រតនគិរី ៖ បុរសម្នាក់ ជិះម៉ូតូទៅបុកគូថគោយន្តកែច្នៃពីក្រោយយ៉ាងពេញទំហឹងបណ្តាលឲ្យរងរបួសធ្ងន់ធ្ងរ ខណៈគោយន្តកែច្នៃបែកកង់ឈប់នៅចិញ្ចើមផ្លូវជាតិមិនបានដាក់ជាសញ្ញាសម្គាល់ឲ្យដឹងក្នុងទិសដៅពីលិចទៅកើត។
គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៦និង៣០នាទីយប់ថ្ងៃទី១៥ ខែកក្កដា ឆ្នាំ២០១៨ តាមបណ្តោយផ្លូវជាតិលេខ៧៨ ត្រង់ចំណុចមុខសាលារៀនបុរីកម្មករ១ ស្ថិតនៅក្នុងភូមិ១ សង្កាត់កាចាញ ក្រុងបានលុង។
មេប៉ុស្តិ៍កាចាញលោក សួន សាវុធ បានឲ្យដឹងថា អ្នកបើកបរម៉ូតូឈ្មោះ ចាន់ រិទ្ធី ភេទប្រុស អាយុ៣៦ឆ្នាំ ជនជាតិខ្មែរ មុខរបរគ្រូបង្រៀន រងរបួសធ្ងន់ ជិះម៉ូតូមួយគ្រឿងម៉ាក វី វ៉ា ពណ៌ខ្មៅ ពាក់ស្លាកលេខកំពត.1.B.5932 មានទីលំនៅភូមិអូរកន្សែង សង្កាត់បឹងកន្សែង ក្រុងបានលុង។
លោកមេប៉ុស្តិ៍កាចាញ បន្តថា ម្ចាស់គោយន្តកែច្នៃក្រោយកើតហេតុបានរត់គេចខ្លួនបាត់បន្សល់ទុកគោយន្តនៅកន្លែងកើតហេតុ។
ក្រោយកើតហេតុសមត្ថកិច្ចមូលដ្ឋានចុះមកអន្តរាគមន៍ធ្វើការវាស់វែង និងបានទំនាក់ទំនងទៅរថយន្តសង្គ្រោះរបស់ស្នងការនគរបាលខេត្តដឹកបញ្ជូនជនរងគ្រោះនៅមន្ទីរពេទ្យបង្អែកខេត្តដើម្បីសង្គ្រោះ។
ដោយឡែកមធ្យោបាយទាំងពីរគ្រឿងត្រូវបានកម្លាំងនគរបាលចរាចរណ៍យកទៅរក្សាទុកនៅស្នងការដ្ឋាននគរបាលខេត្តដើម្បីរង់ចាំធ្វើការការដោះស្រាយនៅពេលក្រោយ៕
Source: Kampuchea Thmey Daily
0 Comments