កណ្ដាល ៖ បុរសឈាមក្ដៅ ដោយសារតែលួចប្រចណ្ឌប្រពន្ធរបស់ខ្លួនអស់រយៈពេលជាងបីឆ្នាំមកហើយនោះ មកដល់ពេលនេះ បានសម្រេចលួចធ្វើឃាតប្រពន្ធដោយកាប់ទៅប្រពន្ធចំនួន៥ពូថៅបណ្ដាលឲ្យដេកស្លាប់ក្នុងថ្លុកឈាម ខណៈនាងប្រពន្ធដេកលង់លក់ដោយមិនដឹងខ្លួនសោះនោះហើយនាំកូនរត់គេចខ្លួនទៅស្រុកកំណើត លុះរំលងបាន១ថ្ងៃក្រោយមក ទើបសមត្ថកិច្ចតាមចាប់ខ្លួនបាន។
ករណីឃាតកម្មលើប្រពន្ធខ្លួនឯងនេះ បានកើតឡើងកាលពីវេលាម៉ោង៨និង៣០នាទីយប់ ថ្ងៃទី១៥ខែកក្កដា ឆ្នាំ២០១៨ នៅចំណុចលើផ្ទះជនរងគ្រោះ ស្ថិតនៅភូមិអង្គពពាយ ឃុំក្រាំងម្កាក់ ស្រុកអង្គស្នួល ខេត្តកណ្តាល ប៉ុន្ដែបន្ទាប់ពីសមត្ថកិច្ចធ្វើការស្រាវជ្រាវចប់សព្វគ្រប់រហូតឈានដល់ការចាប់ខ្លួនឃាតករបាន និងកសាងសំណុំរឿងរួចរាល់ដល់ព្រឹកថ្ងៃទី១៧ ខែកក្កដានេះ ទើបសមត្ថកិច្ចបង្ហាញរបាយការណ៍ជាសាធារណៈ។
ជនរងគ្រោះមាន ឈ្មោះ ឈិត ម៉ាច ភេទស្រី អាយុ៣៦ឆ្នាំ ជនជាតិខ្មែរមុខរបរកម្មការិនីរោងចក្រមានទីលំនៅភូមិអង្គពពាយ ឃុំក្រាំងម្កាក់ស្រុកអង្គស្នួល ខេត្តកណ្តាល។ ជនសង្ស័យជាប្ដីឈ្មោះ ណន ណាត អាយុ៣៣ឆ្នាំ ជនជាតិខ្មែរ មុខរបរកម្មករសំណង់ មានទីលំនៅ សព្វថ្ងៃស្នាក់នៅក្នុងភូមិកើតហេតុ និងមានស្រុកកំណើតនៅភូមិត្រពាំងក្រសាំង ឃុំក្សេមក្សាន្ដ ស្រុកឧដុង្គ ខេត្តកំពង់ស្ពឺ។
វត្ថុតាងចាប់យក មានពូថៅដៃ០១ដងឈើប្រវែង២៣សង់ទីម៉ែត្រ។ បន្ទាប់ពីធ្វើការស្រាវជ្រាវជុំវិញករណីនេះ សមត្ថកិច្ចបានឲ្យដឹងថា នៅមុនពេលកើតហេតុវេលាយប់ថ្ងៃទី១៥ ខែកក្កដា ឆ្នាំ២០១៨ជនរងគ្រោះ និងជនសង្ស័យ ជាប្តីប្រពន្ធ នឹងគ្នា បានឈ្លោះប្រកែកគ្នា ហើយក៏ស្ងាត់មាត់បាត់ទៅ លុះពេលជនរងគ្រោះដេកលង់លក់ជនសង្ស័យបានយកពូថៅដៃរបស់ខ្លួន កាប់លើជនរងគ្រោះចំនួន៥ពូថៅសំដៅចំក្បាលបណ្តាលឲ្យស្លាប់ភ្លាមៗហើយយកភួយគ្រប ដណ្តប់ពីលើសពប្រពន្ធធ្វើដូចគ្មានរឿងអីកើតឡើងនោះទេ។ លុះព្រឹកឡើងថ្ងៃទី១៦ ខែកក្កដា ឆ្នាំ២០១៨ វេលាម៉ោង៨ព្រឹកជនសង្ស័យ បាននាំកូន២នាក់តូចៗ ជិះម៉ូតូគេចខ្លួនទៅសម្ងំនៅឯស្រុកកំណើតនៅភូមិត្រពាំងក្រសាំង ឃុំក្សេមក្សាន្ត ស្រុកឧដុង្គខេត្តកំពង់ស្ពឺបាត់ទៅ។
