ភ្នំពេញ ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា គិតត្រឹមថ្ងៃទី១៥ ខែកក្កដា ឆ្នាំ២០១៨ គណៈកម្មការឃុំសង្កាត់រៀបចំការបោះឆ្នោត (គឃ-សប) បានអនុញ្ញាតឲ្យភ្នាក់ងារនយោបាយគណបក្សនយោបាយ ដែលបានចុះបញ្ជីឈរឈ្មោះបោះឆ្នោតជ្រើសតាំងតំណារាស្ត្រនីតិកាលទី៦ សរុបមានចំនួន៧៩៧៨១ ក្នុងនោះភ្នាក់ងារពេញសិទ្ធិមានចំនួន៥១៥០៦នាក់ និងភ្នាក់ងារបំរុងមានចំនួន២៨២៧៥នាក់។
តាម គ.ជ.ប ក្នុងចំណោមគណបក្សនយោបាយទាំង២០ មានគណបក្សនយោបាយចំនួន៦ មិនបានដាក់ភ្នាក់ងារគណបក្សនយោបាយនៅតាមការិយាល័យចុះឈ្មោះបោះឆ្នោតនោះទេ។
យោងតាមប្រការ៣.១.៤ នៃបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ គណបក្សនយោបាយដែលបានចុះបញ្ជីឈរឈ្មោះបោះឆ្នោតជ្រើសតាំងតំណាងរាស្ត្រក្នុងមណ្ឌលបោះឆ្នោតរាជធានី ខេត្ត ណាមួយ មានសិទ្ធិចាត់តាំងភ្នាក់ងារពេញសិទ្ធិរបស់ខ្លួនមួយរូប និងភ្នាក់ងារបំរុងមួយរូប ដើម្បីសង្កេតមើលការបោះឆ្នោត និងការរាប់សន្លឹកឆ្នោតនៅតាមការិយាល័យបោះឆ្នោត និងការិយាល័យរាប់សន្លឹកឆ្នោតនីមួយៗក្នុងឃុំសង្កាត់ ហើយភ្នាក់ងារគណបក្សនយោបាយមានសិទ្ធិចុះហត្ថលេខាលើទំរង់បែបបទកំណត់ហេតុនៃការបោះឆ្នោត និងទម្រង់បែបបទកំណត់ហេតុនៃការរាប់សន្លឹកឆ្នោត ដើម្បីដឹងឮថា គណបក្សរបស់ខ្លួនទទួលបានសន្លឹកឆ្នោត តាមការរាប់សន្លឹកឆ្នោតពិតប្រាកដមែន។
គណបក្សនយោបាយចំនួន២០ ដែលបានចូលរួមសង្កេតការណ៍នោះរួមមាន ទី១, គណបក្ស “គណបក្សខ្មែររួបរួមជាតិ” មានអ្នកសង្កេតការណ៍សរុបចំនួន៤២៨២នាក់ ក្នុងនោះពេញសិទ្ធិចំនួន៣៨៥៩នាក់, គណបក្ស “គណបក្សមាតុភូមិយើង” មានអ្នកសង្កេតការណ៍សរុបចំនួន១១នាក់ ក្នុងនោះពេញសិទ្ធិចំនួន១១នាក់, គណបក្ស “គណបក្សពន្លឺថ្មី” មិនបានដាក់ទេ, គណបក្ស “សញ្ជាតិកម្ពុជា” មានអ្នកសង្កេតការណ៍សរុបចំនួន៥នាក់ ក្នុងនោះពេញសិទ្ធិចំនួន៥នាក់, គណបក្ស “ខ្មែរក្រោក” មិនបានដាក់ទេ, គណបក្ស “សំបុកឃ្មុំសង្គមប្រជាធិបតេយ្យ” មានអ្នកសង្កេតការណ៍សរុបចំនួន៣៤៨នាក់ ក្នុងនោះពេញសិទ្ធិចំនួន៣២១នាក់, គណបក្ស “ប្រជាធិបតេយ្យមូលដ្ឋាន” មានអ្នកសង្កេតការណ៍សរុបចំនួន៣៧១នាក់ ក្នុងនោះពេញសិទ្ធិចំនួន៣៣៧នាក់, គណបក្ស “ខ្មែរសាធារណរដ្ឋប្រជាធិបតេយ្យ” មានអ្នកសង្កេតការណ៍សរុបចំនួន៥នាក់ ក្នុងនោះពេញសិទ្ធិចំនួន៥នាក់, គណបក្ស “រស្មីខេមរា” មានអ្នកសង្កេតការណ៍សរុបចំនួន៧នាក់ ក្នុងនោះពេញសិទ្ធិចំនួន៧នាក់, គណបក្ស “សម្ព័ន្ធដើម្បីប្រជាធិបតេយ្យ” មានអ្នកសង្កេតការណ៍សរុបចំនួន១១៦៣១នាក់ ក្នុងនោះពេញសិទ្ធិចំនួន១០៨០០នាក់, គណបក្ស “ខ្មែរសាធារណរដ្ឋ” មិនបានដាក់ទេ, គណបក្ស “ខ្មែរឈប់ក្រ” មិនបានដាក់ទេ, គណបក្ស “ហ៊្វុនស៊ិនប៉ិច” មានអ្នកសង្កេតការណ៍សរុបចំនួន១៦៦៨៤នាក់ ក្នុងនោះពេញសិទ្ធិចំនួន១២៧៦៧នាក់, គណបក្ស “ខ្មែរអភិវឌ្ឍន៍សេដ្ឋកិច្ច” មានអ្នកសង្កេតការណ៍សរុបចំនួន២៩នាក់ ក្នុងនោះពេញសិទ្ធិចំនួន២៨នាក់, គណបក្ស “យុវជនកម្ពុជា” មានអ្នកសង្កេតការណ៍សរុបចំនួន១៥៦នាក់ ក្នុងនោះពេញសិទ្ធិចំនួន១៤៦នាក់, គណបក្ស “ធម្មាធិបតេយ្យ” មិនបានដាក់ទេ, គណបក្ស “ឆន្ទះខ្មែរ” មិនបានដាក់ទេ, គណបក្ស “ជនជាតិដើមប្រជាធិបតេយ្យកម្ពុជា” មានអ្នកសង្កេតការណ៍សរុបចំនួន៩៤នាក់ ក្នុងនោះពេញសិទ្ធិចំនួន៦៩នាក់, គណបក្ស “ខ្មែរតែមួយ” មានអ្នកសង្កេតការណ៍សរុបចំនួន២១០នាក់ ក្នុងនោះពេញសិទ្ធិចំនួន១៨៤នាក់ និងគណបក្ស “ប្រជាជនកម្ពុជា” មានអ្នកសង្កេតការណ៍សរុបចំនួន៤៥៩៤៨នាក់ ក្នុងនោះពេញសិទ្ធិចំនួន២២៩៦៧នាក់។
សូមបញ្ជាក់ថា ការដាក់ភ្នាក់ងារគណបក្សនយោបាយ ដើម្បីចូលរួមសង្កេតមើលដំណើរការបោះឆ្នោតនៅតាមការិយាល័យបោះឆ្នោត និងការិយាល័យរាប់សន្លឹកឆ្នោត គឺជាសិទ្ធរបស់គណបក្សនយោបាយ ហើយការសម្រេចដាក់ ឬមិនដាក់ភ្នាក់ងារគណបក្សនយោបាយ គឺអាស្រ័យទៅលើលទ្ធភាពរបស់គណបក្សនយោបាយនីមួយៗ។ បើទោះបីជាអវត្តមានភ្នាក់ងារគណបក្សនយោបាយមួយចំនួនក៏ដោយ ក៏នៅមានគណបក្សនយោបាយជាច្រើនផ្សេងទៀតបានដាក់ភ្នាក់ងាររបស់ខ្លួន ដើម្បីចូលរួមសង្កេតមើលដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅគ្រប់ការិយាល័យបោះឆ្នោតផងដែរ៕
Source: Kampuchea Thmey Daily
0 Comments