កំពង់ចាម ៖ ទីតាំងសិប្បកម្មបូមខ្សាច់មួយកន្លែង ត្រូវបានគេដឹងថា កំពុងធ្វើសកម្មភាពបូមយ៉ាងអានាធិបតេយ្យ ខុសលក្ខណៈបច្ចេកទេសនិងទីតាំងផ្ទុយពីច្បាប់អនុញ្ញាតដែលចេញដោយមន្ទីរជំនាញ ឧស្សាហ៍កម្មរ៉ែនិងថាមពលខេត្ត កាលពីពេលថ្មីៗកន្លងទៅនេះ។
ទីតាំងសិប្បកម្មបូមខ្សាច់ខាងលើ បាននឹងកំពុងធ្វើសកម្មភាព នៅក្នុងភូមិពាមជីកង ឃុំពាមជីកង ស្រុកកងមាស ខេត្តកំពង់ចាម ត្រូវបានគេដឹងថា ជារបស់ថៅកែម្នាក់ឈ្មោះជោត សុជា គឺទើបនិងបានចាប់ផ្តើមដំណើរបូម កាលពីចុងសប្ដាហ៍កន្លងទៅនេះបន្ទាប់ពីកម្លាំងចម្រុះនៃមន្ទីរជំនាញឧស្សាហកម្មខេត្តកំពង់ចាម បានចុះទៅពិនិត្យ វាស់និងកំណាត់ទីតាំង ដោយតម្រូវឲ្យ ម្ចាស់សិប្បកម្មខាងលើ ប្រើប្រាស់សំភារៈមធ្យោបាយបូម ទៅតាមច្បាប់សម្រាប់សិប្បកម្មខ្នាតតូចដែលចេញមន្ទីរជំនាញក៏ដូរជាអាជ្ញាធរខេត្តផងដែរ។
គួរបញ្ជាក់ផងដែរថា បន្ទាប់ពីអាជ្ញាធរក៏ដូចជាមន្ទីរជំនាញបានចុះទៅពិនិត្យ កាលពីថ្ងៃទី១៩ ខែមិថុនា ឆ្នាំ២០១៥កន្លងទៅ ដោយកំណាត់គោលដៅ លើផ្ទៃដី១០០ម៉ែត្របួនជ្រុង ដោយដាក់ប៉ូងចំនួន៤ជ្រុងសម្រាប់សំគាល់ រីឯលក្ខណៈបច្ចេកទេស គឺអនុញាតឲ្យប្រើប្រាស់ម៉ាស៊ីនបូមត្រឹមតែ៧៥សេស និងទុយោដែលមានមុខកាត់ត្រឹមតែ១តឹកប៉ុណ្ណោះ។
ម្ចាស់ទីតាំងសិប្បកម្ម ឈ្មោះជោត សុជា ចាប់ផ្តើមធ្វើសកម្មភាពបូមគឺបានធ្វើផ្ទុយពីច្បាប់ អនុញ្ញាតរបស់មន្ត្រីជំនាញទៅវិញ ទើបបានជាមានមតិរិះគន់ថា មន្ទីរជំនាញឧស្សាហកម្មខេត្ត ហាក់បីដូចជាមានការឃុបឃិតបើកដៃឬយ៉ាងណា បានជាគ្រាន់តែ ចុះទៅពិនិត្យកំណាត់គោលរួចភ្លាមថៅកែ ខាងលើមិនអនុវត្តន៍តាម បែរជាបង្វែរគោលដៅ របស់ខ្លួនទៅផ្នែកខាងក្រៅឆ្ងាយខុសពីចំណុចគោលដៅដែលច្បាប់អនុញ្ញាតឲ្យ។ រីឯលក្ខណៈបច្ចេកទេសវិញ គាត់បានប្រើប្រាស់ម៉ាស៊ីនបូមរហូតទៅដល់ ទៅជិត២០០សេស និងទុយោ បូមដែលមានមាត់កាត់១តឹកកន្លះឯណោះ ក្នុងនោះគេមិនឃើញមន្ត្រីជំនាញណាមួយអើពើនោះឡើយ។
ដោយឡែកពេលដែល លោក លី ចាន់ធី ប្រធានមន្ទីរឧស្សាហកម្មខេត្តកំពង់ចាម បានឲ្យដឹងតាមទូរស័ព្ទដៃ កាលពីព្រឹកថ្ងៃទី២២ ខែមិថុនានេះថា ទីតាំងសិប្បកម្មខាងលើមានច្បាប់ គ្រប់គ្រាន់ហើយ ដោយម្ចាស់សិប្បកម្មបានដាក់ពាក្យស្នើសុំតាមរយៈអាជ្ញាធរភូមិ ឃុំ ស្រុកខេត្ត ហើយកន្លងទៅអាជ្ញាធរខេត្តក៏ដូចជាមន្ត្រីជំនាញមាន មន្ទីរបរិស្ថាន និងមន្ទីរឧស្សាហកម្មរ៉ែនិងថាមពលខេត្តបានចុះទៅពិនិត្យកំណាត់គោលដៅទីតាំងនិងលក្ខណៈបច្ចេកទេស រួចហើយដែរ ដោយបានធ្វើកិច្ចសន្យាឲ្យម្ចាស់សិប្បកម្មរ៉ែ ប្រើប្រាស់មធ្យោបាយ តាមលក្ខណៈបច្ចេកទេសឲ្យបានត្រឹមត្រូវ។
លោកប្រធានមន្ទីរបន្តថា ចំពោះការប្រើទុយោធំ ឬម៉ាស៊ីនលើស ខុសលក្ខណៈបច្ចេកទេស នោះលោកបានហៅ ម្ចាស់សិប្បកម្មមកធ្វើកិច្ចសន្យារួចរាល់ហើយ បើគេមិនអនុវត្តតាមច្បាប់កំណាត់ទេនោះ មន្ត្រីជំនាញ ចុះផ្អាកសកម្មភាពមិនឲ្យបន្តដំណើរទៀតបានទេ៕
0 Comments