ភ្នំពេញ ៖ ពិតជាគួរឲ្យស្ងើចសរសើរចំពោះទឹកចិត្តនៃការប្រឹងប្រែងតស៊ូជម្នះនូវរាល់ការលំបាកឆ្លងកាត់ជីវិតក្មេងកំព្រាឪពុក និងធ្លាប់តែទូលនំកងដើរលក់កាត់ក្តៅហាលភ្លៀងតាមសំយាបផ្ទះគេមកក្លាយជាតារាសម្ដែង និងចម្រៀងOriginal Songកំពុងទទួលបានការគាំទ្រនិងមានប្រជាប្រិយភាពនៅលើទីផ្សារសិល្បៈពីសំណាក់តារាប្រុសលោក ចាន់ស៊ី ស៊ីណាវ៉ាត់ត្រា។
រំលឹកពីប្រវត្តិត្រួសៗរបស់លោក ចាន់ស៊ី ស៊ីណាវ៉ាត់ត្រា, លោក ណាវ៉ាត់ត្រា គឺមានដើមកំណើតមកពីស្រុកខេត្តបាត់ដំបងលោក ចាន់ស៊ី ស៊ីណាវ៉ាត់ត្រា កន្លងមកធ្លាប់ផ្អាកពីអាជីពសិល្បៈមួយរយៈពេល និងទើបវិលត្រឡប់មករកអាជីពចាស់វិញកាលពីពេលថ្មីៗនេះ។ លោកក៏ជាអ្នកសិល្បៈដែលមានជីវិតកម្សត់មួយរូបផងដែរព្រោះលោកធ្លាប់កំព្រាឪពុកតាំងពីនៅក្នុងផ្ទៃ ហើយធ្លាប់ដើរលក់នំកងយកលុយរៀនទៀតផង។
បើតាមការរៀបរាប់ប្រាប់អ្នកសារព័ត៌មានលោក ចាន់ស៊ី ស៊ីណាវ៉ាត់ត្រា បានឲ្យដឹងថា លោកបានបែកឪពុកតាំងពីម្ដាយមានទម្ងន់ខ្លួនប្រមាណ៥ខែម្ល៉េះ ហើយឪពុកលោកគឺបម្រើការធ្វើទាហាន។ ម្យ៉ាងទៀតនៅពេលរូបលោកពេញវ័យក៏បានតាមស្វែងរកឪពុកពីរនាក់ម្តាយដែរតែរកមិនឃើញសោះឡើយ។ ពេលខ្លះខ្លួនមានអារម្មណ៍ថាតូចចិត្តដែលគេមានឪពុកម្ដាយរស់នៅជុំគ្នាគ្រួសារតែខ្លួនបែរជាអភ័ព្វពេលមានជីវភាពសមរម្យហើយមិនដឹងជាទៅរកឪពុកនៅទីណាឃើញ។
លោក ចាន់ស៊ី ស៊ីណាវ៉ាត់ត្រា បានបញ្ជាក់ថា ទោះបីជាលោកជួបឧបសគ្គឬការលំបាកយ៉ាងណាក្តីគឺលោកនៅតែពុះពារតស៊ូរហូតដល់រៀនបញ្ចប់ថ្នាក់មហាវិទ្យាល័យ ទើបក្រោយមកក៏ផ្តើមចូលប្រឡូកក្នុងអាជីពជាតារាសម្ដែងនិងចម្រៀងទៀតផង។ ខណៈលោក ចាន់ស៊ី ស៊ីណាវ៉ាត់ត្រា បច្ចុប្បន្នក៏បានក្លាយជាអ្នកចម្រៀង Original Songផងដែរ។ បទOriginal Songs ដំបូងមានចំណងជើងថា ជាតិក្រោយផ្សេងជួបពុកម៉ែ ដែលបទនេះត្រូវនិងជីវិតពិតផ្ទាល់ខ្លួនរបស់លោកតែម្តង។
លោក ចាន់ស៊ី ស៊ីណាវ៉ាត់ត្រា បានបន្ថែមថា ក្រោយពេលវិលត្រឡប់មកចូលសិល្បៈសាជាថ្មីនេះលោកបានថតបទចម្រៀង Original Songs ចំនួន៣បទ ខណៈបទទាំងនេះកំពុងត្រៀមចេញជាFull MVនាពេលឆាប់ៗនេះ។ យ៉ាងណាមិញថ្វីត្បិតលោកបានចេញបទចម្រៀងOriginal Song ផ្ទាល់ខ្លួននៅលើទីផ្សារ១បទហើយក៏ពិតមែន តែលោក ចាន់ស៊ី ស៊ីណាវ៉ាត់ត្រា ពុំមានចំណង់ចំណូលចិត្តដើម្បីចាប់យកអាជីពជាតារាចម្រៀងតែមួយមុខនោះឡើយពោលគឺនៅតែរក្សាអាជីពសម្ដែងដដែល៕
Source: Kampuchea Thmey Daily
0 Comments