ស្ថានភាពជំនន់ទឹកភ្លៀងនៅចំណុចស្ពានស្ទឹងសំរោងកាន់តែអាក្រក់ និងចាប់ផ្តើមលិចផ្ទះប្រជាពលរដ្ឋជាបណ្តើរៗ

ព្រះសីហនុ ៖ ស្ថានភាពជំនន់ទឹកភ្លៀងក្នុងតំបន់មួយចំនួនក្នុងស្រុកកំពង់សិលា ខេត្តព្រះសីហនុ និងស្រុកស្រែអំបិល ខេត្តកោះកុង កាន់តែអាក្រក់ទៅៗ ខណៈមេឃកំពុងភ្លៀងធ្លាក់ឥតឈប់ហើយអាជ្ញាធរកំពុងជួយសង្គ្រោះជម្លៀសចេញពីលំនៅឋាន ដែលរងការលិចលង់ ទៅកាន់ទីទួលមាន សុវត្ថិភាព។

គិតត្រឹមម៉ោងប្រមាណជាង ១៥រសៀល ថ្ងៃទី១៧ ខែកក្កដា ឆ្នាំ២០១៨នេះ ជំនន់ទឹកភ្លៀងកាន់តែអាក្រក់ឡើងមិនមានសញ្ញានឹងស្រកចុះឆាប់ឡើយ បើភ្លៀងនៅតែបន្តធ្លាក់ខ្លាំងបែបនេះ។

សេចក្តីរាយការណ៍បានឲ្យដឹងថា ស្ថានភាពជំនន់ទឹកភ្លៀងបានហូរលើផ្លូវជាតិលេខ៤ ត្រង់ចំណុចស្ពានស្ទឹងសំរោង ស្រុកកំពង់សិលា បានឡើងដល់កម្ពស់ជិត ២ម៉ែត្រ និងមានប្រវែងរហូតដល់ជាង ១០០០ម៉ែត្រឯណោះ។ ប្រភពបាន បន្តទៀតថា បើអាកាសធាតុនៅតែអាប់អួរ និងភ្លៀងមិនរាំងរបៀបនេះ តទៅទៀតនោះ ទឹកភ្លៀង និងហូរធ្លាក់មកពី ជើងភ្នំកំចាយហូរចូលតាមស្ទឹងសំរោងមកជនលិចលើកំណាត់ផ្លូវជាតិលេខ៤ កាន់តែយូរជាក់ជាមិនខាន។

ដើម្បីរក្សាសុវត្ថិភាព ក្រុមសមត្ថកិច្ចបានបញ្ចៀសចរាចរណ៍ ដោយបិទបារ៉ាស់នៅដើមទីចុងទី និងបង្វែរទិសចរាចរណ៍ឲ្យឆ្លងកាត់តាមផ្លូវជាតិលេខ៣ខេត្តកំពតវិញ។

ដោយស្ថានភាពជំនន់ទឹកភ្លៀងហក់ឡើងគួរឲ្យបារម្ភបែបនេះ លោក វ៉ី សំណាង អភិបាលខេត្តកំពង់ស្ពឺ បានដឹកនាំមន្ត្រីជំនាញចុះទៅពិនិត្យដោយផ្ទាល់នៅស្ពានអូរគគីរ ដែលជាប់ព្រំប្រទល់ខេត្តព្រះសីហនុ និងខេត្តកំពង់ស្ពឺ ព្រមទាំងធ្វើដំណើរបន្តដល់ចំណុចស្ពានស្ទឹងសំរោង ដែលទទួលរងការលិចខ្លាំងផងដែរ។

ក្រុមការងារដឹកនាំដោយអភិបាលខេត្តកំពង់ស្ពឺ បានបញ្ជាក់ថា បណ្តោយផ្លូវជាតិលេខ៤ ត្រង់ចន្លោះគីឡូម៉ែត្រលេខ (១១៥-១១៦) នៅឃុំអូរបាក់រទេះ ស្រុកកំពង់សិលា ខេត្តព្រះសីហនុ មានភ្លៀងជន់លិចស្ពានស្ទឹងសំរោងកម្ពស់ប្រមាណ ជិតម៉ែត្រ ប្រវែងប្រមាណជា ១គីឡូម៉ែត្រ។ ចំពោះជំនន់ទឹកភ្លៀងនេះមួយផ្នែក បានចុះធ្លាក់ចូលមកស្ទឹងព្រែកត្នោតផងដែរ។

បន្ទាប់ពិនិត្យស្ថានភាពនៅផ្លូវជាតិលេខ៤រួច លោក វ៉ី សំ ណាង ដឹកនាំកម្លាំងសមត្ថកិច្ច និងអាជ្ញាធរស្រុកភ្នំស្រួច ជម្លៀសប្រជាពលរដ្ឋចេញលំនៅឋានទៅកន្លែងទីទួលសុវត្ថិភាព នៅឃុំក្រាំដីវាយ និង តាំងសំរោង ស្រុកភ្នំស្រួច ខេត្តកំពង់ស្ពឺ។

លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយម ខេត្តកកំពង់ស្ពឺ មិនអាចទំនាក់ទំនងសុំការបំភ្លឺអំពី ស្ថានភាពទំនប់រលាំងជ្រៃ ក្នុងស្រុកសំរោងទងមានកម្ពស់ ប៉ុន្មាន អាចដល់ចំណុចប្រកាសអាសន្នហើយឬនៅនោះទេ ព្រោះទូរស័ព្ទមិនអាចទំនាក់ទំនងបានរហូត។

