បាត់ដំបង ៖ ស្ត្រីវ័យ៥២ឆ្នាំម្នាក់ បានស្លាប់ភ្លាមៗ គួរអោយសង្វេគជាទីបំផុត ខណៈដែលស្ត្រីរូបនេះកំពុងដើរមើលអាគុយ ដែលប្រជាពលរដ្ឋយកមកអោយបញ្ចូលភ្លើង ក៏ស្រាប់តែរអិលជើងដួលនៅក្បែរម៉ាស៊ីនភ្លើង និងធ្វើអោយក្បាលរបស់ស្ត្រីរងគ្រោះរូបនេះ បោកចូលទៅក្នុងចន្លោះខ្សែពានម៉ាស៊ីន បណ្ដាលអោយកៀបលើផ្ទៃមុខស្លាប់ភ្លាមមួយរំពេច។
ហេតុការណ៍ដ៏កម្រនេះ បានកើតឡើងនៅវេលាម៉ោង៤និង៣៨នាទី ល្ងាច ថ្ងៃទី ១៥ ខែកក្កដា ឆ្នាំ២០១៨ ត្រង់ចំណុចក្រុមទី១ ភូមិសូភី ឃុំអន្លង់រុន ស្រុកថ្មគោល ខេត្តបាត់ដំបង ដែលចំណុចខាងលើនេះ គឺជាកន្លែងប្រកបមុខរបរសាកអាគុយ ដោយគេមិនបានទាញយកចរន្តពីអគ្គិសនីរដ្ឋនោះទេ គឺគេបានប្រើប្រាស់ម៉ាស៊ីនភ្លើងបញ្ឆេះយកចរន្តដោយខ្លួនឯង។
បើតាមប្រភពពីក្រុមគ្រួសារបានអោយដឹងថា នៅមុនពេលកើតហេតុគឺមេឃបានធ្លាក់ភ្លៀងមួយមេទៅហើយ ដែលធ្វើអោយដីមានសភាពរអិល។ នៅពេលនោះដែរស្ត្រីម្នាក់ ឈ្មោះតើក ប៉ិច អាយុ៥២ឆ្នាំ ដែលជាម្ចាស់ទីតាំងនេះ បានដើរមើលអាគុយដែលអតិថិជនយកមកសាក ក្នុងគោលបំណងចង់ដឹងថាតើភ្លើងចូលទៅក្នុងអាគុយពេញហើយឬនៅ។
ប្រភពដដែលបានបន្តថា នៅពេលនោះស្រាប់តែស្ត្រីរងគ្រោះបានរអិលជើងដួលបោកក្បាលចូលទៅកន្លែងម៉ាស៊ីនភ្លើង ព្រមទាំងធ្វើអោយក្បាលស្ត្រីរូបនេះ ស៊កចូលទៅក្នុងខ្សែពានម៉ាស៊ីនសាកអាគុយ បណ្ដាលអោយស្លាប់ភ្លាមៗតែម្តង ដោយសារតែខ្សែពាន បានរឹតកៀបក្បាល និងផ្ទៃមុខយ៉ាងខ្លាំង។
ករណីនេះសមត្ថកិច្ចជំនាញ ក៏បានចុះត្រួតពិនិត្យ ព្រមទាំងបានប្រគល់សព ទៅអោយក្រុមគ្រួសារ រៀបចំធ្វើបុណ្យតាមប្រពៃណីហើយ នៅនឹងលំនៅដ្ឋាននោះតែម្តង ដែលករណីនេះវាកម្រមានជាទីបំផុត ព្រោះក្បាលគឺមិនងាយចូលទៅក្នុងខ្សែពានយ៉ាងស្រួលបែបនេះនោះឡើយ៕
Source: Kampuchea Thmey Daily
0 Comments