ចុប្បន្នគេដឹងថា នាង ទេព សម្ផស្ស បានភ្ជាប់ចំណងស្នេហាលួចលាក់ជាមួយបុរសជនជាតិហ្វីលីពីន ហើយថែមទាំងបានរស់នៅក្រោមដំបូលផ្ទះជាមួយគ្នា ជាប្ដីប្រពន្ធ និងមានកូនមួយជាចំណងដៃទៀតផង។
ប្រភពខាងលើបាននិយាយបន្តទៀតថា ចំពោះទំនាក់ទំនងស្នេហាក្រៅឆាក រវាងនាង ទេព សម្ផស្ស ជាមួយបុរសជនជាតិហ្វីលីពីននេះ គឺមានរយៈពេលយូរឆ្នាំមកហើយ គ្រាន់តែរឿងនេះត្រូវបានបិទបាំងពីភ្នែកមហាជនអ្នកគាំទ្រតែប៉ុណ្ណោះ។ ចំណងស្នេហា រវាងពួកគេទាំងពីរ បានកើតឡើងក្រោមរូបភាពនៃការចុះអេតាស៊ីវិលស្ងាត់ៗ ប៉ុន្តែមិនទាន់ឈានដល់ដំណាក់កាលនៃការរៀបអាពាហ៍ពិពាហ៍ជាផ្លូវការ ឬបើកចំហឲ្យមហាជនអ្នកគាំទ្របានដឹងឭជាសាធារណៈណាមួយនៅឡើយទេ។
ប្រភពដដែលនេះបានបញ្ជាក់ថា បច្ចុប្បន្ន គូរស្នេហ៍ពួកគេទាំងពីរកំពុងតែសាងភាពផ្អែមល្ហែមនិងល្អូកល្អិននជាមួយគ្នានៅក្រោយគំនរលុយយ៉ាងច្រើន ដែលបានមកពីបុរសម្ចាស់ស្នេហ៍ម្នាក់នេះ។ ប៉ុន្តែស្របគ្នានេះដែរ ក៏មានព័ត៌មានល្ហៀកៗដែរថា សព្វថ្ងៃ នាង ទេព សម្ផស្ស ក៏មានលោកមន្ត្រីធំម្នាក់តាមប្រមាញ់បេះដូងផងដែរ ព្រោះកន្លងទៅ នាងត្រូវបានលោកមន្ត្រីម្នាក់នោះជាអ្នកជួយជ្រោមជ្រែងឲ្យល្បីឈ្មោះ និងគ្រងតំណែងជាតួឯកក្នុងខ្សែរឿងភាគផងដែរ។
ជុំវិញការលេចឭព័ត៌មានខាងលើនេះ កម្ពុជាថ្មី នៅរសៀលថ្ងៃទី១៩ ខែមិថុនា ឆ្នាំ២០១៥នេះ មិនអាចស្វែងរកការបំភ្លឺណាមួយពីសំណាក់តារាសម្ដែង កញ្ញា ទេព សម្ផស្ស បានទេ។ ដូច្នេះកម្ពុជា ថ្មីរង់ចាំស្វាគមន៍ជានិច្ចចំពោះការចេញមុខបកស្រាយពីសំណាក់តារាសម្ដែងរូបស្រស់ ទេព សម្ផស្ស នៅពេលក្រោយ៕
0 Comments