លោកឧត្តមសេនីយ៍ទោ ទួច លីន មេបញ្ជាការរង នៃបញ្ជាការដ្ឋាន ការការពារកោះឆ្នេរ ដែលឈរជើងលើផ្លូវជាតិលេខ៤ បានប្រាប់ឲ្យដឹង នៅថ្ងៃទី១៧ ខែកក្កដា ឆ្នាំ២ ០១៨ នេះថា ជំនន់ទឹកភ្លៀងបានកំពុងជន់លិចផ្លូវជាតិលេខ ៤បន្តទៀត ត្រង់ចំណុចស្ពានស្ទឹងសំរោង ស្រុកកំពង់សិលា ខេត្តព្រះសីហនុ ដែលមានកម្ពស់ជាង១ម៉ែត្រ។

លោកឧត្តមសេនីយ៍ទោ បានបន្តទៀតថា នៅព្រឹកមិញនេះគឺទឹកចាប់ផ្តើមហក់ឡើងលិចផ្លូវជាតិលេខ៤ ត្រង់ចំណុច ស្ពានអូរគគីរ ដែលជាប់ព្រំប្រទល់ស្រុកភ្នំស្រួច ខេត្តកំពង់ស្ពឺ ជាមួយស្រុកកំពង់សិលា ខេត្តព្រះសីហនុ ប៉ុន្តែរហូតដល់ថ្ងៃត្រង់ ថ្ងៃទី១៧ ខែកក្កដានេះ បានស្រកទៅវិញ។ លោកបានបន្តទៀតថា ទោះបីទឹកនៅស្ពានអូរគគីរចាប់ផ្តើមស្រកក៏ពិតមែន តែការធ្វើចរាចរនៅមិនអាចធ្វើដំណើរឆ្លងកាត់បានទេ ព្រោះបង្វែរឡើងជន់លិចស្ពានស្ទឹងសំរោងកម្ពស់រហូតជាង ១ម៉ែត្រ។

លោកឧត្តមសេនីយ៍ទោ ទួច លីន មេបញ្ជាការរង នៃ បញ្ជាការដ្ឋាន ការពារកោះឆ្នេរ បានបញ្ជាក់ថា ខណៈពេលនេះភ្លៀងនៅតែបន្តធ្លាក់យ៉ាងខ្លាំងតាមជួរភ្នំគិរីរម្យ ជួរភ្នំកំចាយ និងជួរភ្នំបូកគោធ្វើឲ្យមានទឹកហូរធ្លាក់មកច្រើនប្រសិនបើភ្លៀងមិនរាំងទេនោះ ជំនន់ទឹកភ្លៀងមិនស្រកឡើយ៕

លោក ហុង ចាន់សុខា ប្រធានមន្ទីរសាធារណការ និងដឹកជញ្ជូន ខេត្តកំពង់ស្ពឺ បានធ្វើការជូនដំណឹងដល់សាធារណះជន ដែលធ្វើដំណើរទៅខេត្តព្រះសីហនុ តាមផ្លូជាតិលេខ៤ ទាំងអស់បង្កើនការប្រុង ប្រយ័ត្ន រាល់ការធ្វើដំណើរត្រង់ចំណុច ភូមិសាស្ត្រ គីឡូម៉ែត្រ (116-117) ត្រង់ស្ពានស្ទឹងសំរោងព្រោះចាន់ផ្តើមលិចស្ពានហើយ។

ដើម្បីធានានៅសុវត្ថិភាព អាជ្ញាធរខេត្តកំពង់ស្ពឺ និង មន្ទីរជំនាញ សូមធ្វើការផ្អាកចរាចរណ៏បណ្តោះអាសន្ន រហូតដល់ទឹកស្រក់ចុះវិញ ហើយសូមធ្វើការណែនាំបញ្ជៀសទិសចរាចរណ៏ទៅកាន់ផ្លូវលេខ៣ និងលេខ៤១ អ្នកត្រូវធ្វើដំណើរ មេត្តាអត់ធ្មត់ និងប្រកបដោយសុវត្ថិភាពខ្ពស់។

តាមរបាយពីសមត្ថកិច្ចស្រុកស្រែអំបិល ខេត្តកោះកុង នារសៀ ថ្ងៃទី១៧ ខែកក្កដា ឆ្នាំ២០១៨នេះ បានឲ្យដឹងថា ជំនន់ទឹកភ្លៀងលិចភូមិដ្ឋានប្រជាពលរដ្ឋ ឃុំដងពែង ស្រុកស្រែអំបិលអស់ឃាច្រើនខ្នង និងកំពុងសង្គ្រៅទៅកាន់ទីទួលមានសុវត្តិភាព ដើម្បីស្នាក់នៅជាបណ្តោះអាសន្ន។

សូមបញ្ជាក់ថា ក្នុងរយៈពេលប៉ុន្មានថ្ងៃកន្លងមកនេះភ្លៀងបានធ្លាក់ទាំងថ្ងៃទាំងយប់ហើយស្ថានភាពពេលនេះទឹកកំពុងឡើងខ្លាំង អជ្ញាធរខេត្តកោះកុង បានអំពាវនាវឲ្យបងប្អូនប្រជាពលរដ្ឋដែលមានលំនៅដ្ឋានតាមដងព្រែក ក្នុងស្រុកស្រែអំបិល មេត្តាប្រុងប្រយ័ត្នឲ្យបានខ្ពស់ ព្រោះស្ថានភាពទឹកតាមដងព្រែកកំពុងមានការកើនឡើងខ្លាំង៕