ភ្នំពេញ ៖ ក្មេងប្រុស ស្រី៣នាក់ បានគ្នានាំគ្នាចុះទៅលេងទឹកទន្លេ ក៏ស្រាប់តែក្មេងស្រីម្នាក់ត្រូវលង់ទឹកស្លាប់ បង្កជាការភ្ញាក់ផ្អើល កាលពីវេលាម៉ោង១៣និង៣០នាទីរសៀលថ្ងៃទី១៥ ខែកក្កដា ឆ្នាំ២០១៨ តាមបណ្តោយផ្លូវព្រះស៊ីសុវត្ថិនៅចំណុចមាត់ទន្លេ ស្ថិតនៅក្នុងសង្កាត់ផ្សារកណ្តាល១ខណ្ឌដូនពេញ។
សមត្ថកិច្ចបានឲ្យដឹងថា ក្មេងស្រីរងគ្រោះ ដែលស្លាប់មានឈ្មោះឃឿន លក្ខិណា អាយុ១១ឆ្នាំ ស្នាក់នៅផ្ទះ35E3 ផ្លូវ១១០ សង្កាត់វត្តភ្នំ ខណ្ឌដូនពេញ មានស្រុកកំណើត នៅស្រុកមេសាង ខេត្តព្រៃវែង មានម្តាយឈ្មោះជា ចាន់នី ភេទស្រី អាយុ៤៨ឆ្នាំ ស្នាក់នៅជាមួយគ្នា។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញក្មេងប្រុសម្នាក់រួមនឹងក្មេងស្រី២នាក់ទៀត បាននាំគ្នាទៅចុះទៅលេងទឹកទន្លេ ហើយមិនដឹងជាយ៉ាងម៉េចនោះទេបានជាក្មេងទាំងនោះលង់ទឹកភ្លាមៗនោះ។ ប៉ុន្តែខណៈនោះក៏មានបុរសម្នាក់មិនស្គាល់អត្តសញ្ញាណកំពុងតែស្ទូចត្រី ដោយឃើញដូច្នេះក៏លោតទឹកចូលជួយបានក្មេងស្រីម្នាក់និងក្មេងប្រុសម្នាក់ចំណែកឯក្មេងស្រីរងគ្រោះខាងលើនេះ បានលង់ទឹកបាត់ទៅហើយ ប្រហែលជា១៥នាទីក្រោយមកក៏ផ្អើលទៅដល់ប្រជាពលរដ្ឋ និងលោកសុខ ពេញវុធ អភិបាលខណ្ឌដូនពេញ ចុះមកកន្លែងកើតហេតុនិងបានទំនាក់ទំនងហៅខាងបងប្អូនទូកឥស្លាម មកជួយរុករករហូតឃើញសពជនរងគ្រោះស្រង់មកលើគោកដោយក្រុមទូកឥស្លាមទាំងនោះ បានទាមទារថ្លៃរាវរកសពឃើញចំនួន៣០០ដុល្លារធ្វើឲ្យម្តាយរបស់ជនរងគ្រោះគាត់គ្មានលទ្ធភាពចំនួន៣០០ដុល្លារឲ្យទៅក្រុមទូកឥស្លាមនោះ ទើបលោកអភិបាលខណ្ឌដូនពេញគាត់ចេញមុខរ៉ាប់រងឲ្យម្តាយជនរងគ្រោះ នោះផងដែរ។
ប្រភពព័ត៌មានបានបន្តទៀតថា លោកសុខ ពេញវុធ អភិបាលខណ្ឌដូនពេញមិនត្រឹមតែចេញថ្លៃរាវរកសពចំនួន៣០០ដុល្លារឲ្យនោះទេ គឺលោកអភិបាលខណ្ឌបានចេញថ្លៃឡានដឹកសពហើយក៏ជូនថវិកាចំនួន១លានរៀល ដល់ម្តាយរបស់ក្មេងស្រីរងគ្រោះ បញ្ជូនទៅធ្វើបុណ្យតាមប្រពៃណីស្រុកកំណើតផងដែរ៕
Source: Kampuchea Thmey Daily
0 Comments