នី សុភី អ្នកប្រដាល់ក្លិបសាលវ័ន្តកីឡា និង ចាន់ ប៊ុនលាភអ្នកប្រដាល់ក្លិបនិរោធមានជ័យ ត្រូវជួបប្រកួតជាមួយអ្នកប្រដាល់ថៃ ក្នុងកម្មវិធីប្រដាល់គូបូតា នាយប់សុក្រថ្ងៃទី២០ ខែកក្កដា ឆ្នាំ២០១៨ នេះ នៅលើសង្វៀនបាយ័នស្ទឹងមានជ័យ។
នី សុភី នឹងប្រកួតក្នុងប្រភេទទម្ងន់៦៧គ.ក្រ ជាមួយអ្នកប្រដាល់ថៃChai Suo។ Chai Suoនេះ ធ្លាប់មកប្រកួតនៅភ្នំពេញ២-៣លើកហើយកន្លងមក ដែលក្នុងនោះ២លើក ជួបប្រកួតជាមួយនី សុភីនេះឯង ហើយក្នុងការជួប២ដងនេះ នី សុភី បានត្រឹមស្មើ១លើកនិងចាញ់ពិន្ទុ១លើក។
អ្នកប្រដាល់ថៃរូបនេះ មានកំរិតសមត្ថភាពនិងបច្ចេកទេសល្អហើយរឹងមាំ គេជាជើងខ្លាំងម្នាក់ប្រចាំនៅស្រុកថៃ។ Chai Suoមានកម្ពស់១,៧២ម៉ែត្រ ខណៈ នី សុភី ១,៧២ម៉ែត្រដែរ ហើយកំណត់ត្រាប្រកួតលើរេញរបស់ Chai Suo គឺបានចំនួន១០៣លើក ដោយឈ្នះ៩០លើក ចាញ់១១លើក និង ស្មើ០១លើក បើធៀបជាមួយនី សុភី មានប្រវត្តិប្រកួត១៦១លើក ឈ្នះ១២៣លើក ចាញ់២៨លើក ស្មើ១០លើក និង ធ្លាប់ផ្តួលដៃគូអោយសន្លប់ចំនួន ២៧ លើក។
នី សុភី គេជាអ្នកប្រដាល់ជើងខ្លាំង ក្នុងចំណោមអ្នកប្រដាល់ជើងខ្លាំងរបស់កម្ពុជា ។ គេធ្លាប់ជួបអ្នកប្រដាល់បរទេសរាប់មិនអស់នោះទេ ដែលការប្រកួតចុងក្រោយរបស់គេនោះ គឺឈ្នះអ្នកប្រដាល់ថៃPhach Aruon ដោយពិន្ទុ កាលពីថ្ងៃទី៣០មិថុនា២០១៨។
សម្រាប់ការប្រកួតលើកនេះ ពុំដឹងថា នី សុភី គេអាចសងសឹកយកឈ្នះអ្នកប្រដាល់ថៃ Chai Suoបានឬអត់នោះទេ ។ ព្រោះថា សុភី ជួបថៃ Chai Suo២លើកកន្លងមកនោះ គឺបានតែស្មើពិន្ទុនិងចាញ់ពិន្ទុប៉ុណ្ណោះ។
ចំពោះ អ្នកប្រដាល់ជើងចាស់ ចាន់ ប៊ុនលាភ ក្លិបនិរោធមានជ័យ ត្រូវគេផ្តល់ឪកាសអោយជួបប្រកួតជាមួយអ្នកប្រដាល់ថៃ Phetch Nam Ek ដោយជួបប្រកួតក្នុងទម្ងន់ ៦៥ គីឡូក្រាម។ អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរច្រើនលើកហើយកន្លងមក។
Phetch Nam Ek គេមានកំនត់ត្រាប្រកួតចំនួនតែ៩០លើកប៉ុណ្ណោះ ក្នុងនោះឈ្នះ៧៣លើក ចាញ់១៤លើក និងស្មើ០២លើក ហេតុនេះមិនធម្មតានោះឡើយ។
ចាន់ ប៊ុនលាភ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសប៊ុនលាភនោះ គឺខ្លាចតែចាញ់កម្លាំងស៊ុហ្វថៃមួយមុខប៉ុណ្ណោះ។ ចាន់ ប៊ុនលាភ មានប្រវត្តិប្រកួតមិនតិចក្រោម១០០លើកនោះទេ ប្រកួតជាមួយថៃលើកចុងក្រោយនេះ វាយចាញ់ Phasingha ក្នុងទឹកទី២ កាលពីថ្ងៃទី២២មិថុនា២០១៨។
ជាលើកទី២៧របស់ចាន់ ប៊ុនលាភ ដែលឡើងប្រកួតជាមួយថៃ ។ គេមិនហ៊ានអះអាងមុនថា ប៊ុនលាភឈ្នះក្នុងការប្រកួតនេះទេ។ ចាំមើល តើប៊ុនលាភ អាចយកឈ្នះ Phetch Nam Ek បានឬអត់ សម្រាប់ការជួបគ្នាលើកទី១នេះ? ៕
Source: Kampuchea Thmey Daily
0 Comments