លោកប្រធានាធិបតី ដូណាល់ ត្រាំ បានបដិសេធប្រឈមមុខជាមួយលោក វ្ល៉ាឌីមៀរ ពូទីន ពាក់ព័ន្ធការជ្រៀតជ្រែកក្នុងការបោះឆ្នោតអាមេរិកនៅឯជំនួបកំពូលទល់មុខគ្នាជាលើកដំបូង។
ប្រធានាធិបតីអាមេរិកនិងរុស្ស៊ីបានចាកចេញពីកិច្ចប្រជុំរបស់ពួកគេនៅក្នុងទីក្រុង ហេលស៊ីនគី កាលពីថ្ងៃចន្ទដើម្បីបង្ហាញពីបំណងប្រាថ្នាសម្រាប់ការចាប់ផ្តើមថ្មីមួយរវាងមហាអំណាចនុយក្លេអ៊ែរឈានមុខទាំងពីររបស់ពិភពលោកនិងកិច្ចពិភាក្សាបន្ថែមទៀតស្តីពីបញ្ហាប្រឈមជាសកលបន្ទាប់ពីបានពិភាក្សាគ្នាអំពីបញ្ហាជាច្រើនដូចជាបញ្ហាប្រទេសស៊ីរី អ៊ុយក្រែននិងចិនព្រមទាំងអំពីបញ្ហាពន្ធពាណិជ្ជកម្មនិងទំហំនៃឃ្លាំងអាវុធនុយក្លេអ៊ែររបស់ពួកគេ។
ឈរនៅក្បែរមេវិមានក្រឹមឡាំងក្នុងសន្និសីទព័ត៌មានរួមមួយ, លោក ត្រាំ បានទទួលស្គាល់ថាប្រមុខស៊ើបការណ៍សម្ងាត់របស់គាត់ជឿថា ប្រទេសរុស្ស៊ីបាន Hack និងទម្លាយអ៊ីម៉ែលរបស់គណបក្សប្រជាធិបតេយ្យដែលមានព័ត៌មានបំផ្លិចបំផ្លាញខាងនយោបាយអំពីគូប្រជែងរបស់គាត់គឺលោកស្រី ហ៊ីលឡារី គ្លីនតុន នៅក្នុងឆ្នាំ២០១៦។
ប៉ុន្តែដោយទទូចថាគាត់បានឈ្នះការបោះឆ្នោតដោយយុត្តិធម៌និងសមរម្យនោះ មហាសេដ្ឋីអចលនទ្រព្យរូបនេះបាននិយាយថា “ខ្ញុំមានលោកប្រធានាធិបតីពូទីន គាត់គ្រាន់តែនិយាយថា វាមិនមែនជាប្រទេសរុស្ស៊ីទេ។ ខ្ញុំនឹងនិយាយរឿងនេះ ខ្ញុំមិនឃើញហេតុផលណាមួយនោះទេ”។
មេដឹកនាំអាមេរិករូបនេះបានលើកឡើងថា សមភាគីរបស់គាត់បានធ្វើការបដិសេធយ៉ាងខ្លាំងក្លាចំពោះការចោទប្រកាន់លើរុស្ស៊ីហើយថា ការស៊ើបអង្កេតដោយរដ្ឋអាជ្ញាពិសេសលោក Robert Muller បានបង្ហាញថាជា “គ្រោះមហន្តរាយ” សម្រាប់សហរដ្ឋអាមេរិក។
ខណៈការរិះគន់បានកើនឡើងនោះ លោក ត្រាំ បានបង្ហោះ Twitter ចេញពីយន្តហោះ Air Force One តាមផ្លូវវិលត្រឡប់មកពីប្រទេសហ្វាំងឡង់វិញថា គាត់មាន “ទំនុកចិត្តដ៏អស្ចារ្យចំពោះប្រជាជនដ៏ឆ្លាតវៃរបស់ខ្ញុំ”។
លោកបាននិយាយថា “ទោះបីជាយ៉ាងណាក៏ដោយ ខ្ញុំក៏ទទួលស្គាល់ផងដែរថា ដើម្បីកសាងអនាគតភ្លឺស្វាង យើងមិនអាចផ្ដោតទៅលើអតីតកាលបានទេ។ ក្នុងនាមជាប្រទេសមហាអំណាចនុយក្លេអ៊ែរធំបំផុតរបស់ពិភពលោក យើងត្រូវតែដើរជាមួយគ្នា”៕ AFP
Source: Kampuchea Thmey Daily
0 Comments