ប្រភពបន្ដថា រហូតដល់ថ្ងៃទី១៦ ខែកក្កដា ឆ្នាំ២០១៨ វេលាម៉ោង១៩យប់ឈ្មោះ ឈិត តាក់ភេទប្រុស អាយុ២៧ឆ្នាំ ស្នាក់នៅភូមិជាមួយគ្នា ត្រូវជាប្អូនបង្កើតរបស់ជនរងគ្រោះឃើញផ្ទះបងមិនឃើញបើកភ្លើងអំពូល ក៏បានដើរទៅមើល ហើយស្រែកហៅមិនឮសូរឆ្លើយ។ បន្ទាប់មកបានឡើងទៅមើលនៅលើផ្ទះ និងបានបញ្ចាំងភ្លើងពិលមើល ស្រាប់តែឃើញជនរងគ្រោះដេកគ្របភួយស្លាប់បាត់ទៅហើយ ទើបចុះមកវិញមកប្រាប់ប្រពន្ធ និងទៅរាយការណ៍ជូនមេភូមិព្រមទាំងសមត្ថកិច្ចមូលដ្ឋាន។
ក្រោយពីទទួលបានព័ត៌មាននេះភ្លាមកម្លាំងសមត្ថកិច្ចស្រុកអង្គស្នួល សហការជាមួយសមត្ថកិច្ចជំនាញខេត្ត ចុះទៅដល់កន្លែងកើតហេតុដើម្បីពិនិត្យជាក់ស្ដែង និងធ្វើកោសល្យវិច័យបើកធ្វើការស្រាវជ្រាវស៊ើបអង្កេត លុះដល់វេលាម៉ោង១០និង១០នាទីយប់កម្លាំង សមត្ថកិច្ចបានឈានទៅកំណត់មុខសញ្ញាជនដៃដល់បាន និងបានធ្វើការសហការជាមួយកម្លាំងសមត្ថកិច្ចនគរបាលស្រុកឧដុង្គខេត្តកំពង់ស្ពឺឈានទៅដល់ធ្វើការឃាត់ខ្លួនជនសង្ស័យនៅចំណុចនៅភូមិត្រពាំងក្រសាំង ឃុំ ក្សេមក្សាន្តស្រុកឧដុង្គ ខេត្តកំពង់ស្ពឺនៅនឹងផ្ទះឪពុកម្ដាយរបស់ជនសង្ស័យតែម្ដង។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានប្រព្រឹត្តអំពើ ឃាតកម្មទៅលើជនប្រពន្ធខ្លួនប្រាកដមែន ដោយយកពូថៅដៃកាប់ទៅលើប្រពន្ធ ដែលនាងកំពុងដេកលក់ចំក្បាលចំនួន៥ពូថៅបណ្តាលឲ្យស្លាប់ភ្លាមៗ ដោយសារភ្លើងប្រចណ្ឌមានរយៈពេល៣ឆ្នាំមកហើយនិងធ្លាប់មានជម្លោះជាមួយគ្នាជាញឹកញាប់ទៀតផង។
ក្រោយពេលចាប់ខ្លួនបានជនសង្ស័យរួមជាមួយវត្ថុតាងត្រូវបាននាំមកកាន់អធិការដ្ឋាននគរបាលស្រុកអង្គស្នួលដើម្បីបន្តកសាងសំណុំរឿងបញ្ជូនឲ្យតុលាការចាត់ការតាមនីតិវិធី៕
Source: Kampuchea Thmey Daily
0 Comments