គ.ជ.ប បង្ហាញទឹកខ្មៅជ្រលក់ម្រាមដៃ និងបើកកិច្ចប្រជុំជាមួយភាគីពាក់ព័ន្ធស្តីពីការឃោសនា

ភ្នំពេញ ៖ នៅវេលាម៉ោង១០និង១៥នាទីព្រឹក ថ្ងៃទី១៧ ខែកក្កដា ឆ្នាំ២០១៨នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានបើកកិច្ចប្រជុំជាមួយភាគីពាក់ព័ន្ធស្តីពីដំណើរការប្រព្រឹត្តទៅនៃការឃោសនាបោះឆ្នោតជ្រើសតាំង តំណាងរាស្ត្រនីតិកាលទី៦ ឆ្នាំ២០១៨ និងការបង្ហាញទឹកខ្មៅជ្រលក់ម្រាមដៃ នៅពេលបោះឆ្នោត ដែលកម្មវិធីទាំងពីរនេះ រៀបចំឡើងក្រោមអធិបតីភាពលោក ហ៊ែល សារ៉ាត់ សមាជិក គ.ជ.ប នៅសាលប្រជុំក្រសួងមហាផ្ទៃ ដោយមានការចូលរួមពី តំណាងក្រុមប្រឹក្សាធម្មនុញ្ញ តំណាងក្រសួង ពាក់ព័ន្ធនានា តំណាងគណបក្សនយោបាយ តំណាងអង្គការមិនមែនរដ្ឋាភិបាលជាតិ និងអន្តរជាតិ តំណាងស្ថានទូតជប៉ុន ជំនាញ jica និងអ្នកជំនាញកូរ៉េ ប្រចាំនៅ គ.ជ.ប និងអ្នកសារព័ត៌មានជាតិ និងអន្តរជាតិ យ៉ាងច្រើន។

សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយការឃោសនារកសំឡេងឆ្នោត មានរយៈពេល២១ថ្ងៃ ដោយចាប់ពីថ្ងៃទី០៧ ខែកក្កដា ដល់ថ្ងៃទី២៧ ខែកក្កដា ឆ្នាំ២០១៨។

ជាមួយគ្នានេះ ការបោះពុម្ពសន្លឹកឆ្នោត ក៏ត្រូវបានបញ្ចប់ផងដែរ ហើយនឹងដឹកចេញពីរោងពុម្ព ទៅរក្សាទុកនៅក្នុងឃ្លាំងរបស់ គ.ជ.ប នៅថ្ងៃទី១៣ ខែកក្កដា ឆ្នាំ២០១៨ ហើយនឹងដឹកបន្តទៅកាន់ការិយាល័យបោះឆ្នោតទាំង២២៩៦៧ ការិយាល័យ ទូទាំងប្រទេស មិនឲ្យលើស៣៦ម៉ោងមុនថ្ងៃបោះឆ្នោត។

ដំណើរការបោះឆ្នោតនេះ មានគណបក្សនយោបាយចំនួន២០ បានចូលរួម គឺគណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀង ទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ៊ុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទះខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០៕