គណបក្សប្រជាជនកម្ពុជាបានដាក់ចេញនូវគោលនយោបាយជាឤទិភាពដោយផ្តោតសំខាន់ទៅលើការគាំពារសង្គម។ ពិសេសជំរុញកែលម្អថែមទៀតនូវការបើកប្រាក់ឈ្នួលការងារប្រចាំខែជូនកម្មករ-និយោជិតដោយរៀបចំឲ្យបើកក្នុងរយៈពេល ២ សប្តាហ៍ម្តងដូចនៅ បណ្តាប្រទេសជឿនលឿនមួយចំនួននៅក្នុងតំបន់ចាប់ពីឆ្នាំ ២០១៩ ទៅ។
«រាជរដ្ឋាភិបាល នីតិកាលទី៦ នៃរដ្ឋសភាដែលដឹកនាំដោយគណបក្សប្រជាជនកម្ពុជា និងដោយមានខ្ញុំជានាយករដ្ឋមន្ត្រីនឹង ជំរុញកែលម្អថែមទៀតនូវការបើកប្រាក់ឈ្នួលការងារប្រចាំខែជូនកម្មករ និយោ ជិតរយៈពេល២សប្តាហ៍ម្តង ដូចនៅបណ្តាប្រទេសជឿនលឿនមួយចំនួនក្នុងតំបន់ ចាប់ពីឆ្នាំ ២០១៩ ទៅដើម្បីធានាឲ្យកម្មករ-និយោជិត យើងទាំងអស់គ្នាទទួលបាននូវប្រាក់ឈ្នួលពលកម្មដែលនឹងត្រូវបានបន្តបង្កើនឡើងជាបន្តបន្ទាប់ក្នុងកម្រិតសមរម្យផង ហើយបើកប្រាក់ឈ្នួលពលកម្មនេះបានជាប្រចាំ ដោយទៀងទាត់ និង ទាន់ពេលសម្រាប់បម្រើសេចក្តីត្រូវការក្នុងការផ្គត់ផ្គង់ជីវភាពរបស់ខ្លួនផង »។ នេះជាការប្រកាសដោយសម្តេចតេជោ ហ៊ុន សែន ប្រមុខគណបក្សប្រជាជនកម្ពុជា កាលពីព្រឹកថ្ងៃទី៧ ខែកក្កដា នៅឯកោះពេជ្រ ដែលជាថ្ងៃដំបូងនៃយុទ្ធនាការឃោសនារកសំឡេងឆ្នោតសម្រាប់គណបក្សនយោបាយ។
សម្រាប់នីតិកាលទី ៦ នៃរដ្ឋសភា គណបក្សប្រជាជនកម្ពុជាបានដាក់ចេញនូវគោលនយោបាយជាឤទិភាពមួយចំនួនដើម្បីសម្រេចជោគជ័យនូវកម្មវិធីនយោបាយនិងគោលដៅធំ ៗ ជាយុទ្ធសាស្ត្ររបស់គណបក្ស។ ក្នុងចំណោមគោលនយោបាយជាឤទិភាពជាច្រើនគឺមានការដំឡើងប្រាក់ឈ្នួលរបស់កម្មករ-និយោជិត ជារៀងរាល់ឆ្នាំបូកនឹងប្រាក់អត្ថប្រយោជន៍ផ្សេងទៀតលើកកម្ពស់ជីវភាពលក្ខខណ្ឌការងារ និងការពារឤជីពរបស់កម្មករ-និយោជិត។
ការកែលម្អ ការបើកប្រាក់បៀវត្សរ៍នេះ នឹងមិនត្រូវអនុវត្តតែសម្រាប់កម្មករ និយោជិតនោះឡើយ។ មន្ត្រីរាជការស៊ីវិល និងកងកម្លាំងប្រដាប់អាវុធ ក៏នឹងទទួលបានការដំឡើងប្រាក់បៀវត្សរ៍ នឹងត្រូវទទួលបានប្រាក់នេះ ពីរសប្តាហ៍ម្តង ដូចគ្នាជាបន្តបន្ទាប់។ សម្តេចតេជោ ហ៊ុន សែន បានបញ្ជាក់យ៉ាងដូច្នេះ «យើងនឹងចាប់ផ្តើមអនុវត្តបើកប្រាក់បៀវត្សរ៍ និងប្រាក់សោធនក្នុងរយៈពេល ២ សប្តាហ៍ម្តងនេះ ជូនមន្ត្រីរាជការស៊ីវិល និងជូននិវត្តជន និងអតីតយុទ្ធជនជាមុនដោយចាប់ផ្តើមនៅក្នុងឆ្នាំ២០១៩ ខាងមុខ។ ដោយឡែក ចំពោះកងកម្លាំងប្រដាប់អាវុធគ្រប់ប្រភេទយើងនឹងរៀបចំធ្វើការសិក្សាដាក់ឲ្យអនុវត្តជាបន្តបន្ទាប់ទៀត ដោយសារលក្ខណៈពិសេសនៃទីកន្លែងការងារដាច់ស្រយាលរបស់កងកម្លាំងប្រដាប់អាវុធដែលមិនទាន់មានសេវាធនាគារទៅដល់គ្រប់គ្រាន់»។
