ក្រុមហ៊ុនអាកាសចរណ៍ម៉ិកស៊ិក បាននិយាយកាលពីថ្ងៃចន្ទថា ការធ្លាក់យន្តហោះមួយគ្រឿងរបស់ខ្លួន ដែលបានសម្លាប់មនុស្សចំនួន១១២នាក់នៅក្នុងប្រទេសគុយបា កាលពីថ្ងៃទី១៨ ខែឧសភាគឺបណ្តាលមកពីកំហុសរបស់មនុស្ស។
ក្រុមហ៊ុន Global Air ដែលប្រតិបត្តិការរបស់ខ្លួនត្រូវបានផ្អាកដោយអាជ្ញាធរម៉ិកស៊ិកដោយសារឧបទ្ទវហេតុនេះបាននិយាយថា ការសិក្សាមួយដោយអ្នកជំនាញអន្តរជាតិលើប្រអប់ខ្មៅពីយន្តហោះ Boeing 737 បានរកឃើញថា ការបើកបររបស់អាកាសយានិកគឺហួសហេតុពេក។
ក្រុមហ៊ុនបាននិយាយនៅក្នុងសេចក្តីថ្លែងការណ៍មួយលើ Twitter ថា “ទិន្នន័យបានបង្ហាញថា អាកាសយានិកបានហោះឡើងនៅផ្លូវចំហៀងពេកដែលជាហេតុធ្វើឲ្យពិបាកហោះឡើងហើយបណ្តាលឲ្យយន្តហោះជួបគ្រោះថ្នាក់”។
ក្រុមហ៊ុនដ៏តូចមួយនេះដែលត្រូវបានបង្កើតឡើងក្នុងឆ្នាំ១៩៩០បាននិយាយថា ខ្លួនទទួលខុសត្រូវចំពោះជនរងគ្រោះនៃឧបទ្ទវហេតុសោកនាដកម្មនេះ។
អតីតបុគ្គលិករបស់ក្រុមហ៊ុនអាកាសចរណ៍នេះបានចោទប្រកាន់ថា ក្រុមហ៊ុននេះបានប្រតិបត្តិការយន្តហោះគ្មានដែនកំណត់ដោយមិនបានថែរក្សាឲ្យបានគ្រប់គ្រាន់និងដាក់ជីវិតស្ថិតក្នុងគ្រោះថ្នាក់ជាមួយនឹងការអនុវត្តនានាដូចជាជើងហោះហើរពេលយប់ដោយគ្មានរ៉ាដាជាដើម។
ទោះបីជាយ៉ាងណាក៏ដោយ ក្រុមហ៊ុននេះបាននិយាយថា ការចោទប្រកាន់បែបនេះត្រូវបានបង្កើតឡើងដោយបុគ្គលិកដែលមិនមានការពេញចិត្តហើយបានអំពាវនាវស្នើសុំអាជ្ញាប័ណ្ណប្រតិបត្តិការរបស់ខ្លួនមកវិញ។
យន្តហោះដែលមានអាយុកាល៣៩ឆ្នាំមួយគ្រឿងនេះបានឆ្លងកាត់ការត្រួតពិនិត្យដោយអាជ្ញាធរអាកាសចរណ៍ម៉ិកស៊ិកនៅខែវិច្ឆិកាឆ្នាំ២០១៧។
ក្រុមហ៊ុន Global Air បានជួលវាទៅឲ្យក្រុមហ៊ុនអាកាសចរណ៍ជាតិ Cubana de Aviacion សម្រាប់ជើងហោះហើរក្នុងស្រុកមួយពីទីក្រុង Havana ទៅកាន់ទីក្រុង Holguin ភាគខាងកើត៕ AFP
Source: Kampuchea Thmey Daily
0 Comments