កំពង់ចាម ៖ អតីតទណ្ឌិតគំនិតពាល ទើបចេញពីពន្ធនាគារបាន៧ ខែ៧និងថ្ងៃ នឹកអាល័យកន្លែងចាស់ខ្លាំងពេក ក៏ត្រឡប់ទៅវិញ បន្ទាប់ពីធ្វើសកម្មភាពលួចយកម៉ូតូមួយគ្រឿងពីជនរងគ្រោះហើយ ត្រូវសមត្ថកិច្ចចាប់បាន។
ប៉ូលិសបានអោយដឹងថា នៅថ្ងៃទី១៦ ខែកក្កដា ឆ្នាំ២០១៨ វេលាម៉ោង១៨និង៣០នាទី កម្លាំងសមត្ថកិច្ចនគរបាល ឃុំហាន់ជ័យ បានទទួលព័ត៌មាន និងបណ្ដឹងពីឈ្មោះ ស្រ៊ី ស៊ុយទ្រី ភេទប្រុស អាយុ៣២ឆ្នាំ ជាតិខ្មែរ មានទីលំនៅភូមិមាន់ហើរ ឃុំហាន់ជ័យ ស្រុកកំពង់សៀម ខេត្តកំពង់ចាម ប្តឹងថា មានករណីចោរចូលផ្ទះលួចយក(ម៉ូតូ)ចំនួន១គ្រឿងម៉ាកវីវ៉ា ពណ៌ខ្មៅ ដែលទុកនៅក្រោមផ្ទះរបស់ខ្លួន។
ប៉ូលិសបានបន្តថា បន្ទាប់ពីទទួលបានព័ត៌មាន និងបណ្ដឹងភ្លាម កម្លាំងសមត្ថកិច្ចនគរបាលជំនាញស្រុកកំពង់សៀម សហការជាមួយកម្លាំងសមត្ថកិច្ចនគរបាលប៉ុស្តិ៍ហាន់ជ័យ ចាត់វិធានការជាបន្ទាន់ចុះដល់កន្លែងកើតហេតុ ធ្វើការស្រាវជ្រាវរកជនសង្ស័យ រហូតដល់ម៉ោង១៩និង៣០នាទី ថ្ងៃដដែលទើបសមត្ថកិច្ចនគរបាលយើងឃាត់ខ្លួនបានជនសង្ស័យចំនួន១នាក់ ឈ្មោះ គាន លាងហ៊ុយ ភេទប្រុសអាយុ៣៧ឆ្នាំ ជាតិខ្មែរ មានទីលំនៅភូមិហាន់ជ័យ ឃុំហាន់ជ័យ ស្រុកកំពង់សៀម ខេត្តកំពង់ចាម រួមទាំងដកហូតបានវត្ថុតាងម៉ូតូ១គ្រឿងម៉ាកវីវ៉ា ពណ៌ខ្មៅ ,ជញ្ជីងចំនួន១ កាំបិតផ្គាក់ចំនួន១ ,ពូថៅចំនួន១ និងម៉ូទ័រកាត់ដែកចំនួន២ បញ្ជូនមកកាន់អធិការដ្ឋាននគរបាលស្រុកកំពង់សៀម ធ្វើការសាកសួរ។
នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា ខ្លួនពិតជាបានធ្វើសកម្មភាពលួចយកម៉ូតូរបស់ជនរងគ្រោះពិតប្រាកដមែន។
ប៉ូលិសបានបញ្ជាក់ថា កន្លងមក ជនសង្ស័យធ្លាប់ជាប់ពន្ធនាគារខេត្តកំពង់ចាម រយៈពេល១៨ខែ ករណីលួចកុំព្យូទ័រនៅស្រុកស្ទឹងត្រង់ ខេត្តកំពង់ចាម ទើបចេញពីពន្ធនាគារបានរយៈពេល៧ខែ។
បច្ចុប្បន្នជនសង្ស័យខាងលើកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលស្រុកកំពង់សៀម ដើម្បីបំពេញសំណុំបែបបទតាមនីតិវិធី៕
Source: Kampuchea Thmey Daily
0 Comments