នេះជាការបង្ហាញការយកចិត្តទុកដាក់បន្ថែមពីលើការផ្តល់កិច្ចគាំពារសង្គមពីសំណាក់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុនសែន ជានាយក រដ្ឋមន្ត្រីដល់កម្មករ-និយោជិត ក្នុងពេលកន្លងមកថ្មីៗនេះរួមមាន ការកំណត់ផ្តល់ជូននូវរបបថែទាំសុខភាពដល់កម្មករដោយនិយោជកជាអ្នកបង់ថ្លៃជួស,ការផ្តល់នូវរបបឧបត្ថម្ភមាតុភាពចំពោះកម្មការិនីដែលសម្រាលបានកូនមួយចំនួន ៤០ ម៉ឺនរៀល,កើតបានកូនភ្លោះពីរចំនួន ៨០ ម៉ឺនរៀលនិងកូនភ្លោះបីចំនួន ១២០ ម៉ឺនរៀលនិងការអនុញ្ញាតឈប់លំហែមាតុភាពរយៈពេល៣ខែ ដោយទទួលបានប្រាក់ឈ្មួលពលកម្ម ១២០ % ជាដើម ។
ការជំរុញឲ្យមានការអនុវត្តការបើកប្រាក់ឈ្នួលកម្មករ រៀងរាល់ពីរសប្តាហ៍ម្តង ក្នុងគោលបំណងដើម្បីកាត់បន្ថយហានិភ័យមួយចំនួននៅពេលរោងចក្របិទ ឬថៅកែបោះបង់ចោល។
ជាការផ្តួចផ្តើមគំនិតដ៏ល្អដើម្បីផលប្រយោជន៍របស់កម្មករ និយោជិត ។ វិធានការខាងលើជាផ្នែកមួយនៃការកាត់បន្ថយហានិភ័យនៃប្រាក់ឈ្នួល។
គណបក្សប្រជាជនកម្ពុជាបានផ្តល់អាទិភាពទៅលើការគោលនយោបាយគាំពារសង្គមដូចនេះ អ្វីដែលប្រមុខរាជរដ្ឋាភិបាលបានប្រកាសក៏ដើម្បីតែប្រយោជន៍របស់ប្រជាពលរដ្ឋ។ នេះមិនមែនជារឿងចម្លែកទេ ព្រោះអ្វីដែលប្រជាពលរដ្ឋចង់បាន គឺប្រមុខរាជរដ្ឋាភិបាលតែងបានគិតគូរពីអ្វីដែលជាសំណូមពរ ដូចជា ការបើបៀវត្សរ៍នាពេលកន្លងមកមានរយៈពេល ១ ខែ ម្តង វាដូចយូរពេកសម្រាប់ប្រជាពលរដ្ឋដែលជាកម្មករ កម្មការិនី និង មន្ត្រីរាជការស៊ីវិល ដែលមានតម្រូវការប្រចាំថ្ងៃក្នុងការផ្គត់ផ្គង់ជីវភាពមានការចាំបាច់ត្រូវការថវិកាចាយវាយ។ ដូចនេះការបើកប្រាក់ខែ ២សប្តាហ៍ម្តង ជាការចាំបាច់ណាស់អាចជួយប្រជាពលរដ្ឋដែលត្រូវការថវិកាប្រើប្រាស់ប្រចាំថ្ងៃ ពីមុនពួកគេត្រូវទន្ទឹងរង់ចាំប្រាក់ខែ ១ ខែម្តង តែឥឡូវពួកគាត់មិនបាច់ទន្ទឹងទៀតនោះទេគឺប្រាក់ខែនឹងទទួលបានក្នុងរយៈពេល ២សប្តាហ៍ម្តង វាយអាចជួយកាត់បន្ថយការខ្ចីបុលនៅពេលដែលពលរដ្ឋខ្វះលុយចាយបានផងដែរ។ កន្លងមកមានបាតុភាពជាច្រើនបានកើតឡើងទាំងនៅក្នុងចំណោមមន្ត្រីរាជការថ្នាក់កណ្តាល និង កម្មករ កម្មការិនី និយោជិត តែងជួបប្រទះជាមួយការបោកប្រាស់ទាក់ទងនិងការលេងតុងទីន ឬ ការខ្ចីបុល។ ការលេងតុងទីនគឺជាមធ្យោបាយខ្ចីគ្នាចាយមួយ ក្នុងគ្រាដែលបុគ្គលណាម្នាក់ត្រូវការថវិកាជាបន្ទាន់ ក្នុងកាលទេសៈដែលប្រាក់ខែមិនទាន់បានបើកប្រចាំខែ។ ដូចនេះ ការបើកប្រាក់ខែ ២សប្តាហ៍ម្តង ក៏ជាការរួមចំណែកកាត់បន្ថយការខ្ចីបុលផងដែរ។
អាចនិយាយបានថា គោលនយោបាយនេះជារឿងថ្មីមួយសម្រាប់ប្រទេសកម្ពុជា ព្រោះមកដល់ពេលនេះមិនទាន់មានក្រុមហ៊ុនណាមួយបើបៀវត្សរិ៍ប្រចាំខែ ក្នុង២សប្តាហ៍ម្តងនោះទេ។
ក៏ប៉ុន្តែនៅក្នុងវិស័យសំណង់កម្មករត្រូវបើកលុយមួយសប្តាហ៍ម្តង។ នេះជារឿងគួរឲ្យអបអរសាទរមួយសម្រាប់ប្រជាពលរដ្ឋកម្ពុជា។ ការដាក់ចេញនូវគោលនយោបាយនេះគឺដើម្បីបង្កើនប្រសិទ្ធភាពនៃការគាំពារសង្គមសម្រាប់ប្រជាពលរដ្ឋ៕
Source: Kampuchea Thmey Daily
0 Comments