អធិការបតីអាល្លឺម៉ង់លោកស្រី Angela Merkel បានឈានដល់កិច្ចព្រមព្រៀងមួយកាលពីថ្ងៃចន្ទលើបញ្ហាអន្តោប្រវេសន៍ជាមួយរដ្ឋមន្ត្រីក្រសួងមហាផ្ទៃលោក Horst Seehofer ដែលជាហេតុធ្វើឲ្យមានភាពថមថយលើជម្លោះដ៏ជូរចត់ដែលបានគំរាមកំហែងរដ្ឋាភិបាលរបស់លោកស្រី។
លោកស្រី Merkel បានថ្លែងថា “ភាគីទាំងពីរបានឈានដល់ការសម្រុះសម្រួលដ៏ល្អមួយបន្ទាប់ពីការតស៊ូដ៏ស្វិតស្វាញនិងពេលវេលាលំបាកៗ”។ លោកស្រីបានបន្ថែមថា កិច្ចព្រមព្រៀនេះគឺពាក់ព័ន្ធនឹងការបង្កើតមណ្ឌលសម្រាប់អ្នកស្វែងរកសិទ្ធិជ្រកកោននៅជិតព្រំដែនអាល្លឺម៉ង់។
ចំណែកលោក Seehofer បានឯកភាពថា “យើងបានឈានដល់កិច្ចព្រមព្រៀងមួយបន្ទាប់ពីការចរចារយ៉ាងខ្លាំងក្លា”។ លោកបានសង្កត់ធ្ងន់ថា លោកមានបំណងបន្តនៅក្នុងតំណែងគណរដ្ឋមន្ត្រីរបស់លោកបន្ទាប់ពីគំរាមលាឈប់កាលពីមុន។
លោក Seehofer ដែលគណបក្ស CSU របស់គាត់ជាសម្ព័ន្ធមិត្តនៃរដ្ឋ Bavaria របស់គណបក្ស CDU របស់លោកស្រី Merkel នោះបាននិយាយថា “ឥឡូវនេះ យើងមានកិច្ចព្រមព្រៀងច្បាស់លាស់មួយអំពីវិធីទប់ស្កាត់ការធ្វើអន្តោប្រវេសន៍ខុសច្បាប់ឆ្លងកាត់ព្រំដែនអូទ្រីស - អាល្លឺម៉ង់នាពេលអនាគត”។
ទោះបីជាយ៉ាងណាក៏ដោយ កិច្ចព្រមព្រៀងនេះនៅតែត្រូវការការយល់ព្រមពីដៃគូចម្រុះផ្សេងទៀតរបស់លោកស្រី Merkel ដើម្បីក្លាយជាគោលនយោបាយរបស់រដ្ឋាភិបាល។
លោកស្រី Merkel បានប្រឈមមុខនឹងប្រតិកម្មយ៉ាងខ្លាំងក្លានិងបានចុះខ្សោយនៅក្នុងការបោះឆ្នោតដោយសារតែការសម្រេចចិត្តរបស់លោកស្រីនៅឆ្នាំ២០១៥ក្នុងការរក្សាព្រំដែនអាល្លឺម៉ង់ឲ្យបើកចំហរដល់លំហូរជនចំណាកស្រុកដ៏ធំដែលភាគច្រើនមកពីប្រទេសស៊ីរី អ៊ីរ៉ាក់និងអាហ្វហ្គានីស្ថានដែលនាំឲ្យមានការមកដល់នៃមនុស្សជាងមួយលាននាក់។
កំហឹងនិងភាពភ័យខ្លាចជាសាធារណៈអំពីអ្នកចំណូលថ្មីបានជួយជំរុញប្រជាប្រិយភាពដល់គណបក្សប្រឆាំងឥស្លាម Alternative for Germany (AfD) ដែលបានចូលសភាកាលពីឆ្នាំមុននិងគំរាមកំហែងគណបក្ស CSU របស់លោក Seehofer នៅក្នុងការបោះឆ្នោតរដ្ឋ Bavaria នៅខែតុលា៕ AFP
Source: Kampuchea Thmey Daily
0 Comments