ការប្រកួតជម្រុះដណ្ដើមខ្សែក្រវាត់ជើងឯកCarabao ទម្ងន់៥៧ គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ទី២១ ខែកក្កដា ឆ្នាំ២០១៨នេះ ជាការប្រកួតជុំចុងក្រោយរបស់ អ្នកប្រដាល់កម្ពុជា យុគ យក្សផ្លែ ក្លិបបូរីរាជសីហ៍មានរិទ្ធ និងអ្នកប្រដាល់ថៃ Theap Kao ហើយអ្នកប្រដាល់កម្ពុជាឡុង ជិន ក្លិបខ្លារខិនមានរិទ្ធ ជួបអ្នកប្រដាល់ថៃ Phach Yaksou។
សម្រាប់ការប្រកួតជុំចុងក្រោយនេះ អ្នកប្រដាល់កម្ពុជាទាំង២រូប គឺយុគ យក្សផ្លែ និងឡុង ជិន ត្រូវប្រជែងគ្នាដណ្ដើមកៅអីវគ្គផ្ដាច់ព្រ័ត្រ ក្នុងខណៈដែលឈុត សេរីវ៉ាន់ថងក្លិបរាហ៊ូកីឡាក៏កំពុងតែមានពិន្ទុ ដើរទន្ទឹមគ្នាជាមួយអ្នកខ្លាំងទាំង២រូបនេះដែរនោះ។
ជើងខ្លាំងទាំង៣រូបនេះ មានពិន្ទុ៩ស្មើគ្នាដោយសារ៣ប្រកួតឈ្នះ ទាំង៣ប្រកួតដូចគ្នាតែឡុង ជិនមានប្រៀបខ្លាំងជាងគេ ព្រោះក្នុង៣ប្រកួតនោះ មានមួយប្រកួតគេបានផ្ដួលគូប្រកួត នៅទឹកទី១ ឈ្នះទឹក៣ មួយប្រកួតនិងឈ្នះពិន្ទុ១ប្រកួត។ ឯ យក្សផ្លែ៣ប្រកួតរបស់គេ ឈ្នះពិន្ទុមួយប្រកួត ឈ្នះទឹក៣មួយប្រកួតនិងឈ្នះស្វ័យប្រវត្តិ១ប្រកួត ចំពោះឈុត សេរីវ៉ាន់ថងវិញ ៣ប្រកួតរបស់គេឈ្នះទឹក១មួយប្រកួតនិងឈ្នះដោយពិន្ទុ២ ប្រកួត។
ការប្រកួតជុំចុងក្រោយនេះ យុគយក្សផ្លែត្រូវតស៊ូជាមួយអ្នកប្រដាល់ថៃ Theap Kao ដែលអ្នកប្រដាល់ថៃរូបនេះ ៣ប្រកួត ឈ្នះបានមួយប្រកួត និង ចាញ់ពីរប្រកួត ។ការប្រកួតនេះប្រសិនបើយក្សផ្លែ ខិតខំផ្ដួលគូប្រកួតឲ្យបានកាន់តែរហ័សនោះ គេនឹងមានឱកាសដើម្បីទទួលបានកៅអីសម្រាប់វគ្គផ្ដាច់ព្រ័ត្រ កាន់តែច្រើនដែរ។ Theap Kao ជាអ្នកប្រដាល់មួយរូប ដែលមិនស្រួលបង្ក្រាបនោះទេគេមានកម្លាំងល្អ និងកលល្បិចវាយលុកល្អ។
អ្នកប្រដាល់ថៃរូបនេះ មានប្រវត្តិប្រកួត ចំនួន៦០លើក ឈ្នះ៥១លើក ចាញ់៩លើក ។ ចំពោះយុគ យក្សផ្លែវិញ មានប្រវត្តិប្រកួតចំនួន១៥៨លើក ឈ្នះ១៣៣លើក ចាញ់២៤លើកស្មើពិន្ទុ៤លើក ។កណ្ដាប់ដៃដ៏ធ្ងន់របស់យក្សផ្លែ អាចផ្ដួលTheap Kao បានឬទេ ?។
ចំពោះឡុង ជិន ត្រូវជួបប្រកួតជាមួយអ្នកប្រដាល់ថៃ Phach Yaksou ដែលអ្នកប្រដាល់ថៃរូបនេះ ៣ប្រកួតរបស់គេចាញ់មួយប្រកួត និង អវត្តមានពីរប្រកួតនោះ ។ឡុង ជិន គេមានកំនត់ត្រាប្រកួត៦៨លើក ឈ្នះ៥២លើក ចាញ់១៤លើក និងស្មើ០១លើក។
អ្នកប្រដាល់របស់កម្ពុជារូបនេះ បានទទួលជ័យជម្នះដោយស្វ័យប្រវត្តិ ដោយសារ Phach Yak sou អវត្ថមានបោះបង់ការប្រកួត ដែលនាំឲ្យឡុង ជិន ទទួលបាន៣ពិន្ទុបន្ថែមដោយមិនបាច់ខំ ។ដូច្នេះ ៤ប្រកួតរបស់ឡុង ជិន ឈ្នះទាំង៤ប្រកួត គឺឈ្នះទឹក១ មួយប្រកួត ទឹក៣មួយប្រកួត ឈ្នះដោយពិន្ទុ១ ប្រកួត និងឈ្នះដោយស្វ័យប្រវត្តិ១ប្រកួត ។តែយ៉ាងណា មិនទាន់ដឹងច្បាស់ថា គេបានឡើងទៅផ្តាច់ព្រ័ត្រឬអត់នោះទេ ព្រោះត្រូវប្រជែងជាមួយយុគ យក្សផ្លែ និងឈុត សេរីវ៉ាន់ថងទៀត។
ទោះជាមិនបានប្រកួតក្នុងជម្រុះនេះក៏ដោយ ក៏ឡុង ជិនត្រូវគេផ្គូអោយជួបប្រកួតជាមួយអ្នកប្រដាល់ថៃPhat Chhumphun ជាលក្ខណៈមិត្តភាពអន្តរជាតិដែរ។ ចាំមើល ជំនួបលើកនេះ តើនរណាឈ្នះ នោះ?៕
Source: Kampuchea Thmey Daily
0 